Thapelo ea ho ikōpela thuso ntoeng
1Pesalema ea Davida. Sefela.
2Pelo ea ka e matlafetse, Molimo;
ke tla bina, ke u roke.
3Tsoha moea oa ka,
tsohang, lōna thomō le harepa;
ke tla tsoha mafube a e-s'o hlahe.
4Morena, ke tla u boka har'a lichaba,
ke u roke har'a merabe;
5hobane mohau oa hao o moholo,
o fihla maholimong,
le botšepehi ba hao
bo fihla marung.
6Molimo, ak'u bontše
hore u okametse maholimo,
tlōtla ea hao
e phahamele lefatše lohle.
7Re pholose
ka letsoho la hao le letona,
u re utloe,
baratuoa ba hao ba tle ba lopolloe.
8Molimo o buile
a le sehalalelong sa hae, a re:
“Ke nyakaletse,
ke tla arola Shekeme,
ke sehe khohlo ea Sukote likoto.
9Gileade ke ea ka,
le Manase ke ea ka;
Efraime ke katiba ea ka ea tšepe,
Juda eena ke lere la ka la puso.
10Moabe ke lefiso
leo ke itlhatsoetsang ho lona,
Edomo ke tla e hatakela ka seeta;
Filesitiea teng ke tla etsa litlatse,
ke etse litlatse tsa tlhōlo.”
11Ke mang ea tla nkisa
motseng oa liqhobosheane?
Ke mang ea tla mphihlisa Edomo,
12ha e le moo uena Molimo,
u re lahlile,
u se u sa tsoe le mabōtho a rōna?
13Ak'u re thuse lireng tsa rōna;
hobane thuso ea motho ke lefeela.
14Ka thuso ea Molimo
re tla loana senna,
ke eena ea tla hatakela
lira tsa rōna.
