Tumelo e hlōla lefatše
1Mang le mang ea lumelang hore Jesu ke Kreste o tsoetsoe ke Molimo, 'me mang le mang ea ratang motsoali, o rata le tsoala ea hae. 2Seo re tsebang ka sona hore re rata bana ba Molimo, ke ha re rata Molimo, 'me re phetha litaelo tsa hae. 3Seo lerato la Molimo le leng sona ke hore re bōlōke litaelo tsa hae. Litaelo tsa hae ha li boima. 4Bohle ba tsoetsoeng ke Molimo ba hlōla lefatše. Tlhōlo eo re hlōlang lefatše ka eona ke tumelo ea rōna. 5Ke mang ea hlōlang lefatše, haese ea lumelang hore Jesu ke Mora oa Molimo?
Bopaki bo pakelang Mora
6Ke eena Jesu Kreste ea tlileng ka metsi le ka mali; e seng ka metsi feela, empa ka metsi le ka mali, 'me ke Moea o Halalelang o pakang hona, hobane Moea ke 'nete. 7Lipaki tse tharo li teng: 8ke Moea, metsi le mali, 'me tse tharo tsena lia lumellana. 9Ha e le mona re amohela bopaki ba batho, bopaki ba Molimo bo matla ho feta, 'me bopaki ba Molimo ke bona: o paketse Mora oa hae. 10Ea lumelang ho Mora oa Molimo o na le bopaki boo ka ho eena. Ea sa lumeleng ho Molimo, o re Molimo o leshano, kaha a sa lumela bopaki boo Molimo a paketseng Mora oa hae ka bona. 11Joale bopaki boo ke bona: Molimo o re neile bophelo bo sa feleng, 'me bophelo bona re bo fumana ka Mora oa hae. 12Ea nang le Mora o na le bophelo boo; ea se nang Mora oa Molimo ha a na bophelo boo.
Ho tseba bophelo bo sa feleng
13Lōna ba lumetseng lebitsong la Mora oa Molimo, ke le ngoletse tsena, hore le tle le tsebe hore le na le bophelo bo sa feleng. 14Re ka ea ho Molimo ka sebete, hobane, ha re kōpa ho hong ho ea ka thato ea hae, oa re utloa. 15Joale, kaha re tseba hore oa re utloa ha re kōpa, rea tseba hore tseo re li kōpang ho eena e se e ntse e le tsa rōna.
16Ha motho a bona ngoan'abo a etsa sebe se sa bolaeeng, a mo rapelle, 'me Molimo o tla mo fa bophelo. Ke bua ka ba etsang sebe se sa bolaeeng. Sebe se teng se bolaeang; hase seo ke reng motho a rapelle ngoan'abo ka baka la sona. 17Tsohle tse sa lokang ke sebe, empa ho na le sebe se sa bolaeeng.
18Rea tseba hore mang le mang ea tsoetsoeng ke Molimo ha a sa etsa sebe, hobane Mora oa Molimo oa 'mōlōka, 'me E Mobe a ke ke a mo etsa letho. 19Rea tseba hore re ba Molimo, le hore lefatše lohle le pusong ea E Mobe. 20Hape rea tseba hore Mora oa Molimo o tlile, 'me o re neile kutloisiso, hore re tle re tsebe Molimo oa 'nete. Re phela ka ho Molimo oa 'nete, ka ho Mora oa hae, Jesu Kreste. Eena ke Molimo oa 'nete, ke bophelo bo sa feleng.
21Bana ba ka, itlhokomeleng melimong ea bohata.
