MAELE 26

₁Joaloka lehloa

le khethehang hlabula,

kapa pula e nang

ka nako ea ha ho kotuloa,

hlompho le eona

ha e tšoanele sethoto.

₂Joaloka serobele se phuphuselang,

kapa lefokotsane le oka-okelang,

motho ha a silafatsoe

ke thōhako ea lefeela.

₃Phafa e shapa pere,

tonki e huloa ka tomo,

thoto sona se phekoloa ka thupa.

₄Se arabe sethoto

ho ea ka bothoto ba sona,

esere le uena ua tšoana le sona.

₅Araba sethoto

ho ea ka bothoto ba sona,

esere sa ipona se le bohlale.

₆Ea rōmeletsang litaba ka sethoto,

o ikhaola maoto,

o ipiletsa litlokotsi.

₇Maoto a sehlotsa aa fokola,

maele a tsoang

molomong oa sethoto a joalo.

₈Ho isa tlōtla ho sethoto,

ho tšoana le ho tlamella lejoe,

ho le tlamella letjeketjaneng.

₉Maele a tsoang molomong,

molomong oa sethoto

a ka moutloa

o hlabang letsoho la letahoa.

₁₀Joaloka rametsu

ea fulang a sa shebe,

ea hirang sethoto

kapa mofeta-ka-tsela, o joalo.

₁₁Sethoto se khutlelelang

bothotong ba sona

se tšoana le ntja e khutlelang

mahlatseng a eona.

₁₂Motho ea ithetsang

ka ho re o bohlale,

u ka tšepa sethoto

ho e-na le eena.

₁₃Sekhōba se re:

“Tau ke ena ka tseleng!

Tau ke ena literateng!”

₁₄Joalokaha lemati

le koaleha le buleha,

sekhōba le sona

se meneka joalo moalong oa sona.

₁₅Sekhōba se kenya letsoho

ka sejaneng,

empa se botsoa ho le isa hanong.

₁₆Sekhōba se ithetsa

ka ho re se bohlale,

ho feta banna ba supileng

ba nang le kelello.

₁₇Mofeta-ka-tsela

ea kenang qabang tsa batho

o ka motho ea sothang

tsèbè tsa ntja ea lelahleha.

₁₈Lehlanya le betsakang litsenene,

le metsu e bolaeang,

₁₉le tšoana le motho

ea thetsang mohahabo,

ebe o re:

“Ke ne ke itšoasetsa feela.”

₂₀Ha patsi e felile, mollo oa tima,

ha ho se mosebi, qabang lia fela.

₂₁Mashala a tsoala leupa,

patsi e hotetsa mollo,

motho oa likhang

eena o fehla liqabang.

₂₂Taba tsa bo-fuufu

li monate haholo,

li ka lijo

tse theohelang hamonate maleng.

₂₃Motho ea leme le monate

a le pelo e mpe,

o joaloka pitsa ea letsopa

e homiloeng ka manya a silefera.

₂₄Moikaketsi o ikhakanya

ka polelo tsa hae,

empa pelong ea hae o emere thetso.

₂₅Leha a ka bua hamonate

u se mo kholoe,

hobane bobe

bo khaphatseha pelong ea hae.

₂₆Leha lehloeo la hae

le ka ikhakanya ka thetso,

bokhopo ba hae

bo tla taloleha mahlong a bohle.

₂₇Ea chekang lemena

o tla oela ho lona,

ea thetang lejoe

le tla mo oela holimo.

₂₈Leleme le leshano

le hloile bao le ba buang hampe,

molomo oa leseaqhèmè

oona oa timetsa.