Molimo oa phetetsa
1Morena,
uena Molimo ea phetetsang,
ak'u iponahatse,
uena Molimo ea phetetsang.
2Tsoha, uena moahlōli oa lefatše,
u nee baikhōhōmōsi
moputso oa bona.
3Ba khopo ba tla thaba
ho fihlela neng?
E tla ba ho fihlela neng, Morena?
4Baa hèhla, ba bua ka boikakaso,
bohle ba khopo baa ithorisa.
5Morena, ba hatakela sechaba sa hao,
ba hatella bao e leng lefa la hao.
6Ba fenetha mohlolohali le mojaki,
ba bolaea le likhutsana.
7Ba re: “Morena ha a bone,
Molimo oa Jakobo ha a lemohe.”
8Utloisisang,
lōna sechaba sa maoatla;
lithoto ting! le tla hlalefa neng?
9Na ea entseng tsebe
a ke ke a utloa?
Ea bōpileng leihlo
na a ke ke a bona?
10Na eena ea khalemelang lichaba
a ke ke a li otla,
eena ea rutang batho bohlale?
11Morena o tseba mehopolo ea motho,
oa tseba hore ke lefeela.
12Morena, ho lehlohonolo motho
eo u mo khalemelang,
eo u mo rutang ka Molao oa hao,
13hore u tle u mo khatholle,
o mo khatholle matsatsing a mabe,
ha ba khopo bona
ba chekeloa lemena.
14Morena a ke ke a furalla
chaba sa hae,
a ke ke a lahla
bao e leng lefa la hae.
15Likahlōlo
li tla boela li etsoa ka toka,
bohle ba pelo li ntle ba tla e latela.
16Ke mang ea tla ntšireletsa
ho ba khopo?
Ke mang ea tla mpuella
ho ba bolotsana?
17Hoja Morena a se ke a nthusa,
nkabe ke se ke robetse lebitleng.
18Moo ke reng:
“Leoto la ka lea thella,”
mohau oa hao
oa ntšehetsa, Morena.
19Ha pelo ea ka e touta haholo,
matšeliso a hao
a hlabolla moea oa ka.
20Na u ka ba le kopano le baahlōli,
baahlōli ba khopo,
ba fetolang bobe molao?
21Ba ikopanya 'moho
ho felisa bophelo ba ea lokileng,
ba ahlōlela ea se nang molato lefu.
22Empa Morena
ke qhobosheane ea ka,
Molimo oa ka ke lefika
leo ke tšabelang ho lona.
23O tla ba buseletsa bokhopo ba bona,
a ba timetse
ka baka la bobe ba bona.
Morena Molimo oa rōna,
o tla ba timetsa.
