Antiokose VII o kopa tšehetso ea Simone
1Antiokose, mora oa khosi Demeteