NEHEMIA 12

₁Bana ke baprista le Balevi ba ileng ba khutla le Serubabele, mora oa Shealetiele, le Jeshua: Seraea, le Jeremia, le Esera, ₂le Amariea, le Malōke, le Hatushe, ₃le Shekaniea, le Rehume, le Meremote, ₄le Ido, le Ginetone, le Abiea, ₅le Miamine, le Maadeea, le Bilega, ₆le Shemaea, le Joearibe, le Jedaea, ₇le Salō, le Amoke, le Hilekiea, le Jedaea. Bana e ne e le lihlooho tsa baprista, le tsa bana babo bona, mehleng ea Jeshua.

₈Balevi e ne e le Jeshua, le Binui, le Kademiele, le Sherebiea, le Juda. Bo-Mataneea le bana babo e ne e le bona ba tsamaisang lifela tsa teboho. ₉Bakabukiea le Uni, le bana babo bona, bona ba ne ba bina ba tobane le bo-Mataneea.

₁₀Jeshua a tsoala Joeakime, Joeakime a tsoala Eleashibe, Eleashibe a tsoala Joeada, ₁₁Joeada a tsoala Jonathane, Jonathane a tsoala Jadua.

₁₂Mehleng ea Joeakime ho ne ho e-na le baprista, e leng lihlooho tsa malapa a bo-ntat'a bona. Lelapeng la Seraea e ne e le Meraea, ho la Jeremia e le Hananiea, ₁₃ho la Esera e le Meshulame, ho la Amariea e le Jehohanane, ₁₄ho la Meleku e le Jonathane, ho la Shebaniea e le Josefa, ₁₅ho la Harime e le Adena, ho la Meraote e le Helekai, ₁₆ho la Ido e le Sekariea, ho la Ginetone e le Meshulame, ₁₇ho la Abiea e le Sikeri, ho la Minieamine ea tsoang Moadiea e le Piletai, ₁₈ho la Bilega e le Shamua, ho la Shemaea e le Jehonathane, ₁₉ho la Joearibe e le Matenai, ho la Jedaea e le Usi, ₂₀ho la Salai e le Kalai, ho la Amoke e le Ebere, ₂₁ho la Hilekiea e le Hashabiea, ho la Jedaea e le Netanele.

₂₂Mehleng ea bo-Eleashibe, le Joeada, le Johanane, le Jadua, ha ngoloa lenane la lihlooho tsa malapa a Balevi le a baprista, ho ea fihla mehleng ea puso ea Dariuse oa Peresiea.

₂₃Bara ba Balevi, e leng lihlooho tsa malapa a bo-ntat'a bona, ba ngoloa Bukeng ea Liketsahalo, ho fihlela le mehleng ea Johanane, mora oa Eleashibe.

₂₄Lihlooho tsa Balevi e ne e le bo-Hashabiea, le Sherebiea, le Jeshua, mora oa Kademiele, le bana babo bona, ba neng ba ema ba tobane le bona, ba rorisa, ba leboha Molimo, ho ea ka taelo ea Davida, mohlanka oa Molimo, 'me ba neeletsana ha ba bina.

₂₅Bo-Mataneea, le Bakabukiea, le Obadiea, le Meshulame, le Talamone, le Akube, e ne e le balebeli ba menyako, ba lebelang matlo a pōlōkelo a pel'a menyako. ₂₆Tsena li etsahetse mehleng ea Joeakime, mora oa Jeshua, setlōhōlō sa Josadake, ha Nehemia e ne e le 'musisi, Esera e le moprista le Setsebi sa Molao.

₂₇Ha ho khakoloa lerako la Jerusalema, Balevi ba ile ba latoa libakeng tsohle tseo ba neng ba phela ho tsona, ba tlisoa Jerusalema, ho tla keteka mokete ona ka thabo, le ka teboho, le ka ho bina ka matlheretlhere, le ka likatara, le ka liharepa. ₂₈Libini le tsona tsa latoa libakeng tse pota-potileng Jerusalema, le metsaneng ea Banetofa; ₂₉tsa latoa le Bete-Gilegale, le libakeng tse pota-potileng Geba, le Asemafete, hobane libini li ne li ikhahetse metse ho pota-pota Jerusalema.

