1Ho molemo
ho itjella likokotoana,
ho itjella tsona ka khotso,
ho e-na le ho phela tlung
e nang le khōra le liqabang.
2Mohlanka ea masene
a ka busa mora,
a busa mora ea sethoto
oa mong'a hae,
a aroleloa lefa
joaloka bana ba mong'a hae.
3Silefera e hloekisoa
ka ho qhibilisoa pitseng,
khauta eona e hloekisoa
ka sebōpi sa eona;
athe lipelo tsona
li hlahlojoa ke Morena.
4Ea etsang bokhopo
o mamela polelo tsa leshano,
ea leshano eena
o mamela tsa bokhopo.
5Ea somang mafutsana
o soma 'Mōpi oa hae,
ea thabelang tsietsi tsa e mong
eena o tla otloa.
6Litlōhōloana ke mofapahlooho,
mofapahlooho oa bo-raputsoe,
bana ba ithaba
ka batsoali ba bona.
7Sethoto ha se lokeloe
ke puo tsa bokheleke,
puo ea leshano ha e lokele khosana.
8Tjotjo ke hakoe la bohlokoa,
ke la bohlokoa ho mo-e-fani,
e mo atlehisa
ho tsohle tseo a li etsang.
9Ea lalang liphoso ka 'mele
o qeka ho ratoa,
athe ea li pepesang
eena o senya setsoalle.
10Ea bohlale
o phakisa ho amohela khalemo,
thoto ha se shapuoa halekholo
ha se mamele.
11Motho ea khopo
o thabela meferefere,
ea joalo o rōmelloa leqosa,
leqosa le sehlōhō.
12Ho molemo ho kopana
le bèrè e tšehali,
bèrè e nketsoeng malinyane a eona,
ho e-na le ho kopana
le sethoto se poqang
bothotong ba sona.
13Ea buseletsang botle ka bokhopo,
bokhopo bo ke ke ba tloha
lapeng la hae.
14Qabang e qala joaloka metsi
a faposoa mosele,
uena e koekoetle e e-s'o ka e kèkèla.
15Ea lokollang ea khopo
le ea ahlōlang ea lokileng,
bobeli ba bona
ke manyala ho Morena.
16Thuso ke efe
ea ho nea sethoto chelete,
athe ha se na kutloisiso
ea ho reka bohlale?
17Motsoalle o na le lerato kamehla,
ngoan'abo motho
o tsoaletsoe ho thusa,
ho thusa mohl'a tsatsi la litsietsi.
18Ea hlokang kelello
o itlama ka litšepiso,
a itlame ho lefa
melato ea ba bang.
19Ea ratang liphapang o rata sebe,
ea ikhōhōmōsang o ipitsetsa timelo.
20Motho ea pelo e khopo
ha a atlehe;
ea leme le tletseng thetso
o tla timela.
21Ea tsoalang sethoto
o itsoalla litsietsi,
ntat'a sethoto o hloka thabo.
22Pelo e thabileng
e tseba ho folisa,
empa moea o hlorileng
o tepeletsa 'mele
23Motho ea khopo
o amohela tjotjo sephiring,
ka eona o khopamisa litsela tsa toka.
24Bohlale bo mahlong a ea masene,
mahlo a sethoto 'ona
a thalatsa kahohle.
25Mora ea sethoto
o tlisa masisa-pelo ho ntat'ae,
bohlōkō ba pelo ea 'm'ae
bo baba seka leshokhoa.
26Ke phoso ho ahlōla motho
a se na molato,
kapa ho otlela mahosana
ho loka ha 'ona.
27Ea nang le tsebo
o tšoara leme la hae,
ea nang le kutloisiso
ha a ke a halefa.
28Sethoto ha se khutsitse
ho thoe se hlalefile,
se na le kutloisiso
ha se tšoara leme la sona.
