LUKA 17

₁Jesu a re ho barutuoa ba hae: “Hase ho ka etsahalang hore meleko e se ke ea e-ba teng, empa ho malimabe eo e tlang ka eena. ₂Ho ka ba molemo ho eena ha a tlamelloa leloala molaleng, a liheloa leoatleng, ho e-na le hore a lihele e mong oa ba banyenyane bana sebeng. ₃Itlhokomeleng!

“Haeba ngoan'eno a u siteloa, mo khalemele, 'me haeba a baka, mo tšoarele. ₄Haeba a u siteloa hasupa ka letsatsi, a boela ho uena hasupa, a re: ‘Ke bakile,’ u mo tšoarele.”

₅Baapostola ba re ho Morena: “Re ekeletse tumelo.”

₆Morena a re: “Hojane le na le tumelo e kaalo ka tlhaku ea mosetareta, le ne le ka re ho sefate sena sa monōkōtšoai: ‘Iphōthōle, u itlhome leoatleng,’ 'me se ne se ka le mamela.

₇“E ka ba mang ho lōna, eo ha a e-na le mohlanka ea lemang kapa ea alosang, ha a fihla a e-tsoa naheng, a ka reng ho eena: ‘Tloo kapele, u lule, u je?’ ₈Na a ke ke a mpa a re ho eena: ‘Ntokisetse lijo, u itlame letheka, u ntšebeletse ho fihlela ke qeta ho ja le ho noa, 'me kamora' tsena, u ka ja, ua noa?’ ₉Na o ee a lebohe mohlanka hobane a entse tseo a li laetsoeng na? ₁₀Ka mokhoa oo le lōna, ha le entse tsohle tseo le li laetsoeng, ereng: ‘Re bahlanka ba se nang thuso, re entse seo re neng re tšoanetse ho se etsa.’ ”

₁₁Eitse ha Jesu a e-ea Jerusalema, a feta pakeng tsa Samaria le Galelea. ₁₂Eare ha a kena motseng o mong, a khahlana le banna ba balepera ba leshome. Ba ema hojana, ₁₃ba hōoeletsa, ba re: “Jesu, Monghali, ak'u re utloele bohlōkō!”

₁₄Ha a ba bona a re ho bona: “E-eang, le itlhahise ho baprista.” Ba re ba sa ea, ba fola, ba hloeka.

₁₅Empa e mong oa bona, ha a bona hore o folile, a khutla a ntse a tlotlisa Molimo ka lentsoe le phahameng, ₁₆a itihela fatše ka sefahleho maotong a Jesu, a mo leboha. Eena e ne e le Mosamaria.

₁₇Jesu a botsa, a re: “Ha ke re ho folisitsoe ba leshome? Ba robong ba kae? ₁₈Na ha ho ba khutlileng ho tlotlisa Molimo, haese molichaba eo feela na?” ₁₉Eaba o re ho eena: “Ema, u ikele; tumelo ea hao e u folisitse.”

₂₀Eare ha Jesu a botsoa ke Bafarisi hore na 'Muso oa Molimo o tla tla neng, a ba araba, a re: “'Muso oa Molimo ha o tle ka mokhoa o bonoang; ₂₁hape ho ke be ha thoe: ‘Bonang, o mona, kapa o mane!’ 'Muso oa Molimo o har'a lōna.”

₂₂A re ho barutuoa: “Ho tla tla matsatsi ao ka 'ona le tla labalabela ho bona le leng la matsatsi a Mor'a Motho, empa le ke ke la le bona. ₂₃Ba tla re ho lōna: ‘Bonang, o mane!’ kapa: ‘Bonang, o mona!’ Le se ke la ea, leha e le ho ba latela. ₂₄Joalokaha lehalima le tsèkèma ho tloha nq'a e 'ngoe tlas'a leholimo, ho ea nq'a e 'ngoe tlas'a leholimo, Mor'a Motho o tla ba joalo mohl'a letsatsi la hae. ₂₅Empa eka khona a hlōkōfatsoe haholo pele, a be a lahloe ke molōko ona.

₂₆“Joalokaha ho ne ho etsahale mehleng ea Nōoe, ho tla ba joalo le matsatsing a Mor'a Motho: ₂₇batho ba ne ba e-ja, ba e-noa, ba nyala, ba nyalisa, ho fihlela letsatsing leo Nōoe a kenang arekeng ka lona, 'me ho e-tla morallo, o ba timetsa bohle.

₂₈“Ka mokhoa oona oo ho ne ho be joalo mehleng ea Lota: ba ne ba e-ja, ba e-noa, ba reka, ba rekisa, ba lema, ba haha. ₂₉Empa ka letsatsi leo Lota a neng a tsoe Sodoma ka lona, mollo le sebabole tsa na, li e-tsoa leholimong, tsa ba timetsa bohle.

₃₀“Ho tla ba joalo ka letsatsi leo Mor'a Motho a iponahatsang ka lona. ₃₁Ka letsatsi leo, ea tla be a le holim'a ntlo, 'me thepa ea hae e le ka tlung, a se ke a theoha ho ea e nka, le ea leng masimong a se ke a khutlela hae. ₃₂Hopolang mosali oa Lota. ₃₃Mang le mang ea lekang ho ipōlōkela bophelo ba hae bo tla mo senyehela, empa eo bo mo senyehelang o tla bo pholosa. ₃₄Kea le bolella, ka bosiu boo etlare ba babeli ba le betheng e le 'ngoe, e mong a nkoe, e mong a siuoe; ₃₅basali ba babeli ba tla be ba sila hammoho, e mong a nkoe, e mong a siuoe. ₃₆Batho ba babeli ba tla be ba le naheng, e mong o tla nkoa, e mong a siuoe.”

₃₇Ba araba, ba re ho eena: “Hokae, Morena?”

A re ho bona: “Moo sefifi se leng teng, le matlaka a tla bōkana teng.”