Babusi ba khopo ba otloe ke Molimo
1Pesalema ea Davida. Taelo ho motsamaisi oa libini: E binoe ka 'mino oa sefela sa “U se ke ua senya”.
2Lōna babusi, na ruri
le ahlōla ka ho loka?
Na le ahlōla batho ka toka?
3Che, ka lipelong tsa lōna
le rera tse khopo,
lefatšeng le etsa tse sehlōhō,
le lietsa ka matsoho a lōna.
4Ba khopo ba senyehile
ho tloha pōpelong,
ba leshano ba khelohile
ho tloha tsoalong ea bona.
5Mahlōkō a bona
a tšoana le mahlōkō a nōha;
ba ithibile litsebe
sa marabe ea manganga,
6ea sa utloeng lentsoe
la ea mo oeoeletsang,
la ea mo bōbisang ka bohlale ba hae.
7Oho, Molimo,
pshatla meno a bona,
a pshatlelle ka mahanong a bona;
oho, Morena, motsula meno,
meno a mekoetsepe a litaoana.
8Ba ke ba nyamele
sa metsi a phallang,
ba ke ba omelle
sa joang bo hataketsoeng.
9Ba ke ba qhibilihe
sa khofu ha e ntse e tsamaea,
ba be joaloka sefolotsana,
sona se sa boneng letsatsi.
10Etlare ba e-s'o lemohe
a ba fōthōle sa hlabahlabane,
a ba fefole sa lehōla ka khalefo,
ka khalefo ea hae e tukang.
11Ea lokileng o tla thaba
ha a bona phetetso,
o tla hlatsoa maoto a hae
ka mali a ba khopo.
12Batho ba tla re:
“Ruri, ea lokileng o neoa moputso;
ruri, Molimo o teng,
o ahlōla batho lefatšeng.”
