MAELE 24

₁U se ke ua khahloa,

ua khahloa ke ba khopo,

u se lakatse

ho etsa setsoalle le bona,

₂hobane ba inahanela

ho sebelisa likhōka,

melomo ea bona e bua limpe.

₃Bohlale ke bona bo hahang ntlo,

kutloisiso eona e e tsitsise,

₄tsebo e tlatse likamore

ka mekhabo ea matlotlo a bohlokoa,

matlotlo a khahlehang.

₅Ea bohlale o matla ho feta senatla,

ea nang le tsebo o feta sekoankoetla.

₆U loana ntoa

u itokiselitse eona hantle,

u e hlōle

ka ho eletsoa ke ba bangata.

₇Sethoto ha se utloisise bohlale,

ka khotla

se ke ke sa ahlamisa molomo.

₈Ea lōhang mano a ho etsa bokhopo

batho ba 'mitsa ra-bolotsana.

₉Merero ea bothoto ke sebe,

mosomi o nyonyoa ke batho bohle.

₁₀Haeba u nyahama pelo

mohl'a litsietsi,

u fela u fokolloa ke matla.

₁₁Lopolla ba isoang lefung,

u pholose ba isoang polaong.

₁₂Ha u ka re:

“Jo! re ne re sa tsebe!”

Na ea bonang lipelo

eena a ke ke a lemoha?

Ea baballang bophelo ba hao

eena oa tseba,

motho ka mong o tla mo putsa

ho ea ka mesebetsi ea hae.

₁₃Mor'a ka, e-ja mahe a linotši,

hobane aa latsoeha,

u je khèkhè ea linotši

hobane ea hlabosa.

₁₄Tseba hore bohlale bo joalo

moeeng oa hao;

ha u ka bo fumana

u tla ba le katleho kamoso,

tšepo ea hao e ke ke ea fela.

₁₅Se lalle ntlo ea motho ea lokileng

joalokaha senokoane se etsa;

lapa la hae u se ke ua le senyetsa,

₁₆hoba leha ea lokileng a e-oa hasupa,

o ee a boele a tsohe,

athe ba khopo koluoa ea ba timetsa.

₁₇U se ke ua thabela

ho oa ha sera sa hao,

pelo ea hao e se nyakalle

ha se khōthōmetseha;

₁₈esere Morena a bona,

'me a nyatsa,

a khelosa khalefo ea hae ho sona.

₁₉U se ke ua itšoenya

ka ba etsang bobe,

kapa ua khahloa

ke ba etsang bokhopo;

₂₀ea khopo ha ho letho

leo a le tšepileng,

bone la bophelo ba hae

le tla tingoa.

₂₁Mor'a ka,

tšaba Morena le khosi,

u se ke ua ikopanya

le mahlabaphieo,

₂₂hobane hang-hang

koluoa e tla a oela holimo.

Ana ke mang ea ka tsebang

tšenyo eo ba tla e etsa?

Ho ahlola ka leeme ha hoa loka.

₂₄Ea reng ho ea khopo:

“Ha u na molato,”

chaba li tla mo rōhaka,

merabe e mo nyonye;

₂₅empa ba ahlōlang ea molato

ba tla atleha,

mahlohonolo a ba atele.

₂₆Ea arabang ka bokhabane

o supa setsoalle sa 'nete.

₂₇Hlopha mosebetsi oa hao o kantle,

ebe u lema tšimo ea hao,

u nt'o haha ntlo ea hao.

₂₈U se be paki

e tsoang mohaeno ntle ho lebaka,

polelo tse thetsang,

li se tsoe molomong oa hao.

₂₉U se ke ua re:

“Ke tla busetsa molamu sefateng,

khalapa ke e buseletse ka khalapa.”

₃₀Ke ile ka feta

pel'a tšimo ea sekhōba,

ka ba ka feta

rapeng sa morara sa ea sethoto,

₃₁ka bona li rarieletsoe ke meutloa,

bobatsi le bona bo entse mofero,

marako le 'ona a s'a helehile,

₃₂Ka bona, ka ba ka imamela,

ka talima, ka ithuta sena:

₃₃Ha u ka re shoa!

ua boela ua re shoa!

ua phutha-phutha matsoho,

ua iphomolela,

₃₄fuma ba hao bo tla u nanarela,

bo u nanarele joaloka senokoane,

tlala e u oele holimo

sa motho a nkile lihlomo.