Polao ea Johanne Mokolobetsi
1Ka nako eo khosi Heroda a utloa botumo ba Jesu. 2A re ho basebeletsi ba hae: “Motho eo ke Johanne Mokolobetsi; o tsohile bafung; ka baka leo, matla a hlollang a sebetsa ka ho eena.”
3Heroda o ne a ile a tšoara Johanne, a mo tlama, 'me a mo kenya chankaneng ka baka la Herodiase, mohats'a moen'a hae Filipi. 4Johanne o ne a ile a re ho Heroda: “Ha ho lumellehe hore u mo nyale.” 5Heroda o ne a rata ho 'molaea, empa a tšaba batho, hobane ba ne ba talima Johanne e le moporofeta.
6Mohl'a mokete oa khopotso ea tsoalo ea Heroda, morali oa Herodiase a etsa motjeko pontšeng ho bona, 'me a khahlisa Heroda; 7ka baka leo, a mo tšepisa ka ho ikana hore o tla mo fa eng kapa eng eo a ka e kōpang.
8Ka ho susumetsoa ke 'm'ae, moroetsana a re: “Mphe hona mona, ka mokèkè, hlooho ea Johanne Mokolobetsi.”
9'Musisi a soaba, empa ka baka la kano ea hae, le ka baka la ba leng lijong le eena, a laela hore a e neoe. 10Eaba o laela hore Johanne a khaoloe hlooho chankaneng. 11Hlooho ea hae ea tlisoa ka mokèkè, ea neoa moroetsana, 'me eena a e isa ho 'm'ae. 12Barutuoa ba Johanne ba tla, ba nka setōpō, ba se epela; ba nt'o ea tsebisa Jesu.
Jesu o fepa ba likete tse hlano
13Eare ha Jesu a utloa pehi eo, a tloha moo ka sekepe, a ikela nahathothe boinotšing. Matšoele ha a utloa a mo latela ka maoto, a e-tsoa metseng. 14Ha Jesu a e-tsoa sekepeng, a bona letšoelehali, a utloela batho bohlōkō, 'me a folisa bakuli ba bona.
15Ha ho phirima, barutuoa ba hae ba tla ho eena, ba re: “Mona ke nahathothe, 'me nako e se e ile; lokolla batho bana, ba tle ba e'o ithekela lijo metseng.”
16Empa Jesu a re ho bona: “Ha ho hlokahale hore ba tsamaee; ba fepeng e le lōna.”
17Ba re ho eena: “Mona ha re na letho haese linkhoa tse hlano le litlhapi tse peli.”
18A re: “Ntlisetseng tsona mona.” 19Hoba a laele matšoele ho lula joanng, a nka linkhoa tseo tse hlano le litlhapi tseo tse peli, a lelalla leholimong, a boka, a ngoatha linkhoa, a li nea barutuoa, 'me ba li abela matšoele. 20Ba e-ja bohle, ba khōra; eaba ho bōkelloa makumane a setseng, 'me a tlatsa lirōtō tse leshome le metso e 'meli. 21Ba jeleng e ne e le banna ba ka bang likete tse hlano, ho sa baloe basali le bana.
Jesu o tsamaea holim'a metsi
22Kapele-pele Jesu a laela barutuoa ba hae ho kena ka sekepeng, ho mo etella pele ho ea mose oane, ha eena a ntse a qhala matšoele. 23Hoba a a qhale, a nyolohela thabeng ho ea rapela boinotšing, ha ba ha phirima a ntse a le mong hona moo. 24Sekepe sona se ne se se se le hōle le lebōpo, se tsukutloa ke maqhubu, hobane se ne se tobane le moea.
25Kameso, Jesu a ea ho bona a tsamaea holim'a metsi. 26Ha barutuoa ba 'mona a tsamaea holim'a metsi, ba tšoha, ba re: “He! ke sethotsela!” 'me ba bokolla ke ho tšaba.
27Eaba Jesu o phakisa a bua le bona, a re: “Khobang matšoafo! Ke 'na, se tšabeng!”
28Petrose a mo araba, a re: “Morena, haeba ke uena, ntaele hore ke tle ho uena ke tsamaea holim'a metsi.”
29A re: “Tloo!” Eaba Petrose o tsoa sekepeng, o tsamaea holim'a metsi, o leba ho Jesu. 30Empa ha a utloa moea oa sefefo a tšoha, a qala ho teba, 'me a hōoa, a re: “Morena, mpholose!”
31Hang-hang Jesu a nanabetsa letsoho, a mo phamola, a re ho eena: “Uena ea tumelo e fokolang! U belaetse ka lebaka la'ng?”
32Hoba ba kene ka sekepeng, moea oa teba. 33Ba neng ba le ka sekepeng ba mo khumamela, ba re: “Kannete u Mora oa Molimo!”
Jesu o folisa bakuli Genesareta
34Eare ha ba se ba tšeletse mose, ba fihla lebōpong la Genesareta. 35Ha banna ba sebaka seo ba se ba mo tsebile, ba hlaba mokhosi sebakeng seo sohle, 'me batho ba mo tlisetsa bohle ba kulang. 36Ba mo kōpa hore a ba lumelle ho ama feela qola ea seaparo sa hae, 'me bohle ba e amileng ba fola.
