SAKARIEA 3

₁Morena a mpontša Joshua, Moprista e Moholo, a eme kapele ho lengeloi la Morena, le Satane a eme ka letsohong le letona la Joshua, a itokisetsa ho mo qōsa. ₂Morena a re ho Satane: “Uena Satane, Morena oa u khalemela! Morena ea ikhethetseng Jerusalema oa u khalemela! Na motho eo hase lefatsa le hutsoeng mollong le ntse le tuka?”

₃Joshua o ne a eme kapele ho lengeloi, a apere liaparo tse litšila. ₄Lengeloi la bua le ba neng ba eme kapele ho lona, la re: “Mo hlōbōliseng liaparo tsena tse litšila!”

La nt'o re ho Joshua: “Bona, ke felisitse bokhopo ba hao, 'me ke tla u apesa liaparo tse ntle-ntle.”

₅Eaba lengeloi le re: “Mo roeseng tuku e hloekileng hloohong.” Ba mo roesa tuku e hloekileng, ba mo apesa liaparo tse ntle-ntle, lengeloi la Morena le ntse le eme moo.

₆Lengeloi la Morena la nt'o laea Joshua, la re: ₇“Morena oa mabōtho o bua tjena: ‘Ha u ka tsamaea litseleng tsa ka, ua mamela litaelo tsa ka, u tla okamela Tempele ea ka le mabala a eona, 'me u tla ba mosebeletsi joaloka banna bana ba emeng mona.

₈“ ‘Oho, uena Joshua, Moprista e Moholo, uena le balekane ba hao ba lutseng kapele ho uena; lōna bohle ba lupang tse molemo, mamelang mona: Ke tla rōmela mohlanka oa ka, e leng Lekala! ₉Bonang, lejoe lena leo ke le beileng kapele ho Joshua ke lejoe le le leng, le nang le mahlakore a supileng, 'me ke tla ngola holim'a lona,’ ho rialo Morena oa mabōtho. ‘Ke tla felisa sebe sa naha ena ka tsatsi le le leng.

₁₀“ ‘Mohl'a tsatsi leo,’ ho rialo Morena oa mabōtho, ‘motho ka mong o tla mema oa habo, ba lule tlas'a sefate sa morara le tlas'a sefate sa feiee.’ ”