Tšobotsi ea Jesu ea fetoha
1Kamora' matsatsi a tšeletseng, Jesu a nka bo-Petrose, Jakobo le Johanne ngoan'abo, a nyolohela le bona thabeng e telele, boinotšing. 2A fetoha tšobotsi a le pel'a bona, sefahleho sa hae sa khanya joaloka letsatsi, liaparo tsa hae tsa e-ba tšoeu joaloka leseli. 3Joale Moshe le Elia ba iponahatsa ho bona, ba ntse ba bua le Jesu.
4Petrose a re ho Jesu: “Morena, ke hantle ha re le mona; ha u rata ke tla hloma maphephe a mararo mona, le leng e be la hao, le leng e be la Moshe, le leng e be la Elia.”
5Eare a sa bua, leru le khanyang la ba khurumetsa, lentsoe la tsoa lerung, la re: “Enoa ke Mora oa ka eo ke mo ratang, ea nkhahlang; mo mameleng.”
6Ha barutuoa ba utloa hoo, ba itihela fatše ka lifahleho, ba tšohile haholo. 7Jesu a tla ho bona, a ba ama, a re: “Emang, se tšabeng!” 8Eare ha ba phahamisa mahlo a bona ba se ke ba bona motho haese Jesu feela.
9Eare ha ba ntse ba theoha thabeng, Jesu a ba laea, a re: “Le se ke la bolella motho ka pono ena, ho fihlela ha Mor'a Motho a se a tsositsoe bafung.”
10Barutuoa ba 'motsa, ba re: “Ke hobane'ng Litsebi tsa Molao li reng eka khona Elia a tle pele?”
11A ba araba, a re: “Elia o hlile oa tla, 'me o tla busetsa lintho tsohle malulong. 12Empa 'na ke re ho lōna: Elia o se a ile a tla, 'me ha baa ka ba mo tseba, empa ba ile ba mo etsa kamoo ba ratang kateng; ka mokhoa o joalo Mor'a Motho le eena o tla hlōkōfatsoa ke bona.” 13Joale barutuoa ba utloisisa hore o ne a bua le bona ka Johanne Mokolobetsi.
Pholiso ea moshanyana ea nang le modemona
14Hoba ba fihle har'a letšoele, monna e mong a tla ho Jesu, a khumama kapele ho eena, 15a re: “Morena, hauhela mora oa ka, hobane o shoa sethoathoa, o utloa bohlōkō ka ho fetisisa, 'me o atisa ho oela mollong le metsing. 16Ke ile ka mo tlisa ho barutuoa ba hao, empa ba sitiloe ho mo folisa.”
17Jesu a araba, a re: “A molōko o sa lumeleng, o khopo! Ke tla ba le lōna ho fihlela neng? Ke tla le mamella ho fihlela neneng? Mo tliseng ho 'na mona!” 18Jesu a mo khalemela, 'me modemona oa tsoa ho eena, moshanyana a fola ka eona nako eo.
19Joale barutuoa ba tla ho Jesu ka lekunutu, ba re: “Ke ka baka la'ng rōna re sitiloeng ho leleka modemona?”
20A re ho bona: “Ke hobane tumelo ea lōna ea fokola. Kannete kea le bolella, ke re: Hoja le na le tumelo e kaa ka tlhaku ea mosetareta le ne le tla re ho thaba ena: ‘Sutha mona, u ee mane,’ 'me e ne e tla sutha. Ha ho letho le ka le sitang. 21Mofuta ona ha o tsoe haese ka thapelo le ka ho itima lijo.”
Jesu o porofeta lefu le tsoho ea hae hape
22Ha ba ntse ba tsamaea hammoho Galelea, Jesu a re ho bona: “Mor'a Motho o se a tla neeloa matsohong a batho, 23'me ba tla 'molaea, empa o tla tsoha bafung ka tsatsi la boraro.” Eaba ba soaba haholo.
Jesu o ntša lekhetho la Tempele
24Ha ba fihla Kaperenauma, babōkelli ba lekhetho la Tempele ba tla ho Petrose, ba re: “Na moruti oa lōna o ntša lekhetho la Tempele?”
25A re: “E, oa le ntša.”
Ha Petrose a kena ka tlung, Jesu a mo raka, a re: “Uena u re'ng, Simone? Mahosi a lefatše a bōkella lekhetho la khoebo kapa la monna ho bo-mang? Ho bara ba 'ona kapa ho balichaba?”
26Eare ha a re: “Ho balichaba,” Jesu a re ho eena: “Ha ho le joalo, bara ba lokolohile. 27Empa hore re tle re se ke ra ba khopisa, e-ea leoatleng, u akhele selope, 'me tlhapi eo u tla e tšoasa pele, u e nke, u e ahlamolle, 'me u tla fumana setatera; u se nke, u ba nee sona ho lefella rōna le uena.”
