LUKA 2

₁Mehleng eo ha tsoa taelo ea Sesare Augosetose, ea hore batho ba lefatše lohle ba ngolisoe. ₂Ngoliso ena ea pele e bile teng ha Kireniuse e le 'musisi oa Siria. ₃Bohle ba ea ingolisa, e mong le e mong motseng oa habo.

₄Le Josefa a nyoloha Galelea, motseng oa Nasaretha, a ea Judea, motseng oa Davida o bitsoang. Betlelehema, hobane eena e ne e le oa ntlo ea Davida le oa lelōko la hae. ₅A ingolisa le Maria, eo a mo lebelelitseng, eo e neng e le moimana. ₆Ha ba le moo, nako ea hae ea ho beleha ea fihla, ₇'me a beleha mora oa hae oa letsibolo; a mo phutha ka masela, a mo robatsa ka sejelong, hobane ba ne ba hlokile sebaka tlung ea baeti.

₈Naheng eona eo, ho ne ho e-na le balisa ba phelang metebong, ba lebela mehlape ea bona bosiu. ₉Lengeloi la Morena la fihla ho bona, khanya ea Morena ea ba teela hare, 'me ba tšaba haholo. ₁₀Lengeloi la re ho bona: “Se tšabeng. Bonang, ke le bolella molaetsa o molemo oa thabo e kholo, eo e tla ba ea batho bohle. ₁₁Kajeno, motseng oa Davida, le tsoaletsoe Mopholosi, e leng Kreste Morena. ₁₂Hoo e tla ba pontšo ho lōna, ke hore le tla fumana lesea le phuthiloeng ka masela, le robetse ka sejelong.”

₁₃Eaba hang-hang lebōthohali la leholimo le ba le lengeloi leo, le roka Molimo, le re:

₁₅Hoba mangeloi a tlohe ho bona a khutlele leholimong, balisa ba buisana, ba re: “A re eeng Betlelehema, re e'o bona taba eo e etsahetseng, eo Morena a re tsebisitseng eona.”

₁₆Ba ea ka potlako, 'me ba fumana Maria le Josefa, le lesea le robetseng ka sejelong. ₁₇Hoba ba le bone, ba phatlalatsa taba eo ba e boleletsoeng ka ngoana eo. ₁₈Bohle ba utloang ba makalla tseo ba li bolelloang ke balisa; ₁₉ha e le Maria, a bōlōka litaba tseo tsohle, a li lohotha pelong ea hae. ₂₀Balisa ba nt'o khutla ba ntse ba tlotlisa Molimo, ba mo roka ka litaba tsohle tseo ba li utloileng, ba li boneng, joalokaha ba boleletsoe.

₂₁Ha matsatsi a robeli a hore ngoana a bōlōtsoe a fetile, a reoa lebitso la Jesu, leo a neng a le reoe ke lengeloi a e-s'o emoloe.

₂₂Ha ho fetile matsatsi a tlhoekiso ea bona ho ea ka Molao oa Moshe, ba isa Jesu Jerusalema ho mo hlahisa pel'a Morena, ₂₃joalokaha ho ngotsoe Molaong oa Morena, ho thoe: “Ngoana e mong le e mong e motona oa letsibolo o tla khetheloa Morena,” ₂₄le ho tlisa sehlabelo, ho ea ka se boletsoeng Molaong oa Morena, e leng maebana-khoroana a mabeli kapa malinyane a mabeli a maeba.

₂₅Joale ho ne ho e-na le monna Jerusalema ea bitsoang Simeone. Monna eo o ne a lokile, a hlompha Molimo, a lebeletse tšeliso ea Iseraele, 'me Moea o Halalelang o ne o le ho eena. ₂₆O ne a senoletsoe ke Moea o Halalelang hore a ke ke a shoa a e-s'o bone Motlotsuoa oa Morena. ₂₇A isoa ke Moea ka Tempeleng, 'me ha batsoali ba ngoana Jesu ba mo isa hore ba etse ka eena ho ea ka moetlo oa Molao, ₂₈Simeone a mo nka, a boka Molimo, a re:

₃₃Ntat'ae le 'm'ae ba makalla tse boleloang ka eena. ₃₄Simeone a ba hlohonolofatsa, 'me a re ho Maria, 'm'ae: “Bona, ngoana enoa o baletsoe ho oa le ho tsoha ha ba bangata Iseraeleng le ho ba pontšo e tlang ho hanyetsoa, ₃₅hore maikutlo a lipelo tse ngata a senolehe. Le uena ka sebele lerumo le tla u hlaba moea.”

₃₆Ho ne ho e-na le moporofeta oa mosali, ea bitsoang Anna, morali oa Fanuele, oa lelōko la Asere. Anna eo o ne a se a tsofetse haholo, a ile a phela le monna ka lilemo tse supileng ho tloha boroetsaneng ba hae. ₃₇Ea e-ba mohlolohali ho fihlela a e-ba le lilemo tse mashome a robeli a metso e mene. O n'a sa tlohe Tempeleng, a sebeletsa Molimo bosiu le motšeare ka ho itima lijo la ke ho rapela. ₃₈A fihla ka eona nako eo, a boka Molimo, a bua ka Jesu ho bohle ba lebeletseng topollo ea Jerusalema.

₃₉Ha ba se ba phethile tsohle ka ho ea ka Molao oa Morena, ba khutlela Galelea, motseng oa habo bona, oa Nasaretha. ₄₀Ha e le ngoana a 'na a hōla, a matlafala, a tlala bohlale, 'me mohau oa Molimo oa 'na oa e-ba le eena.

₄₁Batsoali ba Jesu ba ne ba e-ea Jerusalema ka selemo le selemo, moketeng oa Paseka. ₄₂Ha a le lilemo tse leshome le metso e 'meli, ba nyolohela teng ho latela moetlo oa mokete. ₄₃Hoba ba qete matsatsi a mokete, ha ba khutlela hae, moshanyana Jesu a sala Jerusalema, batsoali ba hae ba sa tsebe. ₄₄Empa ka ho hopola hore o har'a 'milimili, ba tsamaea leeto la letsatsi, ba nt'o 'matla har'a bang ka bona le har'a ba tsebanang le bona. ₄₅Ha ba sa mo fumane, ba khutlela Jerusalema ba ntse ba 'matla. ₄₆Kamora' matsatsi a mararo ba mo fumana ka Tempeleng a lutse har'a baruti, a ba mametse, a ntse a ba botsa, ₄₇'me bohle ba mo mametseng ba ne ba hlolloa ke kelello ea hae le likarabo tsa hae. ₄₈Ha batsoali ba hae ba 'mona, ba tsota, 'me 'm'ae a re ho eena: “Ngoan'a ka, u re etselitse'ng tjee? Bona, rōna le ntat'ao re ne re ntse re u batla re tšoenyehile.”

₄₉A re ho bona: “Le ne le mpatlela'ng? Na le ne le sa tsebe hore ke tšoanetse ho ba mosebetsing oa Ntate?” ₅₀Empa bona ba se ke ba utloisisa taba eo a e buileng ho bona.

₅₁A theoha le bona, a ea Nasaretha, 'me a 'na a ikokobetsa tlas'a bona. 'M'ae a bōlōka litaba tseo tsohle ka pelong ea hae. ₅₂Jesu a 'na a tsoela pele bohlaleng, le ho hōleng, 'me a khahleha pel'a Molimo le pel'a batho.