Jesu o folisa molepera
1Hoba Jesu a theohe thabeng, matšoele-tšoele a mo latela. 2Eaba molepera o tla ho eena, oa mo khumamela, o re: “Morena, ha u rata u ka ntlhoekisa.”
3Jesu a otlolla letsoho, a mo ama, a re: “Kea rata, hloeka!” Hang-hang lepera la hae la hloekisoa, a fola. 4Jesu a re ho eena: “Hlokomela u se bolelle motho, u mpe u e'o itlhahisa ho moprista, u ntše nyehelo e laetsoeng ke Moshe, hore e be bopaki ho bona.”
Jesu o folisa mohlanka oa molaoli oa lebōtho
5Eare ha Jesu a kena Kaperenauma, molaoli oa lebōtho la ba lekholo a tla ho eena, a mo rapela, 6a re: “Morena, mohlanka oa ka o liphateng ha ka, o shoele litho, o opeloa habohlōkō-hlōkō.”
7Jesu a re ho eena: “Ke tla ea mo folisa.”
8Molaoli oa lebōtho a mo araba, a re: “Morena, ha ke tšoaneloe ke hore u kene ka tlung ea ka; bua feela, 'me mohlanka oa ka o tla fola. 9Le 'na, ke le motho ea taolong ea ba bang, ke na le bahlabani tlas'a ka; ha ke re ho e mong: ‘E-ea,’ oa ea; le ho e mong: ‘Tloo,’ oa tla; le ho mohlanka oa ka, ‘Etsa hona,’ oa etsa.”
10Ha Jesu a mo utloa a makala, a re ho ba mo latetseng: “Ruri kea le bolella, ha ke e-s'o fumane tumelo e kaalo le Iseraeleng. 11Kea le bolella, ba bangata ba tla tsoa bochabela le bophirimela, ba be lijong le Aborahama, Isaka le Jakobo 'Musong oa maholimo, 12empa bao e leng ba 'Muso oo ka tsoalo, ba tla lahleloa kantle, lefifing, moo ho tla ba teng lillo le litsikitlano tsa meno.” 13Eaba Jesu o re ho molaoli oa lebōtho: “E-ea, u etsetsoe joalokaha u lumetse!”
Mohlanka oa hae a fola ka eona nako eo.
Jesu o folisa batho ba bangata
14Ha Jesu a fihla ha Petrose, a bona mohoehali oa Petrose a le liphateng, a tšoeroe ke feberu. 15Jesu a mo ama letsohong, 'me feberu ea mo tlohela; a tsoha, a sebeletsa Jesu.
16Mantsiboea ha tlisoa ho Jesu ba bangata ba nang le bademona; eaba o leleka meea eo ka lentsoe feela, a folisa bakuli bohle, 17hore ho tle ho phethahale ho boletsoeng ke moporofeta Esaea, ha a re:
“O ipelesitse mahlōkō a rōna,
a inkela maloetse a rōna.”
Ba reng ba tla latela Jesu
18Ha Jesu a bona letšoele le mo teetseng hare, a laela hore ho tšeleloe mose oane. 19Setsebi sa Molao sa tla ho eena, sa re: “Moruti, ke tla u latela hohle moo u ka eang teng.”
20Jesu a re ho sona: “Liphokojoe li na le mesima, linonyana tse fofang li na le lihlaha, empa Mor'a Motho ha a na moo a ka samelang hlooho teng.”
21Joale e mong oa barutuoa ba hae a re ho eena: “Morena, ak'u ntumelle ke e'o pata ntate pele.”
22Jesu a re ho eena: “Ntatele, lesa bafu ba pate bafu ba bona.”
Jesu o khutsisa sefefo
23Jesu a kena ka sekepeng, 'me barutuoa ba hae ba mo latela. 24Ha tsoha sefefo se matla letšeng, hoo sekepe se neng se koaheloa ke maqhubu, empa eena o ne a robetse. 25Barutuoa ba atamela, ba mo tsosa, ba re: “Morena, re pholose, rea timela!”
26A re ho bona: “Le boi ke'ng, lōna ba tumelo e fokolang?” A tsoha, a khalemela meea le letša, 'me ha khutsa tu!
27Joale batho bao ba hlolloa, ba re: “Eo ke ea joang, ha e le moo a mameloa le ke meea le letša?”
Pholiso ea Bagadara ba nang le bademona
28Hoba Jesu a tšelele mose oane, fatšeng la Bagadara, a khahlanyetsoa ke banna ba babeli ba nang le bademona, ba e-tsoa mabitleng, ba le bohale bo tšabehang; hoo ho neng ho se ea sebete ho feta ka tsela eo. 29Ba ne ba hōoa, ba re: “U re kene ka'ng, Mora oa Molimo? Na u tlile koano ho re hlōkōfatsa pele ho nako?” 30Sebakana le bona ho ne ho fula mohlapehali oa likolobe. 31Bademona ba rapela Jesu, ba re: “Ha u re leleka mona, u mpe u re rōmele mohlapeng oane oa likolobe.”
32A re ho bona: “E-eang!” Ba tsoa, ba kena likolobeng, 'me mohlape kaofela oa tsubella selomong, oa itihela letšeng, oa shoela metsing.
33Balisa ba tsona ba baleha, ba ea beha taba tsohle motseng, le tsa ba neng ba e-na le bademona. 34Eaba bohle ba motse ba tsoa ho ea khahlanyetsa Jesu, 'me ha ba 'mona ba mo rapela hore a tsoe naheng ea bona.
