Selekane le Roma le Separeta
1Eare ha Jonathane a bona hore joale nako ea mo lumella, a khetha banna, a ba romela Roma ho ea tiisa le ho nchafatsa setsoalle sa hae le Baroma. 2A romela le mangolo a ntseng a tšoana ho Basepareta le libakeng tse ling. 3Baromuoa bana ba ea Roma, 'me ba fihla tlung ea Lekhotla, ba re: “Jonathane, moprista e moholo, le sechaba sa Bajuda ba re romile ho tla nchafatsa setsoalle le selekane sa mohl'a monene.” 4Baroma ba ba nea mangolo a boitsebiso, a eang ho baokameli libakeng tsohle tseo ba neng ba tla feta har'a tsona, e le hore ba tle ba ba thuse ho khutlela ka khotso naheng ea Juda. 5Kopi ea lengolo leo Jonathane a le ngoletseng Basepareta ke ena:
6“Jonathane, moprista e moholo, Lekhotla la baholo, baprista le sechaba sohle sa Bajuda, ba lumelisa Basepareta, bana babo bona. 7Ka nakonyana e sa tsoa feta, lengolo le ile la romeloa ho Oniase, moprista e moholo, le e-tsoa ho Areose, eo e neng e le khosi ea lona, le bolela hore le bana babo rona, kamoo kopi ea lengolo lena e pakang kateng. 8Oniase a amohela moromuoa oa lona ka tlhompho, a ba a amohela le lengolo lena le hlalosang ka ho totobala maemo a selekane le setsoalle. 9Ka baka leo, le hoja re sa hloke letho la mofuta ona, kaha rona re lula re khothalitsoe ke libuka tse halalelang tseo re nang le tsona, 10re mpa re nka boikhathatso bona ba ho romela motho ho nchafatsa litlamano tsa boena le setsoalle seo re se entseng le lona, e le hore le tle le se ke la re nka re le balichaba feela; etsoe e se e le nako e teletsana le re ngoletse. 11Ha re khaotse ho le hopola kamehla, mohla mekete le ka matsatsi a mang a khethehileng, ha re nyehela mahlabelo kapa re etsa lithapelo. Ke tšoanelo le taba e lokelang ho hopola bana babo rona joalo. 12Re thabela le tlotla ea lona. 13Empa ha e le bakeng sa rona re ka bolela hore ra ba har'a litsietsi tse ngata le lintoa tse ngata; likhosi tse re pota-potileng li 'nile tsa re loantša. 14Leha ho le joalo, ha rea ka ra rata ho le tšoenya, lona le balekane ba bang le metsoalle ea rona e meng, ka ho le tsebisa lintoa tsena; 15hobane thuso ea rona ke e tsoang leholimong, 'me re ile ra phonyoha matsohong a lira tsa rona, 'me tsona tsa kokobetsoa. 16Re khethile Numeniose, mora oa Antiokose, le Antipatere, mora oa Jasone, e le maqosa a rona ho Baroma, a tla ea ho nchafatsa setsoalle le selekane sa rona le bona sa mohl'a monene. 17Re ba laetse hape ho feta le ho lona ho re lumelisetsa le ho neelana ka lengolo lena le tsoang ho rona, leo ka lona re tiisang litlamano tsa rona tsa boena. 18Re se re bile re le kopa ho re romella karabo ea lengolo lena.
19“Joale kopi ea lengolo le romeletsoeng ho Oniase ke ena: 20‘Areose, khosi ea Basepareta, o lumelisa Oniase, moprista e moholo. 21Re fumane moo ho ngotsoeng hore Basepareta le Bajuda ke bana ba motho, ke ba leloko la Aborahama. 22Ha e le mona re tsebile litaba tsena, rea le kopa ho re ngolla, re tsebe hore na le ntse le phela joang. 23Rona, ka lehlakoreng la rona, re le ngolla ho le tsebisa hore makhomo esita le thepa eohle ea lona ke ea rona, le tsa rona ke tsa lona. Re laetse maqosa a rona ho le tsebisa joalo.’ ”
Matšolo a Jonathane le Simone
24Jonathane a utloela hore balaoli ba Demeteriose ba khutlile, 'me ba bokeletse mphi e kholo ho feta ea pele, ho tla mo loantša. 25A hla a tloha Jerusalema, a tsamaea ho ea kopana le bona tikolohong ea Hamate; hobane a ne a sa rate ho ba fa monyetla oa ho mo loantšetsa naheng ea habo. 26A romela lihloela liahelong tsa bona; tsa khutla, tsa mo tlalehela hore sera se se se ikemiselitse ho tsometsa Bajuda bosiu. 27Eare ha letsatsi le likela, Jonathane a laela bahlabani ba hae ho falimeha le ho lula e le malala-a-laotsoe bosiu bohle, ho itokisetsa ntoa; a ba a bea balebeli ho potoloha liahelo. 28Ha lira li utloa hore Jonathane le bahlabani ba hae ba se ba loketse ntoa, tsa keneloa ke tšabo, 'me tsa nyahama lipelo. Tsa besa mello liahelong 'me tsa ikela. 29Jonathane le bahlabani ba hae ha baa ka ba hlokomela taba ena ho fihlela ha bosiu bo e-sa, hobane ba ne ba bona mello ena e ntse e tuka. 30Jonathane a leka ho sala lira morao, empa a hloloa ho fihla ho tsona, hobane li ne li se li tšetse noka ea Eleutherose. 31Eaba Jonathane o se a fetohela ho Maarabia ba bitsoang Masabadea; a ba ripitla, a ba a ba hapela thepa. 32Joale a tloha moo, a leba nq'a Damaseka, a haola har'a naha eohle.
