LIPALO 13

₁Morena a bua ho Moshe, a re:

₂“Rōmela banna ho ea hloela naha ea Kanana, eo ke e neang bana ba Iseraele. Morabeng o mong le o mong oa bo-ntat'a bona u rōmele monna a le mong; e mong le e mong oa bona e be khosana.”

₃Moshe a rōmela banna bao ho tloha lehoatateng la Parane, ka taelo ea Morena. Banna bao bohle e ne e le mahosana a bana ba Iseraele. ₄Mabitso a bona ke ana: Morabeng oa Rubene e ne e le Shamua, mora oa Sakure; ₅morabeng oa Simeone e le Shafate, mora oa Hori; ₆morabeng oa Juda e le Kalebe, mora oa Jefune; ₇morabeng oa Isakare e le Jigale, mora oa Josefa; ₈morabeng oa Efraime e le Joshua, mora oa Nune; ₉morabeng oa Benjamine e le Paleti, mora oa Rafu; ₁₀morabeng oa Sebulone e le Gadiele, mora oa Sodi. ₁₁Morabeng oa Josefa, ke ho re morabeng oa Manase, e le Gadi, mora oa Susi; ₁₂morabeng oa Dane e le Amiele, mora oa Gemale; ₁₃morabeng oa Ashere e le Setore, mora oa Mikaele; ₁₄morabeng oa Nafthali e le Nahabi, mora oa Fofesi; ₁₅morabeng oa Gade e le Geuele, mora oa Maki. ₁₆Ana ke mabitso a banna bao Moshe a ileng a ba rōma ho ea hloela naha. Mora oa Nune, e leng Hoshea, Moshe a mo rea lebitso la Joshua.

₁₇Moshe a ba rōma ho ea hloela naha ea Kanana, 'me a re ho bona: “Nyolohang le mona Negebe, le nyolohele naheng e maralla. ₁₈Le shebe hore na naha e joang, le hore na batho ba ahileng ho eona ba matla kapa baa fokola, le hore na ba bangata kapa ha ba bakae. ₁₉Le shebe le hore na naha eo ba ahileng ho eona e ntle kapa e mpe, le hore na metse eo ba ahileng ho eona e joang; na ke liahelo kapa ke liqhobosheane. ₂₀Le shebe le hore na naha eo e joang; na e nonne kapa ke letsoatlare, le hore na patsi e teng kapa che. Le be sebete, le re tlele le litholoana tsa naha eo.” E ne e le nako ea lilopotsiea tsa morara.

₂₁Banna bao ba nyoloha, ba hloela naha ho tloha lehoatateng la Sine ho ea fihla Rehobe, le ho ea fihla Khorong ea Hamate. ₂₂Ba nyolohela Negebe, ba ea fihla Heborone, moo Ahimane, le Sheshai, le Talamai, bana ba Anake, ba neng ba ahile teng. Heborone e ne e ile ea hahuoa lilemo tse supileng pele Sōoane e Egepeta e hahuoa. ₂₃Ba ea fihla khohlong ea Eshekole, 'me teng ba khaola lekala le nang le lesihla la morara, ba le jara ka thupa e tšoeroeng ka mahlakoreng a mabeli ke banna ba babeli; hape ba tla le likharenate le lifeiee. ₂₄Sebaka seo ba se rea lebitso la khohlo ea Eshekole, ka baka la lekala leo banna ba Iseraele ba ileng ba le khaola moo.

₂₅Kamora' matsatsi a mashome a mane, ba khutla ho tsoa hloela naha eo. ₂₆Ba tsamaea, ba fihla ho Moshe, le ho Arone, le ho sechaba sohle sa bana ba Iseraele, ba neng ba le lehoatateng la Parane e Kadeshe. Ba behela Moshe, le Arone, le sechaba sohle litaba, 'me ba ba bontša le litholoana tsa naha eo. ₂₇Ba bolella Moshe, ba re: “Re ile ra fihla naheng eo u neng u re rōmme ho eona; ruri ke naha e phallang lebese le mahe a linotši, 'me tsena ke litholoana tsa naha eo. ₂₈Leha ho le joalo, batho ba ahileng moo ba matla, 'me metse ea teng e meholo, e na le liqhobosheane; re bile re bone Baanake hona teng. ₂₉Baamaleke ba ahile naheng ea Negebe. Bahete, le Bajebuse, le Baamore, ba ahile lithabeng. Bakanana ba ahile pel'a leoatle, le pel'a nōka ea Jorodane.”

₃₀Joale Kalebe, a le kapele ho Moshe, a re ho sechaba: “Tsie lala! Re tla nyolohela teng habobebe, 'me naha eo e tla ba ea rōna, hobane re tla e hapa.”

₃₁Empa banna ba neng ba ile le eena ba re: “Re tla sitoa ho nyoloha ho ea loantša sechaba seo, hobane se matla ho re feta.” ₃₂Ba bolella bana ba Iseraele litaba tse mpe ka naha eo ba neng ba il'o e hloela, ba re: “Naha eo re neng re il'o e hloela ke naha e matsoatlare. Batho bohle bao re ba boneng ke banna ba liqhobane. ₃₃Naheng eo re bone liqhobane tsena, e leng Baanake ba tsoetsoeng ke liqhobane. Ha re ipapisa le bona re iphumane re le litsienyane, le bona ha ba re talima ba bona re le litsienyane.”