1 LIKHOSI 8

₁Joale Solomone a khōbōkanya baholo ba Baiseraele, le lihlooho tsohle tsa merabe, le mahosana a malapa a bana ba Iseraele. Bohle ba tla Jerusalema ho khosi Solomone, hore ba tl'o nyōlla areka ea selekane, e tsoe Motseng oa Davida, e leng Sione. ₂Banna bohle ba Baiseraele ba khōbōkanela ho khosi Solomone, mohl'a mokete, ka khoeli ea Mphalane, e leng khoeli ea bosupa.

₃Baholo bohle ba Baiseraele ba tla, 'me baprista ba nka areka. ₄Baprista le Balevi ba nyōlla areka ea Morena, le Tente ea Morena, le lintho tsohle tse halalelang, tse neng li ke ka Tenteng ea Morena.

₅Bo-khosi Solomone le sechaba sohle sa Iseraele se neng se khōbōkanetse ho eena, ba mea kapele ho areka, ba etsa mahlabelo ka linku le ka lipholo tse ngata hoo li neng li ke ke tsa baloa.

₆Baprista ba tlisa areka ea selekane sa Morena ka Tempeleng, ba e bea litulong tsa eona, ka Sehalalelong se halalelang ka ho fetisisa, tlas'a mapheo a likerubime. ₇Likerubime tseo li ne li thathalalitse mapheo a mabeli holim'a moo areka e beoang teng, a okametse areka le mefeng ea eona. ₈Mefeng e ne e hlahisitse lintlha tsa eona, hoo lintlha tseo li neng li bonahala ha motho a le ka Sehalalelong, a tobane le Sehalalelo se halalelang ka ho fetisisa, empa li ne li sa bonahale ha motho a le sebakeng se seng, 'me li sa ntsane li le moo le kajeno-ea-bokajeno. ₉Ho ne ho se letho kahar'a areka, haese matlapa a mabeli, ao Moshe a neng a a kenye kateng ha ba le Horebe, mohl'a Morena a etsang selekane le bana ba Iseraele, ha ba ne ba e-tsoa naheng ea Egepeta.

₁₀Eare ha baprista ba e-tsoa ka Sehalalelong, leru la tlala ka Tempeleng ea Morena, ₁₁hoo baprista ba ileng ba sitoa ho sebeletsa, hobane tlōtla ea Morena e ne e tletse ka Tempeleng ea Morena.

₁₂Joale Solomone a re:

₁₄Sechaba sohle sa Iseraele se ne se eme. Khosi Solomone a retelehela ka ho sona, a se talima, 'me a se hlohonolofatsa sohle.

₁₅Eaba khosi e re: “Ho ke ho bokoe Morena Molimo oa Iseraele, ea phethahalitseng seo a neng a se tšepise Davida, ntate, ka molomo oa hae, a re: ₁₆‘Ho tloha mohla ke ntšang sechaba sa ka Egepeta, ha ho motse har'a merabe ea Iseraele, oo nkileng ka o khetha hore ke hahe Tempele eo ke tla lula ho eona; ke ne ke khethe Davida hore a buse sechaba sa ka sa Iseraele.’

₁₇“E ne e le takatso ea Davida, ntate, ho hahela Morena Molimo oa Iseraele Tempele. ₁₈Empa Morena a re ho Davida, ntate: ‘U ne u lakatsa ho nkhahela Tempele, 'me ke hantle ha u ile ua lakatsa joalo. ₁₉Leha ho le joalo, uena ha u ka ke ua haha Tempele eo, empa mora oa hao, ea tla tsoa lethekeng la hao, ke eena ea tla nkhahela eona.’

₂₀“Joale Morena o phethahalitse polelo eo a neng a e bue. Ke tsoetsoe tlung ea Davida, ntate; ke lutse teroneng ea Iseraele joalokaha Morena a ne a tšepise, 'me ke hahetse Morena Molimo oa Iseraele Tempele. ₂₁Ke lokisitse sebaka sa areka, moo ho bōlōkiloeng selekane sa Morena, seo a neng a se etse le bo-ntat'a rōna, ha a ne a ba ntša naheng ea Egepeta.”

