BAROMA 16

₁Khaitseli ea rōna Foibe, eo e leng mosebeletsi oa kereke e Kenkeria, ke 'mea paballong ea lōna. ₂Le mo amohele ka mokhoa o lokelang balumeli, hobane ke oa Morena. Le mo thuse tabeng efe le efe eo a ka hlokang thuso ea lōna ho eona, hobane le eena o thusitse ba bangata, esita le 'na ka sebele.

₃Ntumelisetseng Priseka le Akulase, bao re sebeletsang Kreste Jesu 'moho le bona, ₄ba ileng ba ipea kotsing ea lefu ka baka la ka. Kea ba leboha, e seng 'na feela, empa le tsona likereke tsohle tsa balichaba. ₅Lumelisang le kereke e phuthehelang ha bona. Lumelisang motsoalle oa ka Epainetose, eo e bileng oa pele naheng ea Asia ho ineela ho Kreste. ₆Lumelisang Maria, ea le sebelelitseng haholo. ₇Lumelisang Anaderonikose le Junia, bahaeso ba bileng litlamong 'moho le 'na, ba tumileng har'a baapostola, 'me ba ineetseng ho Kreste pele ho 'na. ₈Lumelisang Ampelease, motsoalle oa ka Moreneng. ₉Lumelisang Urebanose, eo re sebeletsang Kreste 'moho le eena, le motsoalle oa ka Setakuse. ₁₀Lumelisang Apelese, ea bontšitseng botšepehi ba hae ho Kreste. Lumelisang ba lelapa la Arisetobulose. ₁₁Lumelisang mohaeso Herodione. Lumelisang ba lelapa la Narekosise, hobane ke ba Morena. ₁₂Lumelisang Terufaina le Terufosa, ba sebeletsang Morena haholo. Lumelisang motsoalle Peresise, ea sebelelitseng Morena haholo. ₁₃Lumelisang Rufose, mokhethoa oa Morena, le 'm'ae, eo le 'na e leng 'mè. ₁₄Lumelisang Asunkiritose, Felegone, Heremese, Patarobase, Heremase, le bana babo rōna bohle ba nang le bona. ₁₅Lumelisang Filologose le Julia, Nereuse le khaitseli ea hae, le Olompase, le balumeli bohle ba nang le bona. ₁₆Lumelisanang ka kako e halalelang. Likereke tsohle tsa Kreste lia le lumelisa.

₁₇Bana beso, kea le rapela hore le falimehele ba bakang likarohano, ba le khelosang thutong eo le ithutileng eona. Le ba sesefe ₁₈hobane ba joalo ha ba sebeletse Morena oa rōna Kreste, empa ba sebeletsa limpa tsa bona. Ka lipuo tse monate, tse qekang, ba thetsa lipelo tsa ba se nang bobe. ₁₉Ho mamela ha lōna ho tsejoa ke bohle; ka baka leo, kea le thabela, 'me ke lakatsa hore le be bohlale ho tse lokileng, le se ikamahanye le tse mpe.

₂₀Molimo ea re fang khotso o tla etsa hore le ripitle Satane kapele-pele.

Mohau oa Morena oa rōna Jesu o ke o be le lōna.

₂₁Timothea, eo re sebetsang 'moho le eena, oa le lumelisa; le bahaeso bo-Lōsiase, le Jasone, le Sosipaterose, baa le lumelisa.

₂₂Le 'na Teretiose, ea ngotseng lengolo lena, kea le lumelisa Moreneng.

₂₃Gaiose, eo ke leng moeti oa hae, eo le kereke eohle e phuthehelang ha hae, oa le lumelisa.

Erasetose, ramatlotlo oa motse, le ngoan'abo rōna Kuaretose, baa le lumelisa. ₂₄Mohau oa Morena oa rōna Jesu Kreste o ke o be le lōna bohle. A ho be joalo!

₂₅Ho tlotlisoe ea nang le matla a ho le tiisa ka molaetsa o molemo oa ka, le ka thuto ea Jesu Kreste, le ka tšenolo ea sephiri se neng se patehile ho tloha tšimolohong, ₂₆empa joale se senotsoe ka Mangolo a boporofeta ho ea ka taelo ea Molimo ea sa feleng, se tsebisitsoe lichaba tsohle, hore li tle li be le mamelo e tsoang tumelong. ₂₇Tlōtla e ke e isoe, ka Jesu Kreste, ho Molimo ea bohlale a inotši, kamehla le mehla. A ho be joalo!