LIPESALEMA 51

₃Oho, Molimo, ak'u nkhauhele

ka mohau oa hao,

ho ea ka boholo ba lerato la hao

ak'u hlakole melato ea ka.

₄Ntlhatsoisise bokhopo ba ka,

u ntlhoekise sebe sa ka;

₅hobane ke tseba melato ea ka,

ke hopola sebe sa ka kamehla.

₆Ke sitetsoe uena, uena u inotši,

ke entse bobe mahlong a hao.

Ho loka ha hao

ho tla bonahala ha u ahlōla,

le ho hloka koli ha hao

ha u liha nyeoe.

₇Ruri ke bile ea sa lokang

ho tloha tsoalong ea ka,

ke bile moetsalibe

ho tloha pōpelong ea 'mè.

₈Athe uena u thabela botšepehi,

botšepehi moeeng oa motho,

u nthuta bohlale

botebong ba pelo ea ka.

₉Felisa sebe sa ka, ke tle ke hloeke;

u ntlhatsoe, ke tle ke be mosoeu,

ke be mosoeu ho feta lehloa.

₁₀Etsa hore ke utloe mehoo ea thabo,

ke utloe le mehoo ea nyakallo,

litho tsa ka li tle li hlasimolohe,

litho tseo u li robileng.

₁₁Nteballe libe tsa ka,

u hlakole melato ea ka kaofela.

₁₂Oho, Molimo, ak'u bōpe ka ho 'na,

u bōpe pelo e hloekileng,

u kenye moea o mocha, o tiileng,

u o kenye ka sefubeng sa ka.

₁₃U se ke ua ntelekela hōle le uena,

ua nkamoha Moea oa hao

Moea o Halalelang.

₁₄Ak'u mpuseletse nyakallo,

nyakallo ea ho pholosoa ke uena,

u 'matlafatse ka moea oa boitelo.

₁₅Ba etsang liphoso ke tla ba ruta

ke ba rute litsela tsa hao,

'me baetsalibe

ba tla khutlela ho uena.

₁₆Molimo, Molimo ea mpholosang,

ak'u ntopolle kahlōlong ea lefu,

leme la ka le tumise

ho loka ha hao.

₁₇Oho, Morena,

ak'u rarolle leleme la ka,

molomo oa ka

o phatlalatse thoriso ea hao.

₁₈Ha u khahloe ke mahlabelo;

leha nka u nyehella ka secheso,

u ke ke ua se amohela.

₁₉Sehlabelo se ratoang ke Molimo:

ke moea o soabileng;

ke pelo e soabileng, e hlomohileng;

oho, Molimo, u ke ke ua e khesa.

₂₀Haeba u ka khahloa,

ak'u etsetse Sione molemo,

u tsose marako a Jerusalema.

₂₁Ke moo u tla khahlisoa

ke mahlabelo a lokelang,

licheso le linyehelo tse chesoang;

'me ho tla nyeheloa ka lipohoana,

ho nyeheloe ka tsona aletareng ea hao.