33Simone le eena a tloha, 'me a ea fihla Ashekelone le liqhobosheaneng tse haufi. A tjeka a leba Jopo, a e hapa; 34hobane a ne a se a utloile hore baahi ba makhatheng a ho neelana ka qhobosheane ho batho ba Demeteriose. A ba a siea lebotho la bahlabani moo ho e lebela.
35Ha Jonathane a khutla, a phutha baholo ba sechaba, ho tla rera le bona ho haha liqhobosheane naheng ea Judea, 36ho phahamisa marako a tšireletso a Jerusalema ho feta kamoo a leng kateng, le ho haha 'moto-moto pakeng tsa Qhobosheane le motse ho li arohanya, e le hore Qhobosheane e be thoko 'me batho ba ka ho eona ba sitoe ho reka kapa ho rekisa eng ka eng. 37Bajuda ba hla ba khobokana ho tsosa motse. Karolo e itseng ea lerako la oona, ho ea ka khohlong ea Kederone, e ka nq'a bochabela, e ne e oele. Ba tsosa le karolo e bitsoang Motse-mocha. 38Simone le eena a tsosa motse oa Adida, o ka maralleng; a ba a o etsa qhobosheane e nang le likhoro le mekoallo ea tsona.
Terifone o hapa Jonathane
39Joale Terifone a laba-labela ho ba khosi ea Asia, ho ithoesa mofapahlooho le ho tsohela khosi Antiokose matla. 40Empa a tšaba hore Jonathane a ka 'na a mo sitisa ho etsa joalo ka ho mo loantša; ka baka leo a batla mokhoa oa ho mo tšoara hore a 'molaee. A tloha ha habo, a tla Bete-Sheane. 41Jonathane a tloha ho ea mo hlasela ka mokhethoa oa bahlabani ba likete li mashome a mane; a hla a fihla Bete-Sheane. 42Ha Terifone a hlokomela hore Jonathane o tlile ka mphihali, a tšaba ho mo tsohela matla; 43a mpa a mo amohela ka tlhompho, a ba a mo thoholetsa ka pele ho metsoalle ea hae. A mo fa limpho, a ba a laela metsoalle ea hae le mabotho a hae ho mo mamela joalokaha ba ne ba mamela eena. 44Joale a re ho Jonathane: “Lebaka ke lefe leo ka lona u khathalitseng batho ba bangata-ngata baa, athe rona le uena ha re loane? 45Ba qhale hona joale, ba ipoelle mahabona; u mpe u khethe banna ba seng bakae ba tla sala le uena, 'me u tle le 'na Potolemaise. Ke tla u nea motse oo 'moho le liqhobosheane tse ling, ke be ke u neele esita le mabotho a ntšaletseng le matona 'ohle, e be kea tsamaea ke boela hae. Ke lona lebaka qhaa! le ntlisitseng koano.” 46Jonathane, ka ho mo tšepa, a etsa hantle joalokaha a mo boleletse; a qhala mabotho a hae, 'me 'ona a khutlela naheng ea Juda. 47A sala le bahlabani ba kete li tharo feela; a siea likete tse peli Galelea, a felehetsoa ke ba sekete. 48Empa eare ha Jonathane a kena Potolemaise, baahi ba motse ba koala likhoro, ba mo tšoara, 'me ba bolaea ka sabole bohle ba neng ba kene le eena.
49Joale Terifone a romela mabotho le bapalami ho ea Galelea le Lehoatateng le Leholo ho ea bolaea bahlabani bohle ba Jonathane. 50Bona kaha ba ne ba utloile hore Jonathane o tšoeroe, ba kholoa hore o bolailoe 'moho le batho ba hae; joale ba khothatsana, 'me ba tsamaea e le mara, ba itokiselitse ho itoanela. 51Lira tse ba setseng morao ha li bona hore Bajuda bao ba ikemiselitse ho loanela bophelo ba bona, tsa khutla. 52Eaba ba fihla naheng ea Juda ka khotso. Ba llela Jonathane le ba timetseng le eena, ba fihla ba kenetsoe ke tšabo; naha eohle ea Iseraele ea e-ba bofifing. 53Balichaba bohle ba pota-potileng Bajuda ba batla tsela ea ho ba ripitla, hobane ba ne ba re: “Ha ba sa na moetapele, kapa mang ea tla ba thusa. A re ba futuheleng hona joale, re tle re etse hore ba tle ba se hlole ba hopoloa le ho hopoloa.”
