NEHEMIA 9

“Emang, le boke Morena

Molimo oa lōna,

ea hlolang kamehla eohle!

Lebitso la hao le tlōtlehang

le bokoe,

le fetang lipoko tsohle

le lithoko tsohle!

₆“Oho, Morena, ke uena u inotši,

ea entseng maholimo,

le maholimo a maholimo,

le linaleli, le lefatše

le tsohle tse ho lona,

le maoatle,

le tsohle tse ka ho 'ona;

tsohle u babaletse

bophelo ba tsona.

Mabōtho a leholimo

aa u khumamela.

₇Ke uena Morena Molimo

ea neng a khethe Aborame,

ua mo ntša naheng ea Ure,

Ure ea Bakalatiea,

ua mo rea lebitso la Aborahama.

₈Ua fumana a tšepahala ho uena,

eaba u etsa selekane le eena;

ua mo tšepisa naha

ea Bakanana, le ea Bahete,

ea Baamore, le Baperise,

le Bajebuse, le Bagirigashe;

ua e tšepisa

le litlōhōlō tsa hae;

joale u phethile tšepiso ea hao,

hobane uena u lokile.

₉“U bone matšoenyeho

a bo-ntat'a rōna, Egepeta,

ua utloa sello sa bona

Leoatleng le Lefubelu.

₁₀Ua etsetsa Faro lipontšo

le limakatso,

ua li etsetsa bahlanka ba hae,

ua li etsetsa le chaba sohle

sa naha ea hae;

hobane u n'u tseba

boikalatiso ba bona,

kamoo ba ikalatisetsang

bona kateng.

Bitso la hao la tuma,

joalokaha le tumile kajeno.

₁₁Ua phatlola leoatle

kapele ho bona,

ba tšela leoatle

mobung o ommeng;

baphalalisi ba bona

ua ba akhela bolibeng,

joaloka lejoe ha le akheloa

metsing a bilohang.

₁₂Motšeare ua ba etella pele

ka leru le lōpaletseng,

bosiu ka khanare e lōpaletseng,

ho ba bonesetsa tsela

leetong la bona.

₁₃Ua ba ua theohela

holim'a Thab'a Sinai,

ua bua le bona

u theoha leholimong;

ua ba nea kahlōlo tse lokileng

le melao ea 'nete,

temoso tse lokileng

le tsona litaelo.

₁₄Ua ba ruta Sabatha

se halalelang sa hao,

ka mohlanka oa hao Moshe

ua ba beela melao,

le litaelo, le likahlōlo.

₁₅“Ua ba fepa

ka bohobe ba leholimo

ha ba lapile,

ua ba fa metsi

a tsoang lefikeng

ha ba nyoriloe,

ua ba laela hore ba kene,

ba ikhapele naha

eo u neng u hlapanye

hore u tla ba nea eona.

₁₆Empa bona, le bo-ntat'a rōna

ba ikakasa, ba ba manganga,

ba se ke ba mamela melao ea hao.

₁₇Ba hana ho mamela,

ba lebala ketso tsa hao,

limakatso tsa hao,

tse entsoeng har'a bona;

ba se ke ba li natsa,

ba ba manganga,

ba u fetohela,

ba ikhethela moetapele,

hore a ba busetse

bokhobeng ba bona.

Empa u Molimo

ea tšoarelang kamehla,

u lereko, u mohau,

u lieha ho halefa,

u bile u lerato,

'me ha ua k'a ba furalla.

₁₈Ba iketsetsa setšoantšo

sa namane, ba re:

‘Ke ona molimo

o re ntšitseng Egepeta!’

Kahoo ba etsa nyefōlo e kholo!

₁₉Empa ha ua k'a ba furalla

lehoatateng,

hobane mohau oa hao

o moholo haholo

motšeare leru le lōpaletseng

ha lea ka la nyamela,

la 'na la ba etella pele

tseleng ea bona;

bosiu khanare e lōpaletseng

ha ea ka ea fifala,

ea 'na ea ba bonesetsa

ha ba ntse ba tsamaea.

₂₀Ua ba romela Moea oa hao

o molemo ho ba ruta,

ua se ke ua ba tima manna a hao,

ua ba fa metsi ho tlosa lenyora.

₂₁Ka lemo tse mashome a mane,

lehoatateng, ua ba fepa,

ba se ke ba hloka letho;

aparo tsa bona tsa se ke tsa taboha,

maoto a bona a se ke a ruruha.

₂₂“Ua ba nea mebuso le balichaba,

ua ba abela libaka tsa bona;

ba ikhapela naha ea Sihone,

le ea khosi ea Heshebone,

ba hapa le naha ea Oge,

khosi ea Bashane.

