Tšebetso ea baapostola
1Re ke re talingoe re le basebeletsi ba Kreste le baokameli ba sebetsanang le liphiri tsa Molimo. 2Ho batlehang ke hore mookameli ka mong a fumanoe a tšepahala. 3Ho 'na ha ho na taba ha ke ahlōloa ke lōna kapa ke lekhotla la lefatše; esita le 'na ha ke ikahlōle. 4Ha ke ipone molato oa letho, empa hona ha ho bolele hore ha ke na molato. Ea nkahlōlang ke Morena. 5Ka baka leo, le se ke la ahlōla e e-s'o be nako, Morena a e-s'o khutle, e leng eena ea tla senola tse lefifing, a pepese merero ea lipelo tsa batho. Ke moo e mong le e mong a tla fumana thoriso e mo lokelang ho Molimo.
6Joale, bana beso, ke tšoantšitse tsena ka rōna le Apolosi ka baka la lōna, e le hore le tle le ithute ka rōna ho se feteletse se ngotsoeng. Ho se be ea itjang ka e mong, empa a nyelisa e mong. 7Ana uena ke mang ea u nkelang holimo? Ke eng eo u nang le eona, eo u sa e fuoang ke Molimo? Joale haeba u e filoe, u ithorisetsa'ng joalokaha eka ha ua e fuoa?
8Le se le e-na le tsohle! Le se le ruile! Le renne le le bang! Hoja le fela le rena, le rōna re tle re rene le lōna! 9Ke bona eka rōna baapostola, Molimo o re entse ba ho qetela, joaloka ba ahlōletsoeng lefu. Re fetohile sebonoang-sebonoa-ke-bohle ho lefatše, ho mangeloi le ho batho. 10Rōna re lithoto ka baka la Kreste, empa lōna le bohlale ka ho ba ho Kreste. Rōna rea fokola, empa lōna le matla. Lōna lea hlomphuoa, empa rōna rea hlompholloa. 11Ho fihlela joale rea lapa, rea nyoroa, re hlobotse, rea hlekefetsoa, 'me rea shōta. 12Re sebetsa ka thata ka matsoho a rōna. Ha ba re hlapaola, rea ba hlohonolofatsa; ha ba re hlorisa, rea mamella; 13ha ba re senya mabitso, re phaphatha khotso. Re fetohile lithōle ho lefatše lohle, le manyala ho bohle, ho fihlela joale.
14Ha ke le ngolle tsena ho le hlabisa lihlong, empa ke le ngolla ho le laea le le bana ba ka ba ratehang. 15Leha le ka ba le bahlokomeli ba likete-kete ba le rutileng tsa Kreste, empa le na le ntate a le mong. Ho Kreste Jesu, ke 'na ea le tsoetseng ka molaetsa o molemo. 16Ka baka leo, ke le khothaletsa hore le latele mohlala oa ka. 17Ke kahoo ke le rōmetseng Timothea, e leng ngoana oa ka ea ratehang, ea tšepahalang ho Morena. O tla le hopotsa kamoo ke phelang kateng ka ho latela Kreste Jesu, le kamoo ke rutang tsa bophelo bona kateng kahohle, kerekeng e 'ngoe le e 'ngoe.
18Ba bang ba ikhōhōmōsa joalokaha eka ha ke sa tla le etela. 19Empa ke tla le etela haufinyane, ha Morena a rata, 'me ke tla iphumanela hore na matla a baikhōhōmōsi bao a makae, ho fapana le puo tsa molomo, 20hobane 'Muso oa Molimo hase oa puo ea molomo, ke oa liketso. 21Joale le ikhethela'ng? Hore ke tle ho lōna ka thupa, kapa ka lerato le ka mosa?
