MAELE 3

₁Mora oa ka,

se lebale thuto ea ka,

pelong ea hao

melao ea ka u e boloke,

₂u tl'u lelefaletsoe matsatsi a hao,

lemo tsa khotso li tle li u atele.

₃E-ba le lerato, u be le botšepehi,

molaleng oa hao u itlame ka tsona;

u li ngole tlapeng la pelo ea hao.

₄U tla ratoa ke Molimo le batho,

u iketsetse lebitso mahlong a bona.

₅Tšepa Morena

ka pelo ea hao eohle,

u se ke ua tšepa bohlale ba hao.

₆Kenya Morena mererong ea hao,

mo kenye ho eona eohle,

tsela tsa hao a tl'a li otlolle.

₇U se ipone u le bohlale,

tšaba Morena, u sesefe bobe.

₈U tla phela hantle 'meleng,

masapo a hao a tiee.

₉Tlōtla Morena ka maruo a hao,

le ka lopotsiea tsohle

tsa lijalo tsa hao.

₁₀Lisiu tsa hao

li tla sasamatsoa ke chai,

merifi ea hao e khaphatsehe veine.

₁₁Mora oa ka,

se nyelise khalemelo ea Morena,

se khathale ha a u laea,

₁₂hoba Morena o khalema

eo a mo ratang,

sa ntata, ngoaneng eo a mo ratang.

₁₃Ho lehlohonolo

ea iphumanetseng bohlale,

ea bileng a fihletseng kutloisiso,

₁₄hoba bo feta silefera ka bohlokoa,

ho bo fihlela

ke tlotlo le fetang khauta;

₁₅bo khahleha

ho feta le mabenyane a bohlokoa,

ha ho letho

le ka bapisoang le bona;

₁₆ka ho le letona

bo kakatletse bolelele ba bophelo,

ka ho le letšehali

bo kakatletse maruo le tlōtla.

₁₇Tsela tsa bona lia khahleha,

moo bo tsamaeang teng

ho rena khotso.

₁₈Ho ba bo khomarelang

ke fate sa bophelo,

ho lehlohonolo

ba itšoarellang ka bona.

₁₉Ka bohlale

Morena o ralile methèo ea lefatše,

ka kelello

Morena a ala le maholimo;

₂₀ka tsebo ea hae a arohanya maliba,

maru a latsa phoka,

a e latsa holim'a lefatše.

₂₁Mora oa ka,

boloka bohlale le tlhalohanyo,

li se tlohe mahlong a hao.

₂₂Tsena ho uena e tla ba bophelo,

li qhake molala oa hao,

li o khabise.

₂₃U tla tsamaea u sireletsehile,

leoto la hao le ke ke la khoptjoa.

₂₄Ha u robala

u ke ke ua tšaba letho,

ha u robala

u tla khaleha thuoe!

₂₅Se tšabe tlokotsi

e u tlelang ka tsometso,

kapa timetso

e oelang ba khopo holimo;

₂₆hobane Morena

ke eena letšepa la hao,

leoto la hao

le ke ke la oela lerabeng.

₂₇Fana ka tse molemo

ho ba li hlokang,

ha u e-na le matla a ho etsa joalo.

₂₈U se ke ua re ho oa heno:

“Tsamaea u boele u khutle,

ke tla u nea eona hosasa,”

empa u nts'u e-na le eona.

₂₉U se ke ua rerela oa heno bokhopo,

empa eena a phela le uena

a u tšepile.

₃₀Se qose motho ho se na lebaka,

ha eena a sa u senyetsa letho.

₃₁Se khahloe ke motho

ea khantšang bohanka,

se latele le e 'ngoe ea tsela tsa hae.

₃₂Morena o hloile ea sothang 'nete,

empa ea lokileng

eena oa mo tšepa.

₃₃Morena o rōhaka

malapa a ba khopo;

o hlohonolofatsa a ba lokileng.

₃₄Morena o soma baikakasi,

athe baikokobetsi oa ba hauhela.

₃₅Ba bohlale bona oa ba tlōtla,

athe lefa la lithoto ke ho tlontloloha.