Koli-ea-malla kamora' ho senngoa ha Tempele
1Thothokiso ea Asafo, e nang le thuto.
Molimo, na u re lahletse ruri?
Ke'ng ha u halefela mohlape,
mohlape oa makhulo a hao,
u o halefela ka bohale bo tukang?
2Ak'u hopole phutheho ea hao,
eo e bileng leruo la hao
leruo la hao ho tloha khale,
eo u e lopolotseng,
molōko oo e leng lefa la hao;
le thaba ea Sione
eo u ahileng ho eona.
3Lebisa mehato ea hao lithakong,
lithakong tseo tsa khale,
sera se sentse tsohle
tse ka Sehalalelong.
4Ba u loantšang ba puruma,
ba puruma ba le Sehalalelong sa hao,
ba hlomile mekhele ea bona,
ba e hloma e le pontšo ea tlhōlo.
5Ba tšoana le ba kenang morung,
ba kenang teng ka lilepe;
6mekhabiso eohle ea eona ea lehong,
ba e pshatlile ka likoakoa,
ba e pshatla le ka likoto.
7Ba chesitse Sehalalelo sa hao,
ba heletsa,
ba tlontlolla Leaho la hao.
8Ka lipelong tsa bona ba itse:
“A re ba hatakeleng
kaofela ha bona,
re chese libaka tsohle tsa phutheho,
tsa phutheho ea Molimo
naheng ena.”
9Ha re sa na pontšo
tse tsoang ho Molimo,
ha ho sa le moporofeta;
har'a rōna ha ho le ea mong
ea tsebang hore
ho tla ba joalo ho fihlela neng.
10Molimo, ea u loantšang,
o tla u nyefōla ho fihlela neng?
Na sera se tla u nyelisa,
se nyelise lebitso la hao kamehla?
11U sa tšoaretse'ng
letsoho la hao?
U patetse'ng
letsoho la hao le letona,
ua le pata sefubeng se hao?
12Athe Molimo, u khosi ea ka
ho tloha mehleng ea khale,
uena mohloli oa topollo lefatšeng.
13Ke uena ea ileng a arohanya leoatle,
ua le arohanya ka matla a hao,
ua pshatla hlooho tsa likhanyapa,
ua li pshatlela leoatleng.
14ua li thuakanya lihlooho,
ua li abela litlhapi
e be lijo tsa tsona.
15Ke uena ea ileng a bulela liliba,
ua bulela le linōkana,
ua pshesa linōka
tse phallang kamehla.
16Motšeare ke oa hao,
le bosiu ke ba hao;
khoeli le letsatsi u li beile,
ua li bea malulong a tsona.
17Ke uena ea ileng a seha meeli,
ua seha meeli eohle ea lefatše,
lehlabula le mariha
li entsoe ke uena.
18Morena, ak'u hopole
kamoo sera se u nyefōlang kateng,
kamoo sechaba sa lithoto
se nyelisang lebitso la hao kateng.
19Se neele sebata
moea oa Leeba la hao,
bophelo ba mafutsana a hao
u se bo leballe ruri.
20Ak'u hopole selekane sa hao,
hobane liqhobo tsohle tsa naha
li tletse ba sehlōhō.
21Ea hatelloang
a se ke a hlajoa ke lihlong,
mohlōphehi le mofutsana
ba rorise lebitso la hao.
22Tsoha Molimo, u itoanele,
hopola hore sethoto sea u nyefola,
se u nyefōla ka matsatsi 'ohle.
23Se lebale ho rora ha ba u loantšang,
ho eketseha ha lerata
la ba u tsohelang matla.
