1 LIKETSAHALO 15

₁Davida a ikhahela matlo Motseng oa Davida, a lokisetsa areka ea Molimo sebaka sa eona, a e hlomela tente. ₂Eaba Davida o re: “Ho se be ea ka jarang areka ea Molimo, haese Balevi feela, hobane bona ba khethiloe ke Morena hore ba jare areka ea Molimo, 'me ba mo sebeletse kamehla eohle.”

₃Davida a khōbōkanyetsa Baiseraele bohle Jerusalema, hore ba ise areka ea Morena sebakeng seo a e lokiselitseng sona. ₄Davida a khōbōkanya bana ba Arone le Balevi. ₅Ho bara ba Kohate, hlooho ea bona e ne e le Uriele, bana babo ba le lekholo le mashome a mabeli. ₆Ho bara ba Merari, hlooho ea bona e ne e le Asaea, bana babo ba le makholo a mabeli le mashome a mabeli. ₇Ho bara ba Gereshone, hlooho ea bona e ne e le Joele, bana babo ba le lekholo le mashome a mararo. ₈Ho bara ba Elesafane, hlooho ea bona e ne e le Shemaea, bana babo ba le makholo a mabeli. ₉Ho bara ba Heborone, hlooho ea bona e ne e le Eleele, bana babo ba le mashome a robeli. ₁₀Ho bara ba Usiele, hlooho ea bona e ne e le Aminadabe, bana babo ba le lekholo le leshome le metso e 'meli.

₁₁Joale Davida a bitsa baprista, e leng Sadoke le Abiatare; a bitsa le Balevi, e leng Uriele, le Asaea, le Joele, le Shemaea, le Eleele, le Aminadabe. ₁₂Eaba o re ho bona: “Ke lōna lihlooho tsa malapa a Balevi; ka hona itlhoekiseng, lōna le bana babo lōna, le tle le tsebe ho tlisa areka ea Morena Molimo oa Iseraele, sebakeng seo ke e lokiselitseng sona. ₁₃Kahobane ha ea ka ea tlisoa ke lōna ka lekhetlo la pele, Morena Molimo oa Iseraele, o ile a re halefela, hobane re ne re sa ka ra mo hlompha ka mokhoa o tšoanetseng.”

₁₄Eaba baprista le Balevi baa itlhoekisa, hore ba tle ba tsebe ho lata areka ea Morena Molimo oa Iseraele. ₁₅Balevi ba jara areka ea Molimo ka mefeng, joalokaha Moshe a ne a ba laele, ho ea ka polelo ea Morena.

₁₆Davida a buisana le bao e leng lihlooho tsa Balevi, hore ba khethe bana babo bona ba tla bina ka liletsa, e leng likatara, le liharepa, le matlheretlhere, ba bine haholo, ba thabile. ₁₇Balevi ba khetha Hemane, mora oa Joele; ho bana babo ba khetha Asafo, mora oa Berekiea; ho bara ba Merari ba khetha Etane, mora oa Kushaea. ₁₈Ba ba hlahlamang ka boemo ea e-ba Sekariea, le Jaasiele, le Shemiramote, le Jeiele, le Uni, le Eliabe, le Benaea, le Maasiea, le Matiteea, le Elefelehu, le Mikeniea, le Obede-Edomo, le Jeiele, e leng balebeli ba monyako.

₁₉Libini tsena, bo-Hemane le Asafo, le Etane, tsa khetheloa hore li letse matlheretlhere a lethose. ₂₀Bo-Sekariea, le Jaasiele, le Shemiramote, le Jehiele, le Uni, le Eliabe, le Maasiea, le Benaea, ba letsa likatara tse lentsoe le lesesanyane. ₂₁Bo-Matiteea, le Elefelehu, le Mikeniea, le Obede-Edomo, le Jeiele, le Asasiea ba letsa liharepa tse lentsoe le letenya. ₂₂Kenaniea, eo e neng e le hlooho ea Balevi, o ne a okametse libini, a li ruta 'mino, kaha e ne e le kheleke.

₂₃Bo-Berekiea, le Elekana e ne e le balebeli ba areka. ₂₄Baprista, bo-Shebaniea, le Jehoshafate, le Netanele, le Amasai, le Sekariea, le Benaea, le Eleesere, bona ba ne ba letsa literompeta ba le kapele ho areka ea Molimo. Bo-Obede-Edomo le Jehiea e ne e le balebeli ba areka.

₂₅Joale bo-Davida, le baholo ba Iseraele, le balaoli ba bahlabani ba likete, ba ea tlung ea Obede-Edomo, ho ea lata areka ea selekane sa Morena, ba thabile. ₂₆Kahobane Molimo a ne a ile a thusa Balevi ba jereng areka ea selekane sa Morena, ba etsa nyehelo ka lipohoana tse supileng le lipheleu tse supileng. ₂₇Davida o ne a apere seaparo se setle, se entsoeng ka lesela la lene, esita le Balevi bohle ba neng ba jere areka, le libini, le Kenaniea, motsamaisi oa libini. Davida o ne a bile a apere le setipe se entsoeng ka motsitla. ₂₈Eaba Baiseraele bohle ba tlisa areka ea Morena ka litlatse, le ka melumo ea manaka, le ka literompeta, le ka matlheretlhere; ba letsa le likatara, le liharepa.

₂₉Eare ha areka ea selekane sa Morena e kena Motseng oa Davida, Mikale, morali oa Saule, a sheba ka fesetere, a bona Davida a tlala, a etsa menyakoe, 'me a mo nyelisa.