Maleme asele le boporofeta
1Fōlōfellang lerato. Labalabelang linèo tsa moea, haholo nèo ea ho porofeta. 2Motho ea buang ka leleme lesele ha a bue le batho, o bua le Molimo, hobane ha ho ea mo utloisisang. O bolela liphiri ka Moea o Halalelang. 3Ea porofetang o bua le batho, oa ba matlafatsa, oa ba khothatsa, oa ba tšelisa. 4Ea buang ka leleme lesele oa imatlafatsa, empa ea porofetang o matlafatsa phutheho. 5Nka thabela ha lōna bohle le ka bua ka maleme asele, empa nka thabisoa haholo ke ha le porofeta. Ea porofetang ke motho oa bohlokoa ho feta ea buang ka leleme lesele, haese haeba eena a ka itlhalosa, e le hore phutheho e matlafale.
6Joale, bana beso, ho tla le thusa ka'ng ha nka tla ho lōna, ke bua ka leleme lesele, ntle le haeba puo ea ka e le senolela tsa Molimo, kapa tsebo, kapa boporofeta, kapa thuto? 7Le liletsa tse sa pheleng, tse kang lekolilo le lekōōpe, ha li sa qaqolohanye linoto hantle, motho a ka tseba joang pina eo li e letsang? 8Hona haeba molumo oa terompeta o sa utloahale hantle, ke mang ea ka hlomellang ntoa? 9Le ho lōna ho joalo. Motho a ka le utloisisa joang haeba le bolela se sa utloahaleng hantle ka leleme lesele? Le tla be le pōlela kathōko ho seotlo. 10Lipuo li mefuta-futa mona lefatšeng, empa e 'ngoe le e 'ngoe ea utloahala. 11Ka baka leo, ha ke sa tsebe puo e buuoang, ea e buang e tla ba molichaba ho 'na, le 'na ke be molichaba ho eena. 12Kaha le lōna le labalabela linèo tsa Moea, batlang tse ngata tse tla matlafatsa phutheho.
13Ka baka leo, ea buang ka leleme lesele a rapelle hore a sitsoe ka nèo ea ho hlalosa se boleloang. 14Ha ke rapela ka leleme lesele, ho tla be ho rapela moea oa ka, empa kelello ea ka eona e robetse. 15Ke etse joang? Ke tla rapela ka moea, ke be ke rapele le ka kelello. Ke tla bina ka moea, ke be ke bine le ka kelello. 16Ho seng joalo, ha ho ka ba teng phuthehong motho eo e e-s'ong ho be Mokreste, o tla re “Amen!” joang thapelong ea hao ea teboho, athe ha a utloisise seo u se bolelang? 17Leha uena u rapetse hantle, thapelo ea hao ea teboho ha e thuse motho eo.
18Ke leboha Molimo, hobane ke tseba ho bua ka maleme asele ho le feta kaofela. 19Empa phuthehong nka rata ho bua mantsoe a mahlano, a utloisisoang, hore ke rute ba bang, ho e-na le ho bua mantsoe a likete-kete a sa utloahaleng.
20Bana beso, le se ke la nahana joaloka bana, le nahane joaloka batho ba baholo, empa le be masea ka nqeng ea bobe. 21Molaong ho ngotsoe, ho thoe:
“Ke tla bua le sechaba sena
ka maleme a batho basele,
ka maleme a balichaba;
leha ho le joalo
ha sea ka sa 'mamela,”
ho rialo Morena.
22Ho bua ka maleme asele ke pontšo e etsetsoang ba sa lumelang, e seng balumeli; athe nèo ea boporofeta ke ea balumeli, e seng ea ba sa lumelang. 23Ka baka leo, ha kereke eohle e phuthehetse sebakeng se le seng, 'me bohle ba bua ka maleme asele, joale ho kena bao e e-s'ong ho be Bakreste kapa ba sa lumeleng, na ha ba tl'o re lea hlanya? 24Empa haeba bohle ba porofeta, e mong ea sa lumeleng, kapa eo e e-s'ong ho be Mokreste, ha a kena o tla kholiseha, 'me a ahlōloe ke se buuoang ke bohle. 25Makunutu a pelo ea hae a tla senoleha. O tla itihela fatše, a khumamele Molimo, a phatlalatse, a re: “Ruri Molimo o teng har'a lōna.”
Tsohle li etsoe ka tšoanelo le ka molao
26Joale, ke tla re'ng bana beso? Ke re: Kamehla ha le phuthehile, e mong a bine sefela, e mong a rute, e mong a le senolele tsa Molimo, e mong a bue ka leleme lesele, e mong a hlalose puo eo. Tsena tsohle li etsetsoe ho matlafatsa phutheho. 27Haeba ho buuoa ka maleme asele, ho bue ba babeli, kapa ba sa feteng boraro; ba bue ka ho hlahlamana, 'me e mong a hlalose. 28Empa haeba ho se ea hlalosang, sebui le sona se thōle phuthehong; se mpe se bue ka pelo, se bue le Molimo.
29Ho ba porofetang ho bue ba babeli, kapa ba bararo, 'me ba bang ba ahlōle se boleloang. 30Haeba e mong, phuthehong, a senoleloa ho hong, ea ntseng a bua a thōle, ba bang ba ahlōle se boleloang. 31Bohle le ka porofeta, empa e be ka tlhahlamano, e le hore bohle ba tle ba ithute, 'me bohle ba khothatsoe. 32Eka khona baporofeta ba laole moea oa boporofeta oo ba nang le oona, 33hobane Molimo ke Molimo oa khotso, e seng oa moferefere.
Joaloka likerekeng tsohle tsa balumeli, 34eka khona basali ba thōle liphuthehong; ha baa lumelloa ho bua. Kamoo le Molao o bolelang kateng, ba lokela ho laoloa. 35Haeba ho e-na le seo ba lakatsang ho se tseba, eka khona ba botse banna ba bona ha ba le malapeng a bona, hobane ho lihlong hore mosali a bue phuthehong. 36Na ebe lentsoe la Molimo le tsoile ho lōna, kapa na ke lōna feela ba le amohetseng?
37Haeba e mong o teng ea lekanyang hore ke moporofeta, kapa o na le nèo ea Moea oa Molimo, eka khona a hlokomele hore tseo ke le ngollang tsona ke molao oa Morena. 38Empa haeba motho a sa amohele tsena, le eena a ke ke a amoheleha ho Molimo.
39Ka baka leo, bana beso, batlang nèo ea ho porofeta, le se ke la thibela ba buang ka maleme asele. 40Tsohle li etsoe ka tšoanelo le ka molao.
