LIPALO 35

₁Morena a bua ho Moshe, ha Moshe a ne a le liphuleng tsa Moabe, pel'a Jorodane, mabapa le Jeriko, a re:

₂“Laela bana ba Iseraele hore lefeng la bona ba abele Balevi metse eo ba tla phela ho eona; le makhulo a pota-potileng metse eo u a abele Balevi.

₃“Metse ena ba tla aha ho eona, 'me makhulo a e pota-potileng e tla ba a likhomo tsa bona, le a maruo 'ohle a bona, le a liphoofolo tsohle tsa bona.

₄“Bonamo ba makhulo a pota-potileng metse, ao u tla a abela Balevi, e be limethara tse makholo a mane le mashome a mahlano ho tloha marakong a motse, ho o pota-pota.

₅“Kathōko ho motse bolelele ba moeli e be limethara tse makholo a robong ka lehlakoreng le ka bochabela, le limethara tse makholo a robong ka lehlakoreng le ka boroa, le limethara tse makholo a robong ka lehlakoreng le ka bophirimela, le limethara tse makholo a robong ka lehlakoreng le ka leboea, motse o be hare. Ana e tla ba 'ona makhulo a metse ena.

₆“Metse eo le tla e abela Balevi e tla ba metse e tšeletseng, eo ho tla ho tla tšabeloa ho eona, eo le e abelang ba bolaileng batho, hore ba balehele ho eona, 'me kantle ho ena u tla ba abela metse e meng e mashome a mane a metso e 'meli. ₇Metse eohle eo u tla e abela Balevi e be mashome a mane a metso e robeli kaofela ha eona; u ba nee eona le makhulo a eona. ₈Ha e le metse ea lefa la bana ba Iseraele, eo u tla e abela Balevi, u tla nka e mengata ho ba leng bangata, u nke e 'maloana ho ba leng 'maloana. Morabe o mong le o mong o tla nea Balevi metse ea oona ho lekana lefa leo o le fumaneng.”

₉Morena a bua ho Moshe, a re: ₁₀“Bua ho bana ba Iseraele, u re ho bona: ‘Ha le tšela Jorodane le fihla naheng ea Kanana, ₁₁le tla ikhethela metse eo le tla tšabela ho eona; moo motho ea bolaileng motho e mong e se ka morero a tla tšabela teng. ₁₂Metse ena e tla ba setšabelo sa lōna ho mophetetsi, e le hore 'molai a tle a se ke a bolaoa a e-s'o hlahisoe kapele ho sechaba hore a ahloloe. ₁₃Metse ena e tšeletseng, eo le tla e aba, e tla ba metse eo le tla tšabela ho eona. ₁₄Le tla fana ka metse e meraro ka koano ho Jorodane, ebe le fana ka metse e meraro naheng ea Kanana, 'me e tla ba metse eo le tla tšabela ho eona. ₁₅Metseng ena e tšeletseng ke moo ho tla tšabela bana ba Iseraele, le ba jakileng har'a bona, le balichaba; ke hore e mong le e mong ea bolaeang motho e se ka morero o tla tšabela teng.

₁₆“ ‘Empa haeba motho a batile motho e mong ka ntho e entsoeng ka tšepe, eba motho eo oa shoa, eo ea 'matileng ke 'molai, 'me 'molai enoa o tšoanetse ho bolaoa. ₁₇Ha a 'matile ka lejoe leo a le betsitseng, eba motho eo oa shoa, eo ea 'molaileng ke 'molai, 'me 'molai enoa o tšoanetse ho bolaoa. ₁₈Kapa haeba a 'matile ka molamu oo a o tšoereng, eba motho eo oa shoa, eo ea 'molaileng ke 'molai, 'me 'molai enoa o tšoanetse ho bolaoa. ₁₉Mophetetsi oa mali a tšolotsoeng o tla bolaea 'molai eo ka boeena. Ha a kopana le eena a 'molaee.

₂₀“ ‘Haeba a khorohela motho ka baka la lehloeo feela, kapa a 'metsa ka ho hong, a mo laletse, eba eo oa shoa; ₂₁kapa haeba a ka mo otla ka setebele ka baka la bora, 'me eba eo oa shoa, eo ea 'molaileng ruri o tla bolaoa, hobane ke 'molai. Mophetetsi oa mali a tšolotsoeng o tla bolaea 'molai eo ha a kopana le eena.

₂₂“ ‘Empa haeba a khorohela motho e se ka morero, kapa a 'metsa ka ho hong; ₂₃kapa ere a sa 'mone a 'metsa ka lejoe le ka 'molaeang, ebe eo oa shoa, feela e se sera sa hae, a bile a se na morero oa ho mo ntša kotsi, ₂₄phutheho e tla ahlōla pakeng tsa 'molai le mophetetsi oa mali, ho ea ka melao ena. ₂₅Phutheho e tla lokolla 'molai matsohong a mophetetsi oa mali a tšolotsoeng, e 'musetse motseng oo ho tšabeloang ho oona, moo a neng a balehetse teng. 'Molai eo o tla lula motseng oo ho fihlela Moprista e Moholo, ea neng a tlotsitsoe ka ole e halalelang, a e-shoa.

₂₆“ ‘Empa haeba neng kapa neng 'molai a ka tsoela kantle ho moeli oa motse oo a balehetseng ho oona, ₂₇eba mophetetsi oa mali a tšolotsoeng o mo fumana kantle ho moeli oa motse oo a tšabetseng ho oona, 'me mophetetsi eo oa mali a tšolotsoeng oa 'molaea, ha a na ho ba le molato oa ho tšolla mali, ₂₈hobane 'molai o ne a tšoanetse ho lula motseng oo a tšabetseng ho oona ho fihlela Moprista e Moholo a e-shoa. Kamora' lefu la Moprista e Moholo ke hona 'molai a ka khutlelang naheng ea habo.

₂₉“ ‘Tsena e tla ba molao oa kahlōlo ho lōna, le melōkong ea lōna, hohle moo le phelang teng.

₃₀“ ‘Ha e mong a ka bolaea motho, 'molai eo o tla bolaoa ho ea ka bopaki ba lipaki, empa bopaki ba paki e le 'ngoe bo ke ke ba etsa hore motho a ahloleloe lefu.

₃₁“ ‘Le se ke la amohela moputso o lopollang 'molai ea molato oa ho bolaea, hobane ruri o tšoanetse ho bolaoa.

₃₂“ ‘Le se ke la amohela moputso o lopollang motho ea balehetseng motseng oo ho tšabeloang ho oona, hore a khutlele naheng ea habo, pele Moprista e Moholo a e-shoa.

₃₃“ ‘Kahoo le se ke la silafatsa naha eo le phelang ho eona, hobane mali a tšolloang a silafatsa naha. Naha e ke ke ea etsetsoa tefelo ea mali a tšolletsoeng ho eona, haese feela ka mali a ea tšolotseng mali ao. ₃₄Le se ke la silafatsa naha eo le ahileng ho eona, eo le 'na ke ahileng ho eona, hobane 'na, Morena, ke phela har'a bana ba Iseraele.’ ”