TŠENOLO 8

₁Eitse ha Konyana e khomarolla sebitielo sa bosupa, leholimong ha khutsa nako e ka bang halofo ea hora.

₂Eaba ke bona mangeloi a supileng, a emeng kapele ho Molimo, a neoa literompeta tse supileng.

₃Lengeloi le leng la tla, la ema pel'a aletare le tšoere pitsa ea khauta eo ho chesetsoang mokubetso ka ho eona. La neoa mekubetso e mengata, hore le tle le nyehele ka eona, le ka lithapelo tsa bahalaleli bohle, holim'a aletare ea khauta e kapele ho terone. ₄Mosi oa mokubetso, hammoho le lithapelo tsa bahalaleli, oa nyolohela ho Molimo o e-tsoa letsohong la lengeloi. ₅Eaba lengeloi le nka pitsa eo ho chesetsoang mokubetso ka ho eona, le e tlatsa ka mollo o tsoang aletareng, 'me le e akhela lefatšeng. Ha e-ba le letōlō, le melumo, le mahalima, le tšisinyeho ea lefatše.

₆Joale mangeloi a supileng, a tšoereng literompeta tse supileng, a itokisetsa ho li letsa.

₇La pele la letsa terompeta, 'me sefako le mollo, li tsoakane le mali, tsa tšolohela lefatšeng. Karolo ea boraro ea lefatše ea e-cha, le karolo ea boraro ea lifate ea e-cha, le joang bohle bo botala ba e-cha.

₈Lengeloi la bobeli la letsa terompeta, 'me ho kang thaba e kholo ea mollo o tukang ha akheloa leoatleng. Karolo ea boraro ea leoatle ea fetoha mali; ₉karolo ea boraro ea libōpuoa tse phelang leoatleng ea e-shoa, le karolo ea boraro ea likepe ea timetsoa.

₁₀Lengeloi la boraro la letsa terompeta, 'me naleli e kholo, e tukang joaloka serumola, ea oa leholimong. Ea oela holim'a karolo ea boraro ea linōka, le holim'a liliba. ₁₁Lebitso la naleli eo ke Lengana. Karolo ea boraro ea metsi ea baba joaloka Lengana, 'me batho ba bangata ba e-shoa ka baka la ho noa metsi ana a mabe.

₁₂Lengeloi la bone la letsa terompeta, 'me kotlo ea oela karolo ea boraro ea letsatsi, le karolo ea boraro ea khoeli, le karolo ea boraro ea linaleli; e le hore ho fifatsoe karolo ea boraro ea tsona. Ha fifala karolo ea boraro ea motšeare le ea bosiu ka ho tšoana.

₁₃Ka talima, 'me ka utloa lentsoe la ntsu e fofang holimo-limo, sebakeng, e bua ka lentsoe le phahameng, e re: “Ho malimabe! Ho malimabe! Ho malimabe baahi ba lefatše, ka baka la melumo ea literompeta tseo mangeloi a mang a mararo a seng a tla li letsa!”