OBADIEA 1

Morena Molimo

o bua tjena ka Edomo:

Re utloile molaetsa

o tsoang ho Morena,

leqōsa le rōmetsoe ho balichaba,

le re: “Emang,

re futuheleng Edomo!”

₂“Uena Edomo,

ke tla u nyenyefatsa,

ke u nyenyefatse har'a balichaba,

ba tle ba u nyōpe, ba u nyelise.

₃Boikhōhōmōso ba pelo ea hao

bo u thetsitse,

uena ea phelang mafarung,

har'a mafika,

eo leaho la hao

le leng har'a lithaba,

uena ea ithorisang ka ho re:

‘Ke mang

ea ka ntheolelang tlase?’

₄Leha u ka fōfela holimo sa ntsu,

ua haha hlaha sa hao,

oa se hoha har'a linaleli,

ke tla u tlosa hona moo,

ke u theole,”

₅“Ha masholu

a ka u futuhela bosiu,

linokoane tsa u nanarela bosiu,

leha tšenyehelo ea hao

e tla ba kholo,

na a ke ke a utsoa feela

tseo a li hlokang?

Ha bakotuli ba morara

ba u kotulela,

na ba ke ke ba siea makhoahlapiso?

₆Esau o runtsolotsoe hakaakang!

Matlotlo a hae a patiloeng

a lobeloa hakaakang!

₇Bohle ba thusanang le uena

ba u thetsitse,

ba u kharameletsa meeling;

balekane ba hao ba u khelositse,

metsoalle eo u e tšepang

e u chehetse leraba,

empa uena ha u ka ke ua le bona.

₈“Mohl'a tsatsi leo,”

ho rialo Morena,

“na ha ke tl'o timetsa

bahlalefi ba Edomo,

thabeng ea Esau

ke felise ba nang le kutloisiso?

₉Uena Temana, bahlabani ba hao

ba tla thōthōmela,

bohle ba bolaoe,

ba bolaeloe thabeng ea Esau.”

₁₀“Kaha u n'u hlekefetse

ngoan'eno Jakobo,

lihlong li tla u aparela,

uena u timele, u timelle ruri!

₁₁Mohla u n'u emeletse kathōko,

ha balichaba ba harara leruo la hae,

melata e kena ka likhoro,

ka khoro tsa metse ea hae,

e laola Jerusalema ka lōtho,

u ne u ka e mong oa balichaba.

₁₂Mohla ngoan'eno

a hlahetsoeng ke bomalimabe,

u se k'a mo shebela maotong;

mohla chaba sa Bajuda

se timetsoang,

u se thabele

ho timetsoa hoo ha sona;

le mohla se leng makaqabetsing,

u se k'a ithorisa hakaalo.

₁₃Mohla chaba sa ka

se oetsoeng ke koluoa,

u se k'a kena ka likhoro tsa sona;

mohla chaba sa ka

se leng har'a bomalimabe,

u se k'a se somela bomalimabe boo;

le mohla se leng har'a litlokotsi,

u se k'a ikhapela maruo a sona.

₁₄Mohl'a tsatsi la sona le litsietsi,

u se k'a lalla mateanong a litsela,

hore u bolaee

baphaphathehi ba sona,

le ho neelana

ka ba phonyohileng ba sona.”

₁₅“Tsatsi la Morena le atametse,

le tla chabela lichaba kaofela.

Khalapa li tla buseletsana,

molamu o boele sefateng.

₁₆Seo lōna chaba sa ka le se noeleng,

la se noella thabeng ea ka,

thaba e halalelang,

lichaba tsohle

li tla se noa ho-ea-ho-ile;

li tla se noa, li be li minyeletse,

li be joaloka hola li e-s'o be teng.”

₁₇“Ba phonyohileng

ba tla ba thabeng ea Sione,

eona e be sebaka se halalelang;

ba ntlo ea Jakobo ba je lefa la bona.

₁₈Ntlo ea Jakobo e tla ba mollo,

ntlo ea Josefa e be lelakabe,

ntlo ea Esau eona e be matlakala;

ba tla e hotetsa ka mollo,

ba e chese,

ho se be ea phonyohang

oa ntlo ea Esau,”

₁₉Baiseraele ba tsoang Boroa

ba tla hapa,

ba hape thaba ea Esau,

ba tsoang liphuleng

le bona ba hape,

ba hape naha ea Bafilesita.

Ba tla hapa Efraime,

ba hape Samaria,

Benjamine eena a ikhapele Gileade.

₂₀Letšoelehali la bathōpuoa

ba Iseraele ba Kanana

le tla hapa naha eo

ho ea fihla Sarepeta,

bathōpuoa ba Jerusalema,

ba leng Sarefate,

ba tla ikhapela metse e ka Boroa.

₂₁Bapholosi ba bona ba tla nyoloha,

ba nyolohele thabeng ea Sione,

ba buse lithaba tsa Esau,

'me 'muso e tla ba oa Morena.