Ruthe o sebetsa masimong a Boase
1Naomi o ne a e-na le e mong oa habo monna oa hae. E ne e le monna ea ruileng, oa lelapa labo Elimeleke. Lebitso la hae e ne e le Boase.
2Ruthe oa ba Moabe a re ho Naomi: “Ntumelle ke ee masimong, ke e'o khoahlapisa koro tšimong ea ea ka nkhauhelang.”
Naomi a re ho eena: “E-ea, ngoan'aka.”
3Ruthe a ea, a fihla a khoahlapisa tšimong, a setse bakotuli morao. Ka lehlohonolo a kena tšimong eo e leng ea Boase, eo e neng e le oa morabe oabo Elimeleke. 4Boase a fihla moo, a e-tsoa Betlelehema, a re ho bakotuli: “Morena a be le lōna!”
Bona ba re ho eena: “Morena a u hlohonolofatse.”
5Joale Boase a botsa mohlanka oa hae, ea okametseng bakotuli, a re: “Ke morali oa mang eo?”
6Mohlanka a mo araba, a re: “Ke ngoanana oa ba Moabe, ea tlileng le Naomi ha a ne a khutla naheng ea Moabe. 7Ngoanana enoa o ile a nkōpa, a re: ‘Ak'u ntumelle ke sale bakotuli morao, ke khoahlapise, 'me ke bōkelle koro e pakeng tsa mangata.’ O ile a tla he, 'me haesale a khoahlapisa ho tloha hoseng, ho fihlela joale; ke hona a sa itseng khefu hanyenyane ka lephepheng!”
8Boase a re ho Ruthe: “Mamela mona, ngoan'aka: U se ke ua ea khoahlapisa tšimong e 'ngoe, 'me u se ke ua tloha mona. U sebetse mona le makhabunyane ana a ka. 9U shebe feela tšimo eo a e kotulang, u a sale morao. Ke laetse bahlanka ba ka hore ba se ke ba u tšoenya. Ha u nyoriloe, u ee linkhong, 'me u noe metsi a khiloeng ke bahlanka ba ka.”
10Ruthe a itihela fatše ka sefahleho, a isa hlompho, a re ho Boase: “Ke ka baka la'ng ha u nkhauhetse, 'me u nketse hloko, athe ke molichaba?”
11Boase a mo araba, a re: “Ke boleletsoe tsohle tseo u li etselitseng matsal'ao, haesale monna oa hao a e-shoa. Ke boleletsoe le kamoo u tlohetseng ntat'ao le 'm'ao kateng, le naha eo u tsoaletsoeng ho eona, ua tla sechabeng seo pele ho mona, u neng u sa se tsebe. 12Morena a ke a u putse ka baka la tseo u li entseng. Morena Molimo oa Iseraele, eo u tšabetseng katlas'a mapheo a hae, a ke a u nee moputso o phethahetseng.”
13Ruthe a re: “Ak'u nkhauhele, moren'a ka; u ntšelisitse, 'me u buile ka mosa ho lekhabunyane la hao, le hoja ke sa tšoane le le leng la makhabunyane ana a hao.”
14Ka nako ea lijo Boase a re ho eena: “Tloo koano, u tl'o ja bohobe, u bo qopetse ka veineng e bohla.” Ruthe a lula le bakotuli, 'me Boase a mo fa koro e halikiloeng. A ja, a khōra, a ba a li siea.
15Eitse ha a ema ho boela a khoahlapisa, Boase a laela bahlanka ba hae, a re: “Le mo tlohele a khoahlapise le har'a mangata, 'me le se ke la mo thibela. 16Le qhalanye maqhaoana a mang ka boomo, le a tlohele, a tle a a khoahlapise, 'me le se ke la mo omanya.”
17A khoahlapisa joalo masimong, ho fihlela ka phirimana. Eaba o pōla hoo a ho khoahlapisitseng, 'me koro eo ea etsa likilo tse leshome. 18A nka koro eo a e khoahlapisitseng, a ea motseng oa habo, a bontša matsal'ae seo a se khoahlapisitseng. A mo fa le lijo tse ileng tsa sala ha a e-ja lijo tsa motšeare.
19Matsal'ae a re ho eena: “Kajeno u tsoa khoahlapisa kae? U ne u sebetsa kae? Ho ke ho hlohonolofatsoe monna ea ileng a u hlokomela.”
Ruthe a bolella matsal'ae hore na eo a neng a sebetsa ho eena ke mang, a re: “Lebitso la monna eo ke neng ke sebetsa ho eena kajeno ke Boase.”
20Eaba Naomi o re ho ngoetsi ea hae: “Morena ea hauhelang ba phelang le ba shoeleng a ke a mo hlohonolofatse.” Naomi a eketsa, a re ho eena: “Monna eo ke seng le rōna, re tsoalana le eena.”
21Joale Ruthe oa Moabe a re: “O bile a re ho 'na: ‘U sebetse le bahlanka ba ka ho fihlela ba qeta ho hèla koro ea ka.’ ”
22Naomi a re ho ngoetsi ea hae, Ruthe: “Ho molemo ngoan'aka, hore u e'o sebetsa le makhabunyane ao a hae, esere ba u tšoenya ha u ka ea tšimong ea e mong.”
23Ka mokhoa o joalo Ruthe a 'na a khoahlapisa le makhabunyane a Boase ho fihlela ho qetoa ho hèloa harese le koro. Ruthe a 'na a lula le matsal'ae.
