Jesu o fepa ba kete tse 'ne
1Matsatsing ao, ha letšoelehali le boetse le phuthehile, le se na seo le ka se jang, Jesu a bitsa barutuoa ba hae, a re ho bona: 2“Ke utloela batho bana bohlōkō, hobane ba se ba bile le 'na matsatsi a mararo, 'me ha ba na letho leo ba ka le jang. 3Haeba ke ba qhala ho ea hae ba lapile, ba ka felloa ke matla tseleng; ebile ba bang ba bona ba tsoa hōle.”
4Barutuoa ba hae ba mo araba, ba re: “Ke hokae moo motho a ka fumanelang batho baa bohobe bo ka ba khōrisang moo feelleng?”
5A ba botsa, a re: “Le na le linkhoa tse kae?”
Ba re: “Tse supileng.”
6Eaba o laela batho hore ba lule fatše; a nka linkhoa tse supileng, a leboha, a nt'o li ngoatha, a nea barutuoa ba hae hore ba ba abele, eaba ba abela letšoele. 7Ba ne ba e-na le litlhatsoana tse seng kae; eare hoba a li hlohonolofatse, a re le tsona tseo li ajoe. 8Batho ba e-ja, ba khōra, eaba ho bōkelloa makumane a setseng; a etsa lirōtō tse supileng. 9Ba ne ba ka ba likete tse 'ne. Eaba Jesu oa ba lokolla. 10Eare hoba a kene ka sekepeng le barutuoa ba hae, a ea naheng ea Dalamanutha.
Bafarisi ba batla sesupo
11Bafarisi ba tla, ba qala ho phea khang le eena, 'me ka ho mo leka, ba batla hore a ba bontše sesupo se tsoang leholimong. 12Jesu a sisimoloha moeeng, a re: “Molōko ona o batlela'ng sesupo? Kannete kea le bolella, molōko ona ha o ka ke oa neoa sesupo!”
13A tloha ho bona, a boela a kena ka sekepeng, a tšelela mose oane.
Tomōso ea Bafarisi le Heroda
14Barutuoa ba ne ba lebetse ho inkela bohobe, 'me ba se na letho ka sekepeng haese senkhoa se le seng. 15Jesu a ba laela, a re: “E-bang seli, le hlokomele tomōso ea Bafarisi le tomōso ea Heroda!”
16Ba buisana ba le bang, ba re: “Ke kahobane ha rea tla le bohobe.”
17Ha a lemoha a re ho bona: “Ke'ng ha le buisana, le re: Ke kahobane ha lea tla le bohobe? Na ha le e-s'o elelloe leha e le ho utloisisa? Na pelo tsa lōna li sa thatafetse? 18Le na le mahlo; na ha le bone? Le na le litsebe; na ha le utloe? Na ha le sa hopola. 19hore ha ke ne ke ngoathela ba kete tse hlano linkhoa tse hlano, na le ne le bōkelle lirōtō tse kae tse tletseng makumane?”
Ba re ho eena: “Tse leshome le metso e 'meli.”
20“Ha ke ngoathela ba kete tse 'ne linkhoa tse supileng, le ne le bōkelle lirōtō tse kae tse tletseng makumane?”
Ba re ho eena: “Tse supileng.”
21A re ho bona: “Na ha le e-s'o utloisise?”
Pholiso ea sefofu motseng oa Bethesaida
22Ba fihla Bethesaida. Batho ba tlisa sefofu ho Jesu, 'me ba mo rapela hore a se ame. 23A tšoara sefofu ka letsoho, a se isa kantle ho motse; a tšoela mathe mahlong a sona, a se bea matsoho, a se botsa, a re: “Na ho na le seo u se bonang?”
24Sa talima, 'me sa re: “Ke bona batho, ba tsamaea e ka lifate.”
25A boela a bea matsoho mahlong a sona, 'me sa bona hantle sa fola, sa bona tsohle ka mokhoa o hlakileng esitana le hōle. 26Jesu a se rōmela habo sona, a re: “U se ke ua kena motseng, ua bolella motho.”
Petrose o bolela hore Jesu ke mang
27Jesu le barutuoa ba hae ba ea metsaneng e mathōkong a Sesaria ea Filipi. Tseleng, a botsa barutuoa ba hae, a re ho bona: “Batho ba re ke mang?”
28Ba mo araba, ba re: “Johanne Mokolobetsi; ba bang ba re Elia, empa ba bang ba re e mong oa baporofeta.”
29A ba botsa, a re: “Empa lōna le re 'na ke mang?”
Petrose a re ho eena: “U Kreste.”
30A ba laea hore ba se ke ba bolella motho ka eena.
Jesu o porofeta lefu le tsoho ea hae
31Jesu a qala ho ba ruta hore eka khona Mor'a Motho a hlōkōfatsoe haholo, a lahloe ke baholo, baprista ba baholo, le Litsebi tsa Molao, a bolaoe, 'me kamora' matsatsi a mararo a tsohe bafung. 32A bolela taba eo pepenene. Petrose a mo nkela kathōko, a qala ho mo khalemela.
33Jesu ha a reteleha, 'me a bona barutuoa ba hae, a khalemela Petrose, a re: “Tloha kapele ho 'na, Satane, hobane ha u hopole tsa Molimo, u hopola tsa botho!”
34A bitsa letšoele le barutuoa ba hae, a re ho bona: “Haeba motho a rata ho ntatela, a itele, a jare sefapano sa hae, 'me a ntatele. 35Mang le mang ea ratang ho pholosa bophelo ba hae, bo tla mo lahlehela, empa mang le mang ea lahleheloang ke bophelo ba hae ka baka la ka, le ka baka la molaetsa o molemo, o tla bo pholosa. 36Ebe motho a ka boelloa ke eng, haeba a ka rua lefatše lohle, empa a senyeheloa ke bophelo ba hae? 37Kapa motho a ka rekanya bophelo ba hae ka eng? 38Mang le mang ea tla hlajoa ke lihlong ka baka la ka, le ka baka la lipolelo tsa ka, molōkong ona oa bakoenehi, oa baetsalibe, le Mor'a Motho o tla hlajoa ke lihlong ka baka la hae ha a e-tla ka tlōtla ea Ntat'ae, a e-na le mangeloi a halalelang.”
