Motho ea shoeleng letsoho
1Jesu a boela a kena ka tlung ea thapelo. Motho ea shoeleng letsoho o n'a le teng moo. 2Batho ba mo tlisa, ho bona hore na o tla mo folisa ka Sabatha, ba tle ba mo qose. 3A re ho motho ea shoeleng letsoho: “Tloo, u eme mona!”
4Eaba o re ho bona: “Na hoa lumelleha ho etsa botle kapa bobe ka Sabatha, ho pholosa motho kapa ho 'molaea?” Empa ba khutsa.
5A ba ea ka mahlo a halefile, a utloisitsoe bohlōkō ke bothata ba lipelo tsa bona, a re ho motho eo: “Otlolla letsoho!” A le otlolla, 'me letsoho la hae la fola. 6Bafarisi ba tsoa, 'me hang-hang ba rera le balateli ba Heroda kamoo ba ka bolaeang Jesu kateng.
Letšoele lebōpong la letša
7Jesu a ea letšeng le barutuoa ba hae, 'me letšoelehali le tsoang Galelea le Judea la mo latela; 8le le tsoang Jerusalema, le Idumea, le mose ho Jorodane, le libakeng tsa Tire le Sidone, ha le utloa tsohle tseo a li etsang, la tla ho eena. 9Ka baka la letšoele a laela barutuoa ba hae hore sekepe se be haufi le eena, esere mohlomong la mo petetsa, 10hobane o ne a folisitse ba bangata hoo bohle ba nang le mafu ba ileng ba mo khōbōkanela hore ba mo ame. 11Le meea e litšila ha e 'mona e ne e itihela kapele ho eena, e hōoe haholo, e re: “U Mora oa Molimo!”
12Empa a e laea ka thata hore e se ke ea etsa hore a tsejoe.
Jesu o khetha ba leshome le metso e 'meli
13Jesu a nyolohela thabeng, a bitsa bao a ba batlang, 'me ba tla ho eena. 14A hlomamisa ba leshome le metso e 'meli bao a ileng a ba bitsa baapostola hore ba be le eena, a tle a ba rōme ho ruta, 15'me ba be le matla a ho leleka bademona.
16A hlomamisa ba leshome le metso e 'meli, e leng: Simone eo a ileng a mo rea lebitso la Petrose, 17le Jakobo mora oa Sebedea, le Johanne ngoan'abo Jakobo, bao a ileng a ba rea lebitso la Boaneregese, e leng ho re: Bara ba Letōlō, 18le Andrease, le Filipi, le Baretholome, le Matheu, le Thomase, le Jakobo, mora oa Alefiose, le Thadaose, le Simone Mochesehi, 19le Judase Isekariota, ea bileng a èka Jesu.
Jesu le Beele-Sebule
20Jesu a kena ka tlung, 'me letšoele la boela la ba bōkanela hoo ba bileng ba sitoa le ho ja. 21Ha ba habo ba utloa hona, ba ea ho ea mo tšoara, hobane ba ne ba re ha a sa nka kantle.
22Litsebi tsa Molao tse neng li e-tsoa Jerusalema, tsa re: “O na le Beele-Sebule, 'me o leleka bademona ka matla a morena oa bademona!”
23Eaba o ba bitsetsa ho eena, 'me a re ho bona ka litšoantšo: “Satane a ka leleka Satane joang? 24Haeba 'muso o ikarola ho itoantša, 'muso oo o ke ke oa tiea. 25Haeba lelapa le ikarola ho itoantša, lelapa leo le ke ke la tiea. 26Haeba Satane a itsohela matla ho itoantša, 'me a ikarotse, a ke ke a tiea, 'me hoo ke ho fela ha hae.
27“Empa ha ho motho ea ka kenang ka tlung ea seqhobane a hapa thepa ea sona, haeba a sa tlama seqhobane seo pele, e be hona a hapang thepa eohle ea ntlo.
28“Kannete ke le bolella hore bana ba batho ba tla tšoareloa libe tsohle le linyefolo tsohle tseo ba li buang, 29empa mang kapa mang ea nyefolang Moea o Halalelang a ke ke a tšoareloa ho isa khale; o molato oa sebe se sa feleng,” 30hobane ba ne ba itse: “O na le moea o litšila.”
Bana babo Jesu le 'm'ae
31Eaba 'm'a Jesu le bana babo Jesu baa fihla; ba ema kantle, ba mo laetsa hore a tle ho bona. 32Letšoele le ne le mo pota-potile, 'me la re ho eena: “'M'ao le bana beno ke bana ba teng kantle, baa u batla.”
33A araba, a re: “'Mè ke mang? Bana beso ke bo-mang?”
34Ba mo etselitseng sakana-la-nkope a ba ea ka mahlo, a re: “'Mè le bana beso ke bana! 35Mang kapa mang ea etsang thato ea Molimo ke eena eo e leng ngoan'eso, le khaitseli, le 'mè.”