₂₂Eaba Solomone o ema kapele ho aletare ea Morena, moo sechaba sohle sa Baiseraele se ntseng se bona, o phahamisetsa matsoho a hae leholimong, ₂₃'me a re: “Morena Molimo oa Iseraele, ha ho Molimo ea kang uena holimo leholimong, kapa tlase lefatšeng, ea bōlōkang selekane le bahlanka ba hae, a ba bontše mohau ha ba mo tšepa ka lipelo tsa bona tsohle. ₂₄U bōlōkile tšepiso eo u neng u e etsetse mohlanka oa hao Davida, ntate. U bile u ne u bue ka molomo oa hao, 'me ka letsatsi lena u e phethahalitse ka matla a hao.

₂₅“Joale ka baka leo, uena Morena Molimo oa Iseraele, ak'u bōlōke tšepiso eo u neng u e etsetse mohlanka oa hao Davida, ntate, ua re: ‘Haeba bana ba hao ba ka ba le boitšoaro, metsamao ea bona ea nkhahla, 'me ba tšepahala ka lipelo tsa bona tsohle, le ka moea oa bona oohle, joalokaha u ile ua etsa, terone ea Iseraele e ke ke ea hloka mohlahlami.’ ₂₆Joale oho, Morena Molimo oa Iseraele, kea u rapela: Tšepiso ea hao, eo u neng u e etsetse mohlanka oa hao Davida, ntate, e ke e phethahatsoe.

₂₇“Empa na ruri Molimo o tla hle a ahe lefatšeng? Bona, esita le leholimo la maholimo ha lea u lekana; ebe joale Tempele ee, e hahiloeng ke 'na, eona e ka u lekana joang? ₂₈Leha ho le joalo, oho, Morena Molimo oa ka, ak'u mamele thapelo ea mohlanka oa hao, le kōpo ea hae, u utloe sello le thapelo, e leng tseo mohlanka oa hao a u rapelang ka tsona kajeno. ₂₉Bosiu le motšeare mahlo a hao a ke a lebele ntlo ena, e leng sebaka seo u buileng ka sona, ua re: ‘'Na ke tla ba teng mona.’ Ak'u utloe thapelo eo mohlanka oa hao a tla e etsa a le sebakeng sena.

₃₀“Ak'u mamele kōpo ea mohlanka oa hao, le ea sechaba sa hao sa Iseraele, ha se rapela se le sebakeng sena. Mamela u le leahong la hao le leholimong, 'me ha u utloa u se tšoarele.

₃₁“Ha motho a siteloa oa habo, 'me ho thoe a hlapanye kapele ho aletare ea hao, ka tlung ena, ₃₂u utloe u le leholimong, 'me u ahlōlele bahlanka ba hao; u tsoe ea khopo, u mo jarise molato oa hae; u lōkōlle ea se nang molato, u mo ahlōlele ho ea ka ho hloka molato ha hae.

₃₃“Ha sechaba sa hao sa Iseraele se hlōloa ke lira, kahobane se u sitetsoe, 'me eba se khutlela ho uena, se tlotlisa lebitso la hao, se u rapela, se u kōpa se le ka tlung ena, ₃₄u se utloe u le leholimong, 'me u tšoarele sechaba sa hao sa Iseraele sebe sa sona, u se khutlisetse naheng eo u neng u e nee bo-ntat'a sona.

₃₅“Ha letsatsi le eme, pula e sa ne, hobane sechaba sa hao se u sitetsoe, 'me eba se u rapela se le ka tlung ena, se tlotlisa lebitso la hao, se furalla sebe sa sona ha u se otla, ₃₆u se utloe u le leholimong, 'me u tšoarele bahlanka ba hao, e leng sechaba sa hao sa Iseraele, sebe sa bona. Ak'u ba rute tsela e lokileng, eo ba tla tsamaea ka eona. Naha ea hao, eo u e neileng sechaba sa hao hore e be lefa la sona, u e nesetse pula.

