Molaetsa o eang Efese
1“Ngolla moruti oa kereke e Efese, u re:
“Tsena li boleloa ke ea tšoereng linaleli tse supileng ka letsohong la hae le letona, ea tsamaeang har'a liluloana tsa mabone tsa khauta tse supileng, 2o re: Ke tseba mesebetsi ea hao, le boikhathatso ba hao, le tiisetso ea hao, le hore ha u ka ke ua mamella ba khopo. U ile ua hlahloba ba reng ke baapostola, empa e se bona, 'me ua fumana hore ba leshano. 3U tiiselitse, ua mamella matšoenyeho ka baka la lebitso la ka, ua se ke ua khathala.
4“Leha ho le joalo, seo ke se nyatsang ho uena ke hore ha u sa nthata joaloka pele. 5Hopola hè, hore na u oele ha u le hokae; u bake, 'me u boele u phethe mesebetsi ea hao ea pele. Ho seng joalo, ke tla tla ho uena, ke tlose seluloana sa lebone la hao tulong ea sona, haeba u sa bake. 6Empa se molemo seo u nang le sona ke sena: U hloile mesebetsi ea balateli ba Nikola, eo le 'na ke e hloileng.
7“Ea nang le litsebe a ke a utloe seo Moea o Halalelang o se bolellang likereke. Ea hlōlang ke tla mo nea tokelo ea ho ja sefate sa bophelo, se ka paradeising ea Molimo.”
Molaetsa o eang Semirna
8“Ngolla moruti oa kereke e Semirna, u re:
“Tsena li boleloa ke eo e leng Oa Pele le Oa ho Qetela, ea ileng a shoa, a boela a phela, 9o re: Ke tseba matšoenyeho le bofutsana ba hao; leha ho le joalo, u ruile. Ke tseba linyefolo tsa ba reng ke Bajuda, empa e se bona, e le ba phutheho ea Satane. 10U se tšabe letho la tse tlang ho u hlōkōfatsa. Bona, Diabolosi o tla akhela ba bang ba lōna chankaneng, e le hore le tle le lekoe, 'me le hlorisoe ka matsatsi a leshome. U tšepahale ho isa lefung; ke tla u nea mofapahlooho oa bophelo.
11“Ea nang le litsebe a ke a utloe seo Moea o Halalelang o se bolellang likereke. Ea hlōlang ha a ka ke a ntšoa kotsi ke lefu la bobeli.”
Molaetsa o eang Peregamose
12“Ngolla moruti oa kereke e Peregamose, u re:
“Tsena li boleloa ke ea tšoereng sabole e bohale, e sehang kamahohle, 13o re: Ke tseba moo u ahileng teng: Ke moo terone ea Satane e leng teng. Empa u khomaretse lebitsong la ka, 'me ha ua ka ua latola tumelo ea hao ho 'na, esita le mohla Antipase, paki ea ka e tšepahalang, a neng a bolaeloa ha habo lōna, moo Satane a ahileng teng.
14“Leha ho le joalo, ho na le tse seng kae tseo ke li nyatsang ho uena. Moo haeno, u na le ba khomaretseng thutong ea Bileame, ea ileng a ruta Balake ho lihela bana ba Iseraele sebeng, ka ho re ba je tse hlabetsoeng melimo ea bohata, ba etse le bohlola. 15Hape u na le ba bang ba khomaretseng thutong ea balateli ba Nikola. 16Baka hè! Ho seng joalo, ke tla tla ho uena kapele, 'me ke tla ba loantša ka sabole e tsoang ka molomong oa ka.
17“Ea nang le litsebe a ke a utloe seo Moea o Halalelang o se bolellang likereke. Ea hlōlang ke tla mo nea tokelo ea ho ja manna a patiloeng. Ke tla mo nea lejoe le lesoeu, 'me lejoeng leo ho tla ngoloa lebitso le lecha, leo ho seng motho ea le tsebang, haese feela ea le amohelang.”
Molaetsa o eang Thiatira
18“Ngolla moruti oa kereke e Thiatira, u re:
“Tsena li boleloa ke Mora oa Molimo, eo mahlo a hae a kang malakabe a mollo, le maoto a hae a benyang joaloka lethose, 19o re: Ke tseba mesebetsi ea hao, le lerato, le tumelo, le bosebeletsi, le tiisetso ea hao, 'me mesebetsi ea hao ea ho qetela e feta ea pele ka bongata.
20“Leha ho le joalo, seo ke se nyatsang ho uena ke hore u lumella Jesabele, mosali ea reng ke moporofeta, ho khelosa bahlanka ba ka, ka ho ba ruta ho etsa bohlola, le ho ja tse hlabetsoeng melimo ea bohata. 21Ke mo file nako ea hore a bake, empa o hana ho bakela bohlola ba hae. 22Bona, ke mo akhela liphateng tsa bohlōkō, 'me ba etsang bohlola le eena ke tla ba kenya matšoenyehong a maholo, haese ha ba ka bakela liketso tsa bona. 23Ke tla bolaea bana ba hae; likereke tsohle li tla tseba hore ke 'na ea bonang se ka mehopolong le ka lipelong tsa batho, 'me ke putsa e mong le e mong oa lōna ho ea ka mesebetsi ea hae. 24Empa ho lōna bohle ba Thiatira ba sa amoheleng thuto ena, le ba sa tsebeng hoo ho thoeng ke bofihla ba Satane, ke re: Ha ke le belese mojaro o mong hape. 25Feela le khomarele ho seo le nang le sona, ho fihlela ke e-tla.
26“Ea hlōlang, ea phethang mesebetsi ea ka ho isa qetellong,
“ke tla mo nea matla
holim'a lichaba;
27o tla li busa ka lere la tšepe,
a li pshatle
joaloka linkho tsa letsopa,
28“joalokaha le 'na ke neiloe matla ke Ntate. Ke tla mo nea le naleli ea meso.”
29“Ea nang le litsebe a ke a utloe seo Moea o Halalelang o se bolellang likereke.”