₃₀Baprista le Balevi ba itlhoekisa pele, ba nt'o hloekisa sechaba, le menyako, le lerako. ₃₁Joale 'na, Nehemia, ka hloesetsa mahosana a Juda holim'a lerako, ka khetha lihlopha tse peli tse kholo tsa libini ho leboha. Sehlopha se seng sa ea ka letsohong le letona la lerako, ho ea nq'a Monyako oa Thōtōbōlō. ₃₂Sehlopha seo sa lateloa ke Hoshaea le karolo e 'ngoe ea mahosana a Juda, ₃₃le Asariea, le Esera, le Meshulame, ₃₄le Juda, le Benjamine, le Shemaea, le Jeremia, ₃₅le baprista ba bang ba letsang literompeta, e leng Sekariea, mora oa Jonathane, Jonathane ea tsoetsoeng ke Shemaea, Shemaea ea tsoetsoeng ke Mataneea, Mataneea ea tsoetsoeng ke 'Mikiea, 'Mikiea ea tsoetsoeng ke Sakure, Sakure ea tsoetsoeng ke Asafo, ₃₆le bana babo, bo-Shemaea, le Asariele, le Milalai, le Gilalai, le Maai, le Netanele, le Juda, le Hanani, ba letsa liletsa tsa Davida, mohlanka oa Molimo. Ba ne ba eteletsoe pele ke Esera eo e neng e le Setsebi sa Molao. ₃₇Ha ba fihla Monyako oa Seliba, o neng o le malebana le bona, ba nyoloha ka mehato ea motse oa Davida, moepeng o nyolohelang lerakong, kaholimo ho ntlo ea Davida, ho ea fihla Monyakong oa Metsi.

₃₈Sehlopha se seng sa libini tse etsang liteboho sa leba ka letsohong le letšehali. 'Na, Nehemia, ka se sala morao, ke e-na le karolo e 'ngoe ea sechaba e neng e le holim'a lerako, ka nq'ane ho Tora ea Libōpi, ho ea fihla Lerakong le Sephara, ₃₉le kaholim'a Monyako oa Efraime, le kaholimo ho Monyako oa Khale, le kaholim'a Monyako oa Litlhapi, le Tora ea Hananele, le Tora ea Mea, ho ea fihla Monyakong oa Linku. Batho bana ba fihla ba ema Monyakong oa Chankana.

₄₀Lihlopha tsena tse peli tsa libini tse etsang liteboho, tsa ema ka Tempeleng ea Molimo, hammoho le 'na, le karolo e 'ngoe ea babusi.

₄₁Baprista bo-Eliakime, le Maasiea, le Minieamine, le 'Mikiea, le Eleunai, le Sekariea, le Hananiea, ba ne ba letsa literompeta, ₄₂ba e-na le bo-Maasiea, le Shemaea, le Eleasare, le Usi, le Jehohanane, le Malakiea, le Elame, le Esere. Libini tse neng li tsamaisoa ke Jiserahiea tsa bina haholo. ₄₃Ka lona letsatsi lena Baiseraele ba etsa mahlabelo a mangata, ba thaba, hobane Molimo o ne a ba thabisitse haholo. Basali, hammoho le bana, le bona ba thaba, hoo litlatse tsa thabo ea Jerusalema li ileng tsa ea utloahala hōle!

₄₄Ka eona nako eo, ha khethoa baokameli ba matlo a pōlōkelo ea matlotlo, le a pōlōkelo ea linyehelo, le a pōlōkelo ea lilopotsiea, le a pōlōkelo ea karolo e le 'ngoe ea ntho e 'ngoe le e 'ngoe eo ho fanoeng ka eona ho tse leshome. Masimong a pel'a metse ba ne ba bōkella liabo tseo Molao o reng e be tsa baprista le Balevi, hobane ba morabe oa Juda ba ne ba thabetse baprista le Balevi ba neng ba sebeletsa. ₄₅Ba phetha mosebetsi oa Molimo oa bona le mosebetsi oa ho hloekisa. Libini le balebeli ba menyako le bona ba ne ba etsa joalo, ho ea ka taelo ea Davida le ea Solomone mora oa hae. ₄₆Khale, mehleng ea Davida, le ea Asafo, ho ne ho ntse ho e-na le batsamaisi ba libini tse binang lipina tse rorisang, le tse lebohang Molimo. ₄₇Le mehleng ea Serubabele, le mehleng ea Nehemia, ka tsatsi le leng le le leng, Baiseraele bohle ba 'na ba ntšetsa libini le balebeli ba menyako liabo tsa bona. Ba ntšetsa Balevi liabo tsa bona, 'me Balevi le bona ba ba ba ntšetsa litlōhōlō tsa Arone liabo tsa tsona.