LIPESALEMA 106

₁Haleluja!

Bokang Morena, hobane o molemo;

mohau oa hae ke oa kamehla eohle.

₂Ke mang ea ka bolelang

ketso tse matla tsa Morena,

ea ka tumisang

thoriso eohle ea hae?

₃Ho lehlohonolo ba etsang toka,

ba etsang ho lokileng ka nako tsohle.

₄Morena, ak'u nkhopole,

ha u sitsa sechaba sa hao,

u nketele, u tl'o mpholosa.

₅A nke ke bone katleho

ea bakhethoa ba hao,

ke be le kabelo thabong

ea sechaba sa hao,

ke tle ke ithorise

'moho le bao e leng lefa la hao.

₆Rōna le bo-ntat'a rōna re entse libe,

re molato, re khopo.

₇Bo-ntat'a rōna, ha ba sa le Egepeta,

ha baa ka ba utloisisa

limakatso tsa hao;

ba ile ba lebala

mohau oa hao o moholo,

ba mpa ba fetohela Ea Holimo-limo

ha ba le Leoatleng la Sufe.

₈Empa o ile a ba pholosa

ka baka la lebitso la hae,

hore ho tle ho bonahatsoe

matla a hae.

₉A khalemela Leoatle la Sufe,

eaba lea psha;

a ba tsamaisa malibeng

joalokaha eka ke sebataolong.

₁₀A ba pholosa matsohong

a ba ba hloileng,

a ba namolela matsohong a sera.

₁₁Metsi a koahela ba ba loantšang,

ha se ke ha phonyoha le ea mong.

₁₂Eaba ba qala

ho kholoa tšepiso tsa hae,

ba 'minela lithoko.

₁₃Empa ba phakisa ho lebala,

ho lebala liketso tsa hae,

ba tlohela ho batla keletso ho eena.

₁₄Ba mpa ba laoloa

ke litakatso tsa bona lefeelleng,

ba leka Molimo ba le lehoatateng.

₁₅A ba nea seo ba neng ba se kōpa,

athe o tla ba neella

ka lefu le ba timetsang.

₁₆Ba hōnōhela Moshe ba le liahelong,

le eena Arone,

mohalaleli oa Molimo.

₁₇Lefatše la ahlama,

la metsa Datane,

la koenya sehlopha sa Abirame.

₁₈Mollo oa tuka

har'a sehlopha sa bona,

malakabe a oona

a chesa bao ba khopo.

₁₉Ha ba le Horebe,

ba ipōpela namane,

ba khumamela setšoantšo

se bōpiloeng ka khauta.

₂₀Ba lahla tlōtla ea Molimo,

ba tlotlisa setšoantšo sa pohoana,

ntho e jang joang.

₂₁Ba lebala Molimo,

mopholosi oa bona,

ea entseng tse kholo Egepeta,

₂₂limakatso naheng ea Kama,

le tse tšosang Leoatleng la Sufe.

₂₃Eaba o re oa ba felisa,

empa Moshe, mokhethoa oa hae,

a kena lipakeng,

a phōka bohale ba hae

hore bo se ba timetse.

₂₄Ba nyelisa naha e khahlehang,

hobane ba ne ba sa kholoe,

ba sa kholoe litšepiso tsa hae.

₂₅Ba luma-luma

ba le litenteng tsa bona,

ba se ke ba mamela

lentsoe la Morena.

₂₆A phahamisa letsoho,

a ba hlapanyetsa

hore o tla ba bolaela lehoatateng,

₂₇a qhalanye tlōhōlō tsa bona,

a li qhalanyetse har'a lichaba,

a li qhalakanyetse linaheng.

₂₈Ba khomarela Baale oa Peore,

ba e-ja mahlabelo

a etselitsoeng bafu.

₂₉Ba phephetsa Molimo

ka liketso tsa bona,

ba oeloa ke lefu la seoa.

₃₀Empa Finease a ema,

a ahlōla ba molato,

eaba lefu la seoa lea fela.

₃₁Hoo a ho balloa e le ho loka,

ho isa melōkong eohle,

kamehla le mehla.

₃₂Ba boela ba halefisa Morena,

ba mo halefisa metsing a Meriba,

Moshe a ba tsietsing

ka baka la bona;

₃₃ba khopisa moea oa hae,

hoo a bileng a bua a sa inahana.

₃₄Ha baa ka ba timetsa lichaba

joalokaha Morena a ne a ba laetse;

₃₅ba mpa ba nyallana le balichaba,

ba ithuta mekhoa ea bona.

₃₆Ba sebeletsa melimo ea bona,

melimo ea bona ea litšoantšo,

e ileng ea ba fetohela leraba.

₃₇Ba etsetsa bademona mahlabelo,

ka bara le barali ba bona.

₃₈Ba tšolla mali a se nang molato,

mali a bara le barali ba bona,

ba ba etsa mahlabelo a melimo,

melimo ea litšoantšo ea Kanana:

Naha ea silafala ke mali.

₃₉Ba itšilafatsa

ka mesebetsi eo ea bona,

ka ketso tseo tsa bona

ba koenehela Morena.

₄₀Morena a halefela sechaba sa hae,

a nyonya bao e leng lefa la hae.

₄₁A ba neela matsohong a balichaba,

ba busoe ke ba ba hloileng.

₄₂Lira tsa bona tsa ba hatella,

ba ba katlas'a taolo ea tsona.

₄₃A 'na a ba lopolla

ka makhetlo-khetlo,

ba mpa ba ikhethela ho mo tella,

ba tetebela bokhopong ba bona.

₄₄Joale a talima ho tšoenyeha ha bona,

ha a utloa sello sa bona.

₄₅A hopola selekane sa hae le bona,

a ba hauhela

ka baka la rato la hae le leholo.

₄₆A etsa hore bohle

ba neng ba ba isitse bothōpuoeng

ba ba utloele bohlōkō.

₄₇Morena Molimo oa rōna,

ak'u re pholose;

u re phuthe, u re ntše lichabeng,

re tle re boke lebitso la hao,

lebitso la hao le halalelang,

re u rorise re le motlōtlō.

₄₈Ho bokoe Morena,

Molimo oa Iseraele,

a bokoe kamehla eohle,

e se nang qaleho le qetello.

Sechaba sohle se ke se re:

“A ho be joalo!”

Haleluja!