₃₇“Haeba naha e e-na le sekoboto, ho e-na le lefu la seoa, lebabo, boroku, litsie, kapa bookholane; eba lira tsa sechaba sena li etsetsa metse ea sona thibella; leha ho ka ba le seoa sefe le sefe, kapa maloetse afe le afe; ₃₈thapelo kapa kōpo efe le efe e etsoang ke motho ofe le ofe, kapa ke sechaba sa hao sohle sa Iseraele, kamoo motho ka mong a khoèbèthoang ke letsoalo la hae kateng, eba o otlollela matsoho a hae tlung ena, ₃₉u utloe u le leahong la hao le leholimong, u ba tšoarele, u ba thuse. Motho ka mong u mo putse ho ea ka liketso tsa hae, kamoo u tsebang pelo ea hae kateng, hobane ke uena, 'me ke uena feela, ea tsebang lipelo tsa batho bohle; ₄₀ba tle ba u tšabe ka matsatsi 'ohle ha ba ntse ba phela naheng eo u neng u e nee bo-ntat'a bona.

₄₁“Le molichaba eo e seng oa sechaba sa hao sa Iseraele, o tla tla ka baka la lebitso la hao, a e-tsoa naheng e hōle, ₄₂hobane balichaba ha ba utloa botumo ba hao, le matla a hao, le thuso ea hao, ba tla tla tlung ena ba tl'o rapela. ₄₃U utloe u le leahong la hao le leholimong, molichaba eo u mo etsetse tsohle tseo a li kōpang ho uena, e le hore lichaba tsohle tsa lefatše li tle li tsebe lebitso la hao, li u tšabe, joalokaha sechaba sa hao sa Iseraele se u tšaba; li be li tsebe le hore ntlo ena eo ke e hahileng e bitsoa ka uena.

₄₄“Ha sechaba sa hao se futuhela lira tsa sona, hohle moo u ka se rōmelang teng, 'me se rapela se talimile motseng oo u o khethileng, le tlung ena eo ke u hahetseng eona, ₄₅u utloe thapelo ea sona le kōpo ea sona u le leholimong, u se loanele.

₄₆“Haeba ba u siteloa, hobane ha ho motho ea sa sitoeng, u tla ba halefela, u neelane ka bona ho lira tsa bona, hore li ba hape, e le bathōpuoa, li ba ise naheng ea tsona e hōle kapa e haufi. ₄₇Empa ha ekare ha ba le naheng eo ba isitsoeng ho eona e le bathōpuoa, ba baka, 'me hona moo naheng eo ea bathōpi ba bona, ba u kōpa, ba re: ‘Re sitiloe, re khelohile, re entse bokhopo,’ ₄₈'me ba khutlela ho uena ka lipelo tsa bona tsohle, le ka meea ea bona eohle ha ba ntse ba le naheng eo ea lira tsa bona, tse ileng tsa ba etsa bathōpuoa; ba u rapela ba talimile naheng ena ea bona, eo u neng u e nee bo-ntat'a bona, le motseng ona oo u o khethileng, le tlung ena eo ke u hahetseng eona, ₄₉u utloe thapelo ea bona, le kōpo ea bona, u le leahong la hao le leholimong, 'me u ba loanele. ₅₀Tšoarela sechaba sa hao se u sitetsoeng, u se tšoarele litšito tsa sona, tseo se u sitetsoeng ka tsona. Etsa hore bao ba se thōpileng ba be le mohau, ba se hauhele. ₅₁Sechaba sena ke sa hao, ke lefa la hao; u se ntšitse Egepeta, sebōping se tukang malakabe.

₅₂“U ke u ananele kōpo ea mohlanka oa hao, le ea sechaba sa hao sa Iseraele, 'me kamehla ha se ipiletsa ho uena u se utloe. ₅₃Oho, Morena Molimo, u ne u khethe sechaba sena har'a lichaba tsohle tsa lefatše, hore e be lefa la hao, joalokaha u ne u bue ka Moshe, mohlanka oa hao, ha u ne u ntša bo-ntat'a rōna Egepeta.”

₅₄Ha Solomone a qetile ho rapela Morena ka thapelo ena eohle le ka kōpo ena, a phahama kapele ho aletare ea Morena, moo a neng a ntse a khumame teng, a phahamiselitse matsoho a hae leholimong. ₅₅A ema, a bua ka lentsoe le phahameng, a hlohonolofatsa sechaba sohle sa Iseraele, a re: ₅₆“Ho bokoe Morena, ea neileng sechaba sa hae sa Iseraele phomolo, joalokaha a ne a tšepise. Ha ho tšepiso le e 'ngoe ea litšepiso tseo a neng a li etse ka Moshe, mohlanka oa hae, e sa phethahalang. ₅₇Morena Molimo oa rōna, a be le rōna, joalokaha a bile le bo-ntat'a rōna; a se ke a re lahla, a re furalla. ₅₈A ke a sokollele lipelo tsa rōna ho eena, re tsamaee litseleng tsohle tsa hae, re bōlōke melao ea hae, le litaelo tsa hae, le likahlōlo tsa hae, tseo a li laetseng bo-ntat'a rōna. ₅₉Motšeare le bosiu Morena Molimo oa rōna, a ke a hopole mantsoe ana ao ke entseng thapelo le kōpo ho eena ka 'ona; ka linako tsohle a ke a be haufi le Morena Molimo oa rōna, 'me a nee mohlanka oa hae le sechaba sa hae sa Iseraele toka, kamoo ho ka hlokahalang kateng ka letsatsi ka leng; ₆₀e le hore lichaba tsohle tsa lefatše li tle li tsebe hore Morena ke Molimo, 'me ha ho e mong. ₆₁Ka baka lena, le ke le tšepahale ho Morena Molimo oa rōna, le tsamaee ka litaelo tsa hae, le bōlōke melao ea hae joaloka kajeno.”

₆₂Bo-khosi Solomone le sechaba sohle sa Baiseraele, ba etsetsa Morena sehlabelo. ₆₃Solomone a etsetsa Morena sehlabelo sa teboho ka lipholo tse likete tse peli le mashome a mabeli, le ka likhutšoane tse likete tse lekholo le mashome a mabeli. Eaba khosi le bana bohle ba Iseraele ba khakōla ntlo ena ea Morena.

₆₄Ka lona letsatsi leo, khosi ea halaletsa le bohare ba seotloana se kapele ho ntlo ea Morena. Solomone a etsetsa nyehelo ea secheso, le nyehelo ea lijo, le nyehelo ea mafura ea teboho hona moo, hobane aletare ea lethose, e kapele ho Morena, e ne e le nyenyane hoo e neng e ke ke ea lekana linyehelo tsa secheso, le linyehelo tsa lijo, le linyehelo tsa mafura tsa teboho.

₆₅Ka eona nako eo, Solomone a etsa mokete, a e-na le Baiseraele bohle, ba neng ba khōbōkane ka bongata bo boholo, ho tloha Khorong ea Hamate, ho ea fihla molatsoaneng oa Egepeta. Mokete ona oa ketekeloa Morena ka matsatsi a supileng, le ka matsatsi a supileng hape, ea e-ba matsatsi a leshome le metso e mene kaofela. ₆₆Ka letsatsi la borobeli Solomone a qhala sechaba; eaba sechaba se hlohonolofatsa khosi Solomone, se ikela malapeng a sona se thabile, lipelo li nyakaletse ka baka la molemo oohle oo Morena a o etselitseng Davida, mohlanka oa hae, le sechaba sa hae sa Iseraele.