Molimo o tseba tsohle
1Pesalema ea Davida, e qapetsoeng motsamaisi oa libini.
Morena, u ntlhahlobile, ua ntseba.
2U tseba ha ke lula le ha ke ema,
u hlalohanya mehopolo ea ka,
u e hlalohanya ke sa le hōle.
3U ntisa ha ke tsamaea
le ha ke robetse,
u tsebisisa metsamao ea ka eohle.
4Lentsoe le e-s'o be teng lemeng la ka,
u se u le tseba hantle, Morena.
5U ntlhahile kamahohle,
u beile letsoho la hao holim'a ka.
6Tsebo ena e makatsang ea mpheta;
e tebile hoo nke keng ka e fihlela.
7Nka ea kae
ho ipatela moea oa hao?
Nka balehela kae
ho ipatela sefahleho sa hao?
8Ha nka nyolohela maholimong,
u teng moo;
leha nka theohela Qalong ea Bafu,
le teng u teng.
9Leha nka alima mapheo a mafube,
ka ea aha lipheletsong tsa leoatle,
10le hona moo letsoho la hao
le tla ntsamaisa,
letsoho la hao le letona
le tla ntšoara.
11Leha nka re:
“Ruri lefifi le tla mpata,
leseli le nteetseng hare
le tla fetoha bosiu,”
12empa ho uena lefifi hase lefifi,
bosiu bo khanya joaloka letsatsi,
lefifi le joaloka leseli.
13Ke uena ea bōpileng
bokahare ba ka,
ea kopantseng litho tsa ka
ke sa le pōpelong ea 'mè.
14Kea u boka,
hobane u mpōpile
ka mokhoa o makatsang;
mesebetsi ea hao ea hlolla,
hona ke ho tseba hantle.
15Masapo a ka
a ne a sa pateha ho uena,
ha ke ne ke bōptjoa sephiring,
ke kopanngoa litho
ke le botebong ba lefatše.
16Mahlo a hao
a mpone ke e-s'o tsoaloe;
tsohle tsa ka
li ne li se li ngotsoe bukeng ea hao,
le pele ke e-ba teng.
17Molimo, mehopolo ea hao
e thata hakaakang!
Palo ea eona
e kholo hakaakang!
18Ha nka e bala,
e mengata ho feta lehlabathe;
ha nka e qeta,
u ntse u e-na le 'na.
19Oho, Molimo,
hoja ua timetsa ba khopo,
hoja ba tšollang mali
ba suthela hōle le 'na!
20Ke ba buang hampe ka uena,
ba u loantšetsang lefeela.
21Na nke ke ka hloea
ba u hloileng, Morena,
ka halefela ba u tsohelang matla?
22Ke ba hloile
ka lehloeo le phethehileng,
le 'na ke lira tsa ka.
23Ntlhahlobe Molimo,
u tsebe pelo ea ka;
u 'nonye maikutlo,
u tsebe mehopolo ea ka;
24u bone hore na ke tseleng e mpe,
u ntsamaise tseleng
ea kamehla eohle.
