LIPESALEMA 9

₂Morena, ke u boka

ka pelo ea ka eohle,

ke bolela limakatso tsohle tsa hao.

₃Kea u thabela,

ke nyakallela ho uena;

ke roka lebitso la hao,

uena Ea Holimo-limo.

₄Lira tsa ka li chechile ka santhao,

li khopiloe, tsa timela ha u hlaha,

₅hobane u emetse nyeoe ea ka

le litokelo tsa ka,

u lutse teroneng ea hao

u le moahlōli ea lokileng.

₆U khalemetse lichaba,

ua timetsa ba khopo,

mabitso a bona ua a hlakolela ruri.

₇Lira li ripitletsoe ruri;

metse ea tsona u e fetotse masupi,

ha e sa tla hlola e hopoloa.

₈Empa Morena o busa kamehla,

terone ea hae o e theetse ho ahlōla.

₉O ahlōla lefatše ka toka,

lichaba o li ahlōla a se na leeme.

₁₀Morena e ke e be qhobosheane

ea ba hatelloang,

qhobosheane

nakong ea matšoenyeho.

₁₁Ba tsebang lebitso la hao

ba ke ba u tšepe,

ba u tšepe hobane uena, Morena,

u ke ke ua furalla ba u batlang.

₁₂Rokang Morena ea busang Sione,

phatlalatsang liketso tsa hae,

le li phatlalatse har'a lichaba

₁₃hobane ea phetetsang mali

o hopola bahlōphehi,

ha a lebale sello sa bona.

₁₄Nkhauhele Morena,

talima kamoo

ke hlōphehileng kateng,

ke hlōphehile

ka baka la ba ntlhoileng,

uena ea 'nyolotseng khorong

ea motse oa bafu,

₁₅e le hore

ke tle ke bolele lithoko tsa hao,

ke li bolele

khorong ea motse oa Sione,

'me ke nyakalle

hobane u mpholositse.

₁₆Lichaba li oetse lemeneng

leo li le chekileng,

maoto a tsona a tšoasitsoe

ke leraba leo li le chehileng.

₁₇Morena o itsebahalitse,

o phethahalitse kahlōlo,

ba khopo ba khatiloe ke mesebetsi,

mesebetsi ea liatla tsa bona.

₁₈Ba khopo ba ikela Qalong ea Bafu:

chaba tsohle

tse sa reng letho ka Molimo.

₁₉Mafutsana a ke ke a leballoa ruri,

tšepo ea bahlōphehi

e ke ke ea fetoha lefeela.

₂₀Thusa, Morena!

Motho a se ke a khantša matla,

lichaba li ahlōloe kapel'a hao.

₂₁Li kenye letsoalo, Morena;

lichaba li ke li tsebe

hore e ntse e le batho feela.