Mesebetsi ea Davida ha a le Jerusalema
1Joale khosi Hirame oa Tire a rōmela maqosa ho Davida; a ba a mo rōmella le mapolanka a kedare, le libetli tsa majoe le tsa mapolanka, ho ea mo hahela ntlo. 2Davida a elelloa hore Morena o mo tsitsisitse bokhosing ba Iseraele, hobane puso ea hae e ile ea atlehisoa haholo, ka baka la sechaba sa hae sa Iseraele.
Bana ba Davida ba tsoaletsoeng Jerusalema
3Davida a boela a nyala basali ba bang hape ha a le Jerusalema, 'me a tsoala bara le barali ba bang ba bangata. 4Ana ke mabitso a bana ba Davida, bao a ileng a ba tsoala ha a le Jerusalema: Shamua, le Shobabe, le Nathane, le Solomone, 5le Jibehare, le Eleshua, le Elepalete, 6le Noga, le Nefege, le Jafia, 7le Eleshama, le Beleada, le Elefelede.
Bafilesita baa hlōloa
8Ha Bafilesita ba utloa hore Davida o tlotsitsoe hore e be khosi ea naha ea Iseraele, ba futuha ho ea mo tsoma. Davida a utloela, 'me a ea ba khahlanyetsa. 9Bafilesita ba tla, ba fihla ba shatamana ka khohlong ea Refaime. 10Eaba Davida o botsa Morena, o re: “Na nka futuhela Bafilesita? Na u tla neelana ka bona matsohong a ka?”
Morena a re ho eena: “Futuha, hobane ke tla neelana ka bona matsohong a hao.”
11Eaba Davida o ba futuhela ha ba le Baale-Perasime, 'me a ba hlōlela hona moo. Joale Davida a re: “Molimo o phunyelelitse thekō ea lira tsa ka ka letsoho la ka, joaloka metsi ha a phatlōla lerako.” Ka baka leo, ba rea sebaka seo lebitso la Baale-Perasime. 12Bafilesita ba siea melimo ea bona hona moo, 'me Davida a laela hore e chesoe.
13Bafilesita ba boela ba shatamana ka khohlong. 14Ka baka leo, Davida a boela a botsa Molimo, 'me Molimo a re ho eena: “U se ke ua ba futuhela u ba setse morao; u ba pote ka nq'ane, u ba futuhele u hlaha ka lifateng tsa monōkōtšoai. 15E tle ere ha u utloa mohloathatsa holim'a lifate tsa monōkōtšoai, ebe ua futuha, hobane Molimo o tla be a u eteletse pele ho ea bolaea lebōtho la Bafilesita.” 16Ka baka leo, Davida a etsa kamoo Molimo a mo laetseng kateng, 'me Baiseraele ba phalalisa lebōtho la Bafilesita ho tloha Gibeone, ho ea fihla Gesere.
17Botumo ba Davida ba phatlalla le linaha tsohle, 'me Morena a etsa hore lichaba tsohle li mo tšabe.
