LIPESALEMA 50

Molimo ea matla 'ohle, Morena,

o buile, o bitsa lefatše lohle

ho tloha bochabela

ho isa bophirimela.

₂Molimo o khanya a le Sione,

motseng o motle-motle.

₃Molimo oa rōna oa tla,

a ke ke a hlola a khutsa.

Kapele ho eena ke mollo,

mollo o chesang lore!

Sefefo se matla se mo teetse hare.

₄O bitsa maholimo le lefatše

ho tla kahlōlong ea sechaba sa hae.

₅O re: “Bōkellang batšepuoa ba ka,

le ba bōkelle kapele ho 'na,

e leng ba entseng selekane le 'na,

ba se entseng ka mahlabelo.”

₆Maholimo a bolela ho loka ha hae,

kaha Molimo ke eena moahlōli.

₇“Mamelang, lōna sechaba sa ka,

'me ke tla bua;

uena Iseraele, ke tla u qōsa.

Ke 'na Molimo, Molimo oa hao.

₈Ha ke u nyatsetse mahlabelo a hao,

hobane ha u khaotse

ho 'nyehella ka licheso.

₉Nke ke ka amohela poho

ea saka la hao,

leha e le phooko

ea mohlape oa hao;

₁₀hobane libatana tsohle tsa meru

ke tsa ka,

le tsona liphoofolo

tse likete-kete lithabeng.

₁₁Ke tseba linonyana tsohle

tse sepakapakeng,

le linyamatsane tsohle tsa naha

ke tsa ka.

₁₂Hoja ke ne ke lapile,

ke ne ke sa tl'o u bolella,

hobane lefatše ke la ka,

le tsohle tse ho lona.

₁₃Na ke ja nama ea lipoho?

Kapa ke noa mali a liphooko?

₁₄Nyehella Molimo

ka sehlabelo sa teboho,

phetha likano tsa hao

ho Ea Holimo-limo.

₁₅Ipiletse ho 'na

ka nako ea matšoenyeho;

ke tla u lopolla,

'me uena u tla ntlotlisa.”

₁₆Empa ho ea khopo Molimo o re:

“U na le tokelo efe

ea ho bolela melao ea ka,

kapa ho bolelisa selekane sa ka,

u se bolelisa ka molomo oa hao,

₁₇athe u hloile ho khalemeloa,

u lahlile mantsoe a ka ho hang?

₁₈Ha u bona lesholu,

u s'u khema le lona;

u motsoalle oa lifebe.

₁₉U lumella molomo oa hao

ho bua tse mpe,

leleme la hao le lōha mano.

₂₀U luletse ho bua ngoan'eno hampe;

u silafatsa ngoan'a 'm'ao.

₂₁Tsena u li entse;

joale u re nka khutsa?

U hopola hore ke tšoana le uena?

Ke tla u khalemela,

ke totobatse tsohle mahlong a hao.

₂₂“Lōna ba lebalang Molimo,

le ke le lemohe tsena,

esere ka le harola,

'me la hloka ea le namolelang.

₂₃Ea 'nyehellang

ka sehlabelo sa teboho,

ka sona oa ntlotlisa,

ea tsamaeang ka ho loka

ke tla 'montša

kamoo Molimo a pholosang kateng.”