Sefela sa ba 144 000
1Joale ka talima, 'me ka bona Konyana e eme holim'a thaba ea Sione, e e-na le ba likete tse lekholo le mashome a mane a metso e mene, bao liphatleng tsa bona ho neng ho ngotsoe lebitso la eona, le lebitso la Ntat'a eona. 2Ka utloa molumo o tsoang leholimong, o kang molumo oa metsi a leoatle, o kang molumo o tšabehang oa letōlō. Molumo oo ke ileng ka o utloa e ne e ka oa baletsi ba liharepa, ba letsang liharepa tsa bona. 3Ba ne ba bina sefela se secha, ba le kapele ho terone, le ho libōpuoa tse 'ne tse phelang, le ho baholo. Ho ne ho se motho ea ka tsebang sefela seo, haese feela bao ba likete tse lekholo le mashome a mane a metso e mene, e leng ba lopolotsoeng lefatšeng. 4Bana ke bao esaleng ba hloekile, ba sa kang ba itšilafatsa ka basali; ke ba latelang Konyana hohle moo e eang teng. Bana ba lopolotsoe har'a batho, ho ba nyehelo ea pele ho Molimo le ho Konyana. 5Leshano ha lea ka la fumanoa melomong ea bona; ha ba na letheba.
Melaetsa ea mangeloi a mararo
6Joale ka bona lengeloi le leng le fofa holimo-limo, sebakeng, le il'o phatlalatsa molaetsa o molemo, o sa feleng, ho baahi ba lefatše, ba mefuta eohle, le ba melōko eohle, le ba lipuo tsohle, le ba lichaba tsohle. 7La bua ka lentsoe le phahameng, la re: “Tšabang Molimo, le mo tlotlise, hobane nako ea hae ea ho ahlōla e se e fihlile. Khumamelang ea entseng leholimo, le lefatše, le leoatle, le liliba.”
8Eaba lengeloi le leng, e leng la bobeli, le latela leo ka ho re: “E oele! E oele! Babilona e kholo, eona e tahisitseng lichaba tsohle ka joala ba bohale ba bohlola ba eona!”
9Eaba lengeloi le leng, e leng la boraro, le latela ao ka ho bua ka lentsoe le phahameng, le re: “Haeba mang kapa mang a ka khumamela sebatana le setšoantšo sa sona, 'me a fumanoa a e-na le letšoao la sona phatleng ea hae, kapa letsohong la hae, 10le eena o tla noa joala bo qhatselitsoeng senoelong sa khalefo ea Molimo bo sa hlapolloa, e leng joala ba bohale ba Molimo, 'me o tla hlōkōfatsoa ka mollo le sebabole, kapele ho mangeloi a halalelang, le kapele ho Konyana. 11Mosi oa tlhōkōfatso ea batho bao o tla fōqōhela holimo kamehla le mehla. Ba khumamelang sebatana le setšoantšo sa sona, le bohle ba fumanoang ba e-na le letšoao la sona, ha ba ka ke ba phomola motšeare le bosiu.” 12Mona ho batleha tiisetso ea balumeli ba bōlōkang litaelo tsa Molimo le tumelo ho Jesu.
13Eaba ke utloa lentsoe le tsoang leholimong, le re: “Ngola. Ho tloha joale, ho lehlohonolo bafu ba shoetseng tšebeletsong ea Morena.”
“E,” ho rialo Moea, “ba tla phomotsoa mekhathaleng ea bona, hobane mesebetsi ea bona e tla ba sala morao.”
Ho kotuloa ha lefatše
14Joale ka talima, 'me ka bona leru le lesoeu, holim'a lona ho lutse ea kang Mor'a Motho, hloohong a roetse mofapahlooho oa khauta, letsohong a tšoere sekele e bohale. 15Lengeloi le leng la tsoa tempeleng, 'me ka lentsoe le phahameng la hōoeletsa ea lutseng holim'a leru, la re: “Akhela sekele ea hao, u kotule, hobane nako ea ho kotula e fihlile, tse kotuloang tsa lefatše li butsoitse.” 16Eaba ea lutseng holim'a leru o akhela sekele ea hae lefatšeng, 'me lefatše la kotuloa.
17Lengeloi le leng hape la tsoa tempeleng e leholimong, le lona le tšoere sekele e bohale. 18Hape ha tsoa lengeloi le leng aletareng, e le le nang le matla a ho laola mollo, 'me ka lentsoe le phahameng la hōoeletsa ea tšoereng sekele e bohale, la re: “Akhela sekele ea hao e bohale, u khe masihla a morara oa lefatše, hobane litholoana tsa oona li butsoitse.” 19Eaba lengeloi le akhela sekele ea lona lefatšeng, le kha morara oa lefatše, le o akhela ka setlhōtlelong se seholo sa bohale ba Molimo. 20Setlhōtlelo seo sa hatikeloa se le kantle ho motse, 'me sa tsoa mali a ileng a phutsalla sebakeng se ka etsang likilomethara tse makholo a mararo, botebo ba 'ona e le bo ka fihlang litōmong tsa lipere.
