Leholimo le lecha le lefatše le lecha
1Joale ka bona leholimo le lecha, le lefatše le lecha, hobane leholimo la khale le lefatše la khale li fetile, 'me leoatle ha le sa le eo. 2Ka boela ka bona motse o halalelang, Jerusalema e ncha, o theoha leholimong, ho Molimo, o hlophehile hantle, joaloka monyaluoa ha a ikhabiselitse monyali oa hae. 3Ka utloa lentsoe le phahameng, le tsoang teroneng, le re: “Bona, leaho la Molimo ke leo har'a batho. O tla aha le bona; bona e tla ba sechaba sa hae, 'me Molimo ka sebele a be le bona, e le Molimo oa bona. 4O tla hlakola meokho eohle mahlong a bona, 'me lefu ha le sa tla hlola le e-ba teng, esita le mahlomola, kapa lillo, kapa bohlōkō, hobane tsa khale li fetile.”
5Ea lutseng teroneng a re: “Bona, ke nchafatsa tsohle.” A ba a re: “Ngola: Lipolelo tsena lia tšepahala, ke tsa 'nete.”
6A nt'o re: “Ho phethahetse. Ke 'na Alfa le Omega, Qalo le Qetello. Ea nyoriloeng ke tla mo noesa selibeng sa metsi a bophelo a fanoang feela. 7Ea hlōlang e tla ba mojalefa oa tsena; ke tla ba Molimo oa hae, 'me eena e be mora oa ka. 8Empa ha e le makoala, le ba sa tšepahaleng, le ba etsang tse manyala, le babolai, le lifebe, le baloi, le ba khumamelang melimo ea bohata, le bohle ba buang leshano, kabelo ea bona ke letša le tukang mollo oa sebabole, ke hore lefu la bobeli.”
Jerusalema e ncha
9Joale le leng la mangeloi a supileng a nkileng mafisoana a supileng, a tletseng likotlo tse supileng tsa qetello, la tla, la bua le 'na, la re: “Tloo, ke u bontše monyaluoa, mohats'a Konyana.” 10La nkisa ka moea thabeng e kholo, e telele, 'me la mpontša motse o halalelang, Jerusalema, o theoha leholimong, ho Molimo. 11O ne o khanya tlōtla ea Molimo, 'me khanya ea oona e ne e ka ea lejoe la bohlokoa, e le joaloka ea lejoe la jasepere le kang lehakoe. 12O ne o sirelelitsoe ke lerako le letenya, le phahameng, le nang le likhoro tse leshome le metso e 'meli, tse lebetsoeng ke mangeloi a leshome le metso e 'meli. Likhorong ho ne ho ngotsoe mabitso, e leng mabitso a melōko e leshome le metso e 'meli ea bara ba Iseraele. 13Ho ne ho e-na le likhoro tse tharo ka nq'a bochabela, likhoro tse tharo ka nq'a leboea, likhoro tse tharo ka nq'a boroa, le likhoro tse tharo ka nq'a bophirimela. 14Lerako la motse le ne le e-na le majoe a leshome le metso e 'meli a mothèo, ao ho 'ona ho ngotsoeng mabitso a baapostola ba leshome le metso e 'meli ba Konyana.
15Lengeloi le neng le bua le 'na le ne le tšoere leqala la khauta le methang, le tle le methe motse, le likhoro tsa oona, le lerako la oona. 16Motse o ne o e-na le likhutlo tse 'ne, bolelele ba oona bo ne bo lekana le bophara ba oona. Lengeloi la metha motse ka leqala la lona: o ne o etsa likilomethara tse fetang likete tse peli; bolelele, bophara le bophahamo li ne li lekana. 17La ba la metha lerako la motse: le ne le etsa limethara tse mashome a supileng, ho ea ka tekanyo e tloaelehileng, eo lengeloi le neng le e sebelisa. 18Lerako le ne le hahiloe ka mahakoe a jasepere; motse oona e ne e le oa khauta e hloekileng, e joaloka khalase e hloekileng. 19Majoe a mothèo a motse a ne a khabisitsoe ka majoe a bohlokoa, a mefuta-futa. Lejoe la mothèo la pele e ne e le la jasepere, la bobeli e le la safire, la boraro e le la akate, la bone e le la emeraleda, 20la bohlano e le la oniki, la botšelela e le la kareneleane, la bosupa e le la kirisolithe, la borobeli e le la berile, la borobong e le la topase, la leshome e le la kirisopase, la leshome le motso o mong e le la turukose, la leshome le metso e 'meli e le la ametise. 21Likhoro tse leshome le metso e 'meli e ne e le tsa mabenyane a bohlokoa a leshome le metso e 'meli; khoro e 'ngoe le e 'ngoe e betliloe ka lebenyane la bohlokoa le le leng. Lebala la motse e ne e le la khauta e hloekileng, e bonaletsang joaloka khalase.
22Ha kea ka ka bona tempele motseng oo, hobane tempele ea oona ke Morena, Molimo ea matla 'ohle, le Konyana. 23Motse ha o hloke letsatsi kapa khoeli ho o bonesetsa, hobane tlōtla ea Molimo ea o khantšetsa, 'me lebone la oona ke Konyana. 24Lichaba li tla tsamaea leseling la oona, le likhosi tsa lefatše li tla o tlisetsa maruo a tsona. 25Likhoro tsa oona e tla be esale li butsoe motšeare oohle, hobane ho oona bosiu ha bo sa tla ba teng. 26Maruo le matlotlo a lichaba a tla tlisoa motseng oo. 27Ha ho letho le ilehang le tla kena ho oona, leha e le mang kapa mang ea etsang tse manyala, le tseo e seng tsa 'nete, empa ho oona ho tla kena feela bao mabitso a bona a ngotsoeng bukeng ea bophelo ea Konyana.
