MATHEU 3

₁Mehleng eo ha hlaha Johanne Mokolobetsi; a ruta feelleng la Judea, ₂a re: “Bakang, hobane 'Muso oa maholimo o atametse!” ₃Ke eena ea boletsoeng ke moporofeta Esaea, ha a re:

₄Johanne o ne a apara seaparo se entsoeng ka boea ba kamele, a itlama ka leqhama la letlalo thekeng; lijo tsa hae e ne e le litsie le mahe a linotši tsa naha. ₅Joale batho ba Jerusalema, le ba Judea eohle, le ba phuleng eohle ea Jorodane ba tsoela ho eena, ₆ba kolobetsoa ke eena nōkeng ea Jorodane, ba ntse ba ipolela libe tsa bona.

₇Empa ha a bona Bafarisi le Basaduke ba bangata ba e-tla ho kolobetsoa, a re ho bona: “Malinyane a marabe, ke mang ea le boleletseng hore le ka baleha bohale bo tlang? ₈Bontšang ka liketso hore le bakile, ₉'me le se ke la nahana, la re: ‘Ntat'a rōna ke Aborahama,’ hobane kea le bolella hore Molimo o na le matla a ho hlahisetsa Aborahama bana ka majoe ana. ₁₀Selepe se se se beiloe metsong ea lifate; sefate sefe kapa sefe se sa beheng litholoana tse monate se tla rengoa, se lahleloe mollong.

₁₁“Ha e le 'na, ke le kolobeletsa pako ka metsi. Athe ea tlang kamorao ho 'na o mpheta ka matla, hoo ke sa tšoaneleng ho mo rōla meqathatso; eena o tla le kolobetsa ka Moea o Halalelang le ka mollo. ₁₂Seolōso se letsohong la hae, 'me o tla fielisisa seotlo sa hae, a bōkelle koro ea hae sesiung, 'mōkō oona a o chese mollong o sa timeng.”

₁₃Eaba Jesu o fihla nōkeng ea Jorodane a e-tsoa Galelea, a tla ho Johanne hore a kolobetsoe ke eena. ₁₄Empa Johanne a leka ho mo thiba, a re: “Eka khona e be 'na ea kolobetsoang ke uena, athe uena u tla ho 'na?”

₁₅Jesu a mo araba, a re: “Lesa, joale, hobane ka tsela ena re lokela ho phethahatsa hohle ho lōkileng.” Johanne a lumela.

₁₆Hang-hang hoba Jesu a kolobetsoe, a tsoa metsing, 'me bonang, a buleloa leholimo, a bona Moea oa Molimo o theoha e ka leeba, o e-tla holim'a hae; ₁₇ha utloahala lentsoe le tsoang maholimong, le reng: “Enoa ke Mora oa ka eo ke mo ratang, ea nkhahlang!”