Ke Molimo ea phelisang sechaba
1Pesalema ea bara ba Kora, e qapetsoeng motsamaisi oa libini.
2Morena, u ile ua khahloa,
ua khahloa ke lefatše la hao,
ua khutlisa ba lelōko la Jakobo,
ua ba khutlisa bothōpuoeng.
3U ile ua leballa sechaba sa hao,
ua se leballa molato oa sona,
ua se tšoarela libe tsohle tsa sona.
4U ile ua kokobetsa
bohale bohle ba hao,
ua khutla khalefong ea hao e tukang.
5Ak'u boele u re khutlise, Molimo,
uena mopholosi oa rōna,
u felise khalefo ea hao ho rōna.
6Na u tla 'ne u re halefele kamehla?
Na khalefo ea hao
e ke ke ea khaotsa
ho isa melōkong e tlang?
7Na u ke ke ua boela ua re phelisa,
sechaba sa hao se tle se u thabele?
8Morena, ak'u re bontše
mohau oa hao,
'me u re pholose.
9A nke ke utloe
seo Morena Molimo a se bolelang,
hobane o tla bolella sechaba sa hae
le batšepuoa ba hae tsa khotso,
e le hore ba se ke ba khutla,
ba khutlela bothotong ba bona.
10Ruri ho pholosa ha hae
ho haufi le ba mo tšabang,
e le hore tlōtla ea hae
e tle e ahe fatšeng la rōna.
11Mohau le botšepehi li tla kopana,
ho loka le khotso li tla akana.
12Botšepehi bo tla rōpōha lefatšeng,
ho loka ho tla theoha leholimong.
13Morena o tla fana ka tse molemo,
fatše la rōna le be le chai e kholo.
14Ho loka ho tla mo etella pele,
khotso e fumanoe mehlaleng ea hae.
