SAKARIEA 10

₁Kōpang Morena

ho le fa pula, selemo,

kaha ho fèhla maru a pula

oa ho tseba.

O nesetsa batho

pul'a litloèbèlèlè,

a e nesetse bohle,

le lijalo har'a masimo.

₂Lipolelo tsa melingoana

ke tsa bohata,

pono tse bonoang ke linōhe

ke tsa leshano,

li bolela toro tse se nang 'nete.

Matšeliso a linōhe tsena

ha a na thuso;

sechaba se lelera sa mohlape-maitisi,

se tsielehile ke ho hloka molisa.

“Khalefo ea ka e tlōketse balisa,

kahoo baetapele bana ke tla ba otla.

Morena oa mabōtho

o tla baballa mohlape oa hae,

e leng ba ntlo ea Juda,

ba tšoane le pere e mabela ea ntoa.

₄Lejoe la mantlha le tla tsoa ho Juda,

thakhisa ea tente e tsoe ho eena,

seqha sa ntoa le sona

se tsoe ho eena,

le babusi bohle ba tla tsoa ho eena.

₅Bohle e tla ba linatla tsa batho,

lira tsa bona ba li hatakele,

ba li khotlelle liretseng ba le ntoeng.

Ba tla loana,

hoba Morena oa ba thusetsa,

bapalami ba lipere ba phase-phase.

₆“Ke tla matlafatsa ba ntlo ea Juda,

ba ntlo ea Josefa ke ba pholose.

ke tla ba khutlisetsa ha habo bona,

hobane ke ba utloela bohlōkō.

Ba tla ka bao ke ne ke e-s'o ba lahle,

hobane 'na ke Morena,

Morena Molimo oa bona,

ke tla amohela thapelo tsa bona.

₇Ba Efraime

e tla ba linatla tsa batho,

pelo tsa bona li nyakalle ke thabo,

li nyakalle, e ke ba noele veine.

Bana ba bona ba tla bona,

ba be ba thabe,

pelo tsa bona li nyakallele Morena.

₈Ke tla ba hoèhla,

ke ba khōbōkanye,

hobane ke 'na ea ba lopolotseng;

ba tla ba bangata sa mohl'a monene.

₉Leha ke ba qhalanyelitse

har'a balichaba,

ba tla 'ne ba nkhopole

ba le naheng tse hōle,

bona le bana ba bona ba tla phela,

ba be ba khutlele ha habo bona.

₁₀Ke tla ba khutlisa

naheng ea Egepeta,

ke ba phuthe, ba khutle Asiria.

Ke tla ba tlisa Gileade,

ke ba tlise le Lebanone,

ho fihlela naha tseo li sa ba lekane.

₁₁Ke tla ba tšelisa

leoatle la litlokotsi,

maqhubu a bilōhang ke a bōbise,

likoeetsa tsohle tsa Nile

ke li pshese.

Boikakaso ba Asiria

bo tla kokobetsoa,

puso ea Egepeta le eona e fele.

₁₂Matla a bona a tla tsoa ho Morena,

ba mo khumamele,

ba mo hlomphe,”