1Lentsoe la Morena le nyatsang Basha la fihla ho Jehu, mora oa Hanani, la re: 2“Ho tloha haesale ke u ntša lerōleng, ke u etsa khosi ea sechaba sa ka sa Iseraele, u 'nile ua tsamaea mehlaleng ea Jeroboame. U entse hore sechaba sa ka sa Iseraele se ntšiteloe, 'me se mphephetse hore ke se halefele ka baka la libe tsa sona. 3Ka baka lena ke tla timetsa Basha le ba lelapa la hae; lelapa leo ke le etse seo ke neng ke se etse lelapa la Jeroboame, mora oa Nebate. 4E mong le e mong oa lelapa la Basha ea shoelang motseng, o tla jeoa ke lintja, 'me ea shoelang naheng o tla jeoa ke linonyana tse fofang.”
5Litaba tse ling tsa Basha, le tseo a ileng a li etsa, le bohlabani ba hae, li ngotsoe Bukeng ea Liketsahalo tsa Likhosi tsa Iseraele. 6Basha a shoa, 'me a epeloa Tiresa. Ela, mora oa hae, a mo hlahlama.
7Lentsoe la Morena la fihla ho moporofeta Jehu, mora oa Hanani, le nyatsa Basha le ba lelapa la hae, ka baka la bobe bohle boo a ileng a bo etsa moo Morena a ntseng a bona. Ka mesebetsi ea hae a phephetsa Morena hore a mo halefele, e se feela hobane a ile a etsisa lelapa la Jeroboame, empa le kahobane a ile a le timetsa.
Puso ea Ela, khosi ea Iseraele
8Ka selemo sa mashome a mabeli a metso e tšeletseng Asa e le khosi ea naha ea Juda, Ela, mora oa Basha, a qala ho busa naha ea Iseraele, a le Tiresa. A busa ka lilemo tse peli.
9Empa mohlanka oa hae Simeri, eo e neng e le molaoli oa halofo ea bahlabani ba palamang likariki tsa ntoa, a rera ho 'molaea. Khosi Ela o ne a le Tiresa, ka tlung ea Aresa, mookameli oa lelapa la Ela le motseng oa Tiresa, a ntse a e-noa, a tahoa. 10Simeri a kena ka tlung eo, a hlaba Ela, a 'molaea, e le ka selemo sa mashome a mabeli a metso e supileng Asa e le khosi ea naha ea Juda. Simeri a hlahlama Ela.
11Hang-hang ha Simeri a qala ho lula teroneng ea hae, a busa, a bolaea bohle ba lelapa la Basha, a se ke a siea le ea mong oa ba batona, esitana le bang ka eena, kapa bao e leng metsoalle ea hae. 12Ka mokhoa ona Simeri a timetsa bohle ba lelapa la Basha, ha phethahala polelo ea Morena, eo a neng a e bue ka molomo oa moporofeta Jehu, a nyatsa Basha, 13ka baka la libe tsohle tsa Basha, le libe tsohle tsa Ela, mora oa hae, tseo ba ileng ba siteloa Morena ka tsona, ba etsa hore le Baiseraele ba sitoe, ba phephetse Morena Molimo oa Iseraele, ba mo halefise ka melimo ea bona ea bohata.
14Litaba tse ling tsa Ela, le tsohle tseo a ileng a li etsa, li ngotsoe Bukeng ea Liketsahalo tsa Likhosi tsa Iseraele.
Puso ea Simeri, khosi ea Iseraele
15Ka selemo sa mashome a mabeli a metso e supileng Asa e le khosi ea naha ea Juda, Simeri a busa ka matsatsi a supileng, a le Tiresa. Bahlabani ba ne ba etselitse motse oa Gibetone, o naheng ea Bafilesita, thibella. 16Bahlabani bao ba utloa ho thoe: “Simeri o ile a rera khosi, 'me o e bolaile.” Ka lona letsatsi leo, hona moo liahelong, bahlabani bohle ba bea Omeri, molaoli oa lebōtho la bona, hore e be eena khosi ea naha ea Iseraele. 17Eaba Omeri o tloha Gibetone, o nyolohela Tiresa a e-na le Baiseraele bohle, 'me ba etsetsa Tiresa thibella. 18Eitse ha Simeri a bona hore motse o se o hapiloe, a kena qhobosheaneng e kahare ho ntlo ea khosi, a icheseletsa kahar'a eona, a shoa. 19E ne e le ka baka la libe tseo a ileng a li etsa, ka ho etsa bobe mahlong a Morena, ka ho tsamaea mehlaleng ea Jeroboame, le ka ho etsa sebe se kang sa hae, se neng se etse hore Baiseraele ba siteloe Morena.
20Litaba tse ling tsa Simeri, le bohlabaphieo boo a neng a bo etse, li ngotsoe Bukeng ea Liketsahalo tsa Likhosi tsa Iseraele.
Puso ea Omeri, khosi ea Iseraele
21Joale sechaba sa Iseraele sa aroha lihlopha tse peli. Sehlopha se seng sa latela Tibeni, mora oa Ginate, sa re se mo etsa khosi, 'me se seng sona sa latela Omeri. 22Empa sechaba se ileng sa latela Omeri sa hlōla se neng se latetse Tibeni, mora oa Ginate; kahoo Tibeni a shoa, 'me Omeri ea e-ba khosi.
23Ka selemo sa mashome a mararo a motso o mong Asa e le khosi ea naha ea Juda, Omeri a qala ho busa naha ea Iseraele. A busa ka lilemo tse leshome le metso e 'meli; tse tšeletseng tsa tsona a li qeta a le Tiresa. 24Omeri a reka leralla la Samaria ho Shemere ka silefera e ka etsang boima ba likilo tse mashome a supileng. A haha motse holim'a leralla leo, a o reella Shemere, eo e neng e le mong'a leralla leo, a re ke Samaria.
25Empa Omeri a etsa bobe mahlong a Morena. A etsa tse mpe ho feta bohle ba bileng teng pele ho eena. 26A tsamaea mehlaleng eohle ea Jeroboame, mora oa Nebate, a etsa le sebe se kang sa hae, se neng se etse hore Baiseraele ba siteloe Morena, ba phephetse Morena Molimo oa Iseraele, hore a ba halefele ka baka la melimo ea bona ea bohata.
27Litaba tse ling tsa Omeri, le tsa bohlabani ba hae, li ngotsoe Bukeng ea Liketsahalo tsa Likhosi tsa Iseraele. 28Omeri a shoa, 'me a epeloa Samaria. Akabe, mora oa hae, a mo hlahlama.
Puso ea Akabe, khosi ea Iseraele
29Ka selemo sa mashome a mararo a metso e robeli. Asa e le khosi ea naha ea Juda, Akabe, mora oa Omeri, a qala ho busa naha ea Iseraele. Akabe, mora oa Omeri, a busa naha eo ka lilemo tse mashome a mabeli a metso e 'meli a le Samaria. 30Empa a etsa tse mpe mahlong a Morena, ho feta bohle ba bileng teng pele ho eena. 31A fumana eka ke ntho e fokolang ho etsa libe tse kang tsa Jeroboame, mora oa Nebate, hoo a bileng a nyala Jesabele, morali oa Etebaale, khosi ea Basidone, 'me a ea sebeletsa Baale, a mo khumamela. 32A hahela Baale tempele Samaria, 'me kahar'a eona a mo hahela aletare. 33Akabe a etsa le setšoantšo sa Ashera, a phephetsa Morena Molimo oa Iseraele, hoo a ileng a mo halefela ho feta likhosi tsohle tse bileng teng pele ho eena.
34Mehleng eo ea Akabe, Hiele oa Bethele o ile a tsosa motse oa Jeriko. Ha a rala methèo ea marako a motse, a shoeloa ke Abirame, mora oa hae oa matsibolo; ha a haha menyako a shoeloa ke Segube, mora oa hae oa lethōpō, 'me ha phethahala polelo ea Morena, eo a neng a e bolele ka molomo oa Joshua, mora oa Nune.