₂₃Ua anafatsa bana ba bona

sa naleli tsa leholimo.

Ua ba fihlisa naheng

e tšepisitsoeng bo-ntat'a bona,

hore ba kene ho eona,

ba ikhapele eona.

₂₄Bana bao ba kena,

ba ikhapela naha;

ua kokobetsa Bakanana,

baahi ba pele ba naha,

ua neelana ka bona

matsohong a Baiseraele,

hore ka khosi tsa bona

ho etsoe borata,

le ka baahi ba tsona.

₂₅Ba hapa liqhobosheane

le naha e manoni,

ba hapa le matlo

a tletseng mefuta eohle ea thepa;

liliba tse chekiloeng,

masimo a morara le a mohloaare,

le fate tsa tholoana

tse ke ke be tsa baloa.

Ba e-ja, ba khora, 'me ba atleha,

ba atleha, ba phela ka boiketlo,

tse molemo tsa hao tsa

ba thabisa.

₂₆“Leha ho le joalo,

ba se ke ba u mamela,

ba se ke ba u mamela, ba u fetohela,

Molao oa hao ba o siea morao;

baporofeta ba hao

bona ba ba bolaea,

ha ba ba khalemella

ho ba busetsa ho uena;

kahoo ba etsa nyefōlo e kholo!

₂₇Ua ba neela lira tsa bona

ho ba tuba,

tlokotsing tsa bona

ba ipiletsa ho uena,

'me ua ba utloa

u le holimong la hao.

Ka baka la mehauhelo

ea hao e mengata,

ua ba nea bapholosi,

ba ba lopolla ho lira tsa bona.

₂₈Ha ba se ba phomotse

ba etsa bokhopo mahlong a hao,

ua ba tlohella lira tsa bona

tsa ba busa;

ba boela ba khutlela ho uena,

ba ipiletsa,

uena ua ba utloa

u le holimong la hao,

ka makhetlo ua ba lopolla,

ho ea ka mehauhelo ea hao.

₂₉Ua ba khalemela

hore ba khutlele Molaong oa hao,

empa ba ikakasa,

ba se ke ba mamela Molao oa hao.

Ba tlōla taelo tsa hao,

taelo tse phelisang ba li phethang

ba u fetohela, ba ba manganga,

ba ba ba se ke ba u mamela.

₃₀Ka lilemo-lemo ua ba mamella,

ua iphapanya,

ua ba khalema

ka baporofeta ba hao,

ka baporofeta

ba susumetsoa ke Moea oa hao,

empa tsèbè tsa bona

tsa se ke tsa sekèha,

eaba u neelana ka bona

ho baahi ba naha tseo.

₃₁Empa ka baka la mehauhelo

e meholo ea hao,

ha ua k'a ba timetsa

le ho ba furalla,

hobane u Molimo ea lereko,

ea mohau.

₃₂“Joale, ka baka lena,

uena Molimo oa rōna,

Molimo e moholo,

ea matla, Ramatšabeho,

ea bōlōkang selekane sa hae,

ea hauhelang,

tsietsi tsohle tse re hlahetseng

u se k'a li bebōla:

Tse hlahetseng khosi tsa rōna

le mahosana a rōna,

baprista ba rōna

le baporofeta ba rōna,

bo-ntat'a rōna

le chaba sena sa hao sohle,

ho tloha mehleng

ea likhosi tsa Asure,

ho fihlela le kajeno-ea-bokajeno!

₃₃Ho tsohle tse re hlahetseng

u sebelitse ka tōka,

u tšepahetse haholo,

rōna re entse bokhopo.

₃₄Khosi tsa rōna le mahosana a rōna,

baprista ba rōna

le bo-ntat'a rōna,

bohle ha baa bōlōka

Molao oa hao,

kapa ba mamela litaelo tsa hao,

le likhalemelo

tseo u ba etselitseng tsona.

₃₅Leha ba ne ba busoa

ke khosi tsa bona,

ba iketlile,

ba e-ja pōqō-ka-hlanaka,

naheng e batsi, e manoni,

eo u ba fileng eona,

ha baa ka ba u sebeletsa,

ha baa ka ba furalla

makhopo a bona.

₃₆Kajeno re makhoba

naheng ea bo-ntat'a rōna,

naha eo u neng u ba abele eona,

hore ba je tholoana tsa eona

le menono ea eona;

joale ke mona re makhoba ho eona!

₃₇Menono e mengata ea naha eo

e jeoa ke likhosi

tseo u li beileng holim'a rōna,

ua li bea ka baka la libe tsa rōna;

li re busa,

le makhomo a rōna

li iketsetsa borata,

'me rōna re phela

kahar'a tlokotsi tse kholo!”