MATHEU 6

₁“Hlokomelang hore le se ke la etsa mesebetsi ea lōna ea bolumeli pontšeng ho batho, hore ba le babatse; haeba le etsa joalo ha le na ho ba le moputso o tsoang ho Ntat'a lōna ea maholimong.

₂“Ha ho le joalo, ha u etsetsa mafutsana thuso, u se ke ua ipolela, joalokaha baikaketsi ba etsa matlung a thapelo le litseleng tsa motse, hore ba tlotlisoe ke batho; kannete kea le bolella, ba se ba amohetse moputso oa bona. ₃Empa ha u thusa mafutsana, letsoho la hao le letšehali le se ke la tseba se etsoang ke le letona, ₄thuso ena ea hao e be ea sephiri, 'me Ntat'ao ea bonang le sephiring o tla u buseletsa.

₅“Hape ha le rapela, le se ke la etsisa baikaketsi, ba ratang ho rapela ba eme matlung a thapelo le mabaleng a motse, hore ba bonahale ho batho; kannete kea le bolella, ba se ba amohetse moputso oa bona. ₆Empa uena ha u rapela, kena ka kamoreng ea hao, u koale monyako, u rapele Ntat'ao ea leng teng le sephiring, 'me Ntat'ao ea bonang le sephiring o tla u buseletsa. ₇Joale ha le rapela le se ke la ea lolololo joaloka bahedene, ba hopolang hore ba tla utluoa ka baka la mantsoe a bona a mangata. ₈Le se ke la ba etsisa, hobane Ntat'a lōna o s'a nts'a tseba tseo le li hlokang, le e-s'o mo kōpe.

₉“Ha ho le joalo, lōna rapelang tjena:

₁₄“Ha le tšoarela batho liphoso tsa bona, le lōna Ntat'a lōna ea maholimong o tla le tšoarela; ₁₅athe ha le sa tšoarele batho, Ntat'a lōna le eena a ke ke a le tšoarela liphoso tsa lōna.

₁₆“Ha le itima lijo, le se ke la itlhonamisa joaloka baikaketsi; ba sosobanya lifahleho, hore ba bonahale ho batho hore ba itima lijo. Kannete kea le bolella, ba se ba amohetse moputso oa bona. ₁₇Empa uena ha u itima lijo, u iphotle, u itlotse hlooho, ₁₈hore u se ke ua bonahala ho batho hore u itima lijo, haese ho Ntat'ao ea leng teng le sephiring, 'me Ntat'ao ea bonang le sephiring o tla u buseletsa.

₁₉“Le se ke la ipōkellela matlotlo lefatšeng, moo tšoèlè le mafōōme li senyang, moo masholu a thuang, a utsoe; ₂₀le mpe le ipōkellele matlotlo leholimong, moo tšoèlè leha e le mafōōme li sa senyeng, moo masholu a sa thueng, a utsoe, ₂₁hobane moo letlotlo la hao le leng teng, le eona pelo ea hao e tla ba hona teng.

₂₂“Leihlo ke lebone la 'mele. Haeba leihlo la hao le hloka sepha, 'mele oohle oa hao o tla ba leseling, ₂₃empa haeba leihlo la hao le sa loka, 'mele oohle oa hao o tla apareloa ke lefifi. Ha ho le joalo, ha leseli le ka ho uena le fetoha lefifi, lefifi e tla ba le lekaakang!

₂₄“Ha ho motho ea ka sebeletsang marena a mabeli, hobane o tla hloea e mong, a rate e mong; kapa o tla khomarela e mong, a nyelise e mong. Le ke ke la sebeletsa Molimo le Leruo.

₂₅“Ka baka leo, ke re ho lōna: Le se ke la itšoenya ka bophelo ba lōna, hore na le tla ja'ng, kapa le tla noa'ng, leha e le ka 'mele ea lōna, hore na le tla apara'ng. Ana bophelo ha bo fete lijo, le 'mele ha o fete liaparo ka bohlokoa na? ₂₆Talimang linonyana tse fofang: ha li jale, ha li kotule, ha li bōkellele lisiung, empa Ntat'a lōna ea maholimong oa li fepa; ana lōna ha le li fete hōle ka bohlokoa na? ₂₇Ke mang ho lōna eo ka ho itšoenya a ka tsebang ho lelefatsa bophelo ba hae, leha e le ka motsotsoana feela?

₂₈“Hape le itšoenyetsa'ng le ka liaparo? Ithuteng ka likhahla hore na li hōla joang: ha li sebetse ka thata, ha li ohle, ₂₉empa kea le bolella, esita le Solomone tlōtleng eohle ea hae ha a ka a apara joaloka e 'ngoe ea tsona. ₃₀Ha e le moo Molimo a apesa joalo joang ba naha, bo leng teng kajeno, 'me kamoso bo lahleloe sebōping, na lōna ba tumelo e fokolang, a ke ke a le apesa ho feta? ₃₁Ha ho le joalo, le se ke la itšoenya, la re: ‘Re tla ja'ng? Re tla noa'ng? Re tla apara'ng?’ ₃₂Tsena tsohle li labalabeloa ke bahedene; athe Ntat'a lōna ea maholimong o tseba hore le li hloka tsohle. ₃₃Joale batlang 'Muso oa Molimo le ho loka ha hae pele, 'me tsena tsohle le tla li ekeletsoa. ₃₄Ka baka leo, le se ke la itšoenya ka la hosasane, hobane la hosasane le tla itšoenya ka tsa lona; letsatsi ka leng le lekanoa ke bothata ba lona.