1Bileame a re ho Balake:
“Nkhahele lialetare tse supileng mona, 'me u 'nyehelle ka pohoana tse supileng, le ka lipheleu tse supileng.” 2Balake a etsa joalokaha Bileame a mo kōpile. Balake le Bileame ba nyehela ka pohoana le pheleu holim'a aletare e 'ngoe le e 'ngoe.
3Joale Bileame a re ho Balake: “Ema pel'a nyehelo ea hao ea secheso, 'me ke tla tsamaea, mohlomong Morena o tla tla nkhahlanyetsa. Eng kapa eng eo a mpontšang eona, ke tla u bolella eona.” Bileame a ikela a le inotši holim'a leralla le se nang letho.
Boporofeta ba pele ba Bileame
4Molimo a kopana le Bileame, 'me Bileame a re ho eena: “Ke hlophile lialetare tse supileng, 'me holim'a e 'ngoe le e 'ngoe ke nyehetse ka pohoana le ka pheleu.”
5Morena a bolella Bileame hore na a tle a reng, a nt'o re ho eena: “Khutlela ho Balake, 'me u bue tjena.”
6Bileame a khutlela ho Balake, 'me a mo fumana a ntse a eme pel'a nyehelo ea hae ea secheso, a e-na le mahosana 'ohle a Moabe. 7Bileame a porofeta, a re:
“Balake, khosi ea Moabe,
e tsoang thabeng tsa bochabela,
o ntlisitse koano ke e-tsoa Arame.
‘Tloo u nthōhakele Jakobo!
Tloo u halefele Baiseraele.’
8Nka rōhaka e mong joang,
ea sa rōhakoang ke Molimo?
Nka halefela joang,
eo Molimo a sa mo halefelang?
9E, ka 'mona ke le qhooeng
e holim'a mafika,
ka 'mona ke le holim'a maralla.
Sena ke sechaba
se ahileng se le inotši,
se ke keng sa balelloa
har'a chaba tse ling.
10Ke mang ea ka balang
litlōhōlō tsa Jakobo?
Ke mang ea ka balang
karolo ea bone ea Baiseraele?
A nke ke shoe lefu la ba lokileng!
Pheletso ea ka
e ke e tšoane le ea hae.”
11Balake a re ho Bileame: “U nkentse joang? Ke u bitselitse hore u tl'o rōhaka lira tsa ka, empa joale u bile u li hlohonolofalitse!”
12Bileame a mo arabela, a re: “Na ha ho joalo? Ha kea tšoanela ho bua seo Morena a itseng ke se bue?”
Boporofeta ba bobeli ba Bileame
13Balake a re ho Bileame: “Kea u rapela; a re ke re ee le uena sebakeng se seng hape, moo u tla bona lira tsa ka ha u le hona teng. Ha u ka ke ua li bona kaofela, empa u tla bona karolonyana ea tsona feela. U nthōhakele tsona u le hona moo.” 14A mo isa tšimong ea Sofime, holim'a qhooa ea Pisega. A haha lialetare tse supileng, 'me holim'a e 'ngoe le e 'ngoe a nyehela ka pohoana le pheleu.
15Bileame a re ho Balake: “Ema mona pel'a nyehelo ea hao ea secheso. Ke tla kopana le Morena mose mane.”
16Morena a kopana le Bileame, a 'molella hore na a tle a re'ng, 'me a re: “Khutlela ho Balake, u bue tjena.”
17Bileame a fihla ho Balake, 'me a mo fumana a ntse a eme pel'a nyehelo ea hae ea secheso, a e-na le mahosana 'ohle a Moabe. Balake a botsa Bileame, a re: “Morena o itse'ng?”
18Bileame a boela a porofeta, a re:
“Tsoha Balake, u mamele!
Ntšekehele tsebe, mora oa Sipore.
19Molimo hase motho
hoo a ka buang leshano,
hase mora oa motho
hoo a ka inyatsang.
Na seo a se bolelang
a ke ke a se etsa?
Na seo a se buileng
a ke ke a se phetha?
20Bona, ke laetsoe
hore ke hlohonolofatse;
o hlohonolofalitse,
'me nke ke ka fetola.
21“Ha ho phoso
eo a e boneng ho Jakobo,
ha ho bokhopo
boo a bo boneng ho Iseraele.
Morena Molimo oa hae,
o na le eena,
baa mo thoholetsa,
ba re ke khosi ea bona.
22Molimo ea ba ntšitseng Egepeta,
o matla joaloka nare.
23Ha ho boloi ho Jakobo,
ha ho bonohe ho Iseraele.
Ka nako ea teng ho tla thoe
ho Jakobo le ho Iseraele:
‘Molimo o sebelitse hakaakang!’
24Bona, sechaba se tla tlōla
joaloka tauhali,
le eena o tla tlōla
joaloka tauhali.
E ke ke ea qachama
e e-s'o je phoofolo,
e e-noa le mali a se bolailoeng.”
25Balake a re ho Bileame: “U se ke ua se rōhaka ho hang, kapa ua se hlohonolofatsa ho hang.”
26Bileame a arabela, a re: “Na ha kea ka ka u bolella hore sohle seo Molimo a se bolelang ke tšoanela ho se etsa?”
Boporofeta ba boraro ba Bileame
27Balake a re ho Bileame: “Tloo, kea u rapela: Ke tla u isa sebakeng se seng hape. Mohlomong ho tla thabisa Molimo hore u nthōhakele sona ha u le moo.” 28Balake a isa Bileame qhooeng ea Peore, e okametseng lehoatata.
29Bileame a re ho Balake: “Nkhahele lialetare tse supileng mona, 'me u 'nyehelle ka lipohoana tse supileng, le ka lipheleu tse supileng.” 30Balake a etsa joalokaha Bileame a mo kōpile, 'me a nyehela ka pohoana le ka pheleu holim'a aletare e 'ngoe le e 'ngoe.
