Jesu o isoa ho Pilato
1E sa le kameso, hoba baprista ba baholo ba rerisane le baholo, le Litsebi tsa Molao, le lekhotla lohle, ba tlama Jesu, ba mo khanna, ba mo neela Pilato.
2Pilato a 'motsa, a re: “Na u khosi ea Bajuda?”
Eena a mo araba, a re: “Uena u rialo.”
3Baprista ba baholo ba mo qosa ka tse ngata. 4Pilato a boela a 'motsa, a re: “Na ha u arabe letho? Bona kamoo ba u qōsang ka tse ngata kateng.”
5Empa Jesu a se ke a hlola a araba letho, hoo Pilato a bileng a makala.
Jesu o ahlōleloa lefu
6Ka mokete Pilato o ne a tloaetse ho ba lokollela motlamuoa e mong, eo ba mo kōpang. 7Joale ho ne ho le teng ea bitsoang Barabase, ea neng a tšoeroe 'moho le ba neng ba fetohetse 'muso, ba bile ba bolaile motho nakong ea moferefere oo. 8Letšoele la nyolohela ha Pilato, 'me la qala ho kōpa ho etsetsoa joalokaha a ne a ee a le etsetse.
9Pilato a araba, a re: “Na le rata ha ke le lokollela khosi ea Bajuda?” 10O ne a tseba hore baprista ba baholo ba neelane ka Jesu ka baka la mōna. 11Empa baprista ba baholo ba susumetsa letšoele ho kōpa hore a mpe a ba lokollele Barabase.
12Pilato a boela a re ho bona: “Joale ke etse joang ka eo le 'mitsang khosi ea Bajuda?”
13Empa bona ba boela ba hōoa, ba re: “Mo thakhise!”
14Pilato a re ho bona: “Empa o entse bobe bofe?”
Ba eketsa ho hōoa, ba re: “Mo thakhise!”
15Pilato, ka ho lakatsa ho khotsofatsa letšoele, a ba lokollela Barabase, 'me hoba a laele hore Jesu a shapuoe, a neelana ka eena hore a thakhisoe.
Bahlabani ba soma Jesu
16Eaba bahlabani ba isa Jesu kahare, lebaleng la ntlo ea bobusisi, 'me ba bitsa lebōtho lohle. 17Ba mo apesa seaparo se sefubelu, ba lōha mofapahlooho oa meutloa, ba mo roesa oona. 18Ba qala ho mo lumelisa, ba re: “Ahe! Khosi ea Bajuda!” 19Ba 'mata hloohong ka leqala, ba mo tšoela ka mathe, ba kōqama ka mangoele sa mokana ba mo khumamela. 20Ha ba se ba mo somile, ba mo hlobolisa seaparo se sefubelu, ba mo apesa liaparo tsa hae, 'me ba mo khannela kantle hore ba tle ba e'o mo thakhisa.
Jesu oa thakhisoa
21Eaba Simone oa Sirene, ntat'a Alekesandere le Rufase, o feta a e-tsoa naheng, 'me bahlabani ba mo qobella ho jara sefapano sa Jesu. 22Ba mo isa sebakeng se bitsoang Gologotha, e leng ho bolela Sebaka sa Lehata. 23Ba mo fa veine e tsoakiloeng ka 'mira, empa eena a e hana. 24Ba mo thakhisa,
'me ba arolelana liaparo tsa hae
ba li arolelana ka lōtho
ho bona hore na mang
o tla nka eng ho tsona.
25E ne e ka ba hora ea borobong, hoseng, ha ba mo thakhisa. 26Lengolo le bolelang molato oa hae le ne le ngotsoe tjena: khosi ea bajuda. 27Linokoane tse peli tsa thakhisoa le eena, se seng ka letsohong le letona, se seng ka ho le letšehali. 28Ha ba ha phethahala Mangolo a reng: “O baleletsoe le ba khopo.” 29Ba fetang ka tsela ba mo nyefola, ba ntse ba sisinya lihlooho, ba re: “Aha! Uena ea qhaqhang Tempele, 'me u e tsose ka matsatsi a mararo, 30ipholose he, ka ho theoha sefapanong!”
31Ka mokhoa o joalo le baprista ba baholo, le Litsebi tsa Molao ba ne ba buisana, ba mo soma, ba re: “O pholositse ba bang, empa eena o sitoa ho ipholosa! 32Kreste, khosi ea Iseraele, ha a ke a theohe sefapanong joale, e le hore re bone, 'me re lumele!” Le bona ba thakhisitsoeng le eena ba mo hlapaola.
Lefu la Jesu
33Ka hora ea leshome le metso e 'meli, lefifi la aparela lefatše lohle ho fihlela ka hora ea boraro. 34Eaba ka hora ea boraro Jesu o meketsa ka lentsoe le phahameng, o re: “Eloi, Eloi, lema sabakthani?” e leng ho re: “Molimo oa ka, Molimo oa ka, u ntahletse'ng na?”
35Ba bang ba neng ba eme moo, ha ba mo utloa, ba re: “Utloang, o bitsa Elia!”
36E mong oa bona a phakisa a matha, a ina semonyametsi aseneng, a se hloma leqaleng, 'me a mo nea hore a noe, a re: “Lesang, re ke re bone hore na Elia o tla mo fanyolla.”
37Jesu a meketsa ka lentsoe le phahameng, a neela moea.
38Eaba lesira la Tempele le taboha ka lehare, ho tloha holimo ho isa tlase. 39Molaoli oa ba lekholo ea emeng malebana le Jesu, ha a bona kamoo a neetseng moea kateng, a re: “Kannete motho enoa e ne e le Mora oa Molimo.”
40Le basali ba ne ba le teng, ba talimile ba le thōkoana; har'a bona ho e-na le Maria oa Magadala, Maria 'm'a Jakobo e monyenyane, le Joseta, le Salome, 41ba neng ba latela Jesu ba ntse ba mo sebeletsa ha a le Galelea, le basali ba bang ba bangata ba neng ba nyolohetse le eena Jerusalema.
Kepelo ea Jesu
42Ha e se e le mantsiboea, kaha e ne e le letsatsi la Tlhekelo, ke hore le etellang Sabatha pele, 43ha tla Josefa oa Arimathea, setho se hlomphehang sa lekhotla, eo le eena a neng a lebeletse 'Muso oa Molimo, a beta pelo, a kena ha Pilato, a kōpa setōpō sa Jesu. 44Pilato a makala ha a utloa hore o se a shoele, a ba a bitsa molaoli oa ba lekholo, 'me a 'motsa hore na o se a hlile a shoele. 45Hoba a utloe ka molaoli, a lokollela Josefa setōpō. 46Eare hoba a reke lesela, a fanyolla setōpō, a nt'o se phuthela ka lesela leo, a se bea lebitleng le betliloeng lefikeng, a phikolosetsa lejoe monyakong oa lebitla. 47Maria oa Magadala le Maria 'm'a Joseta ba ne ba shebeletse, 'me ba bona moo a beoang teng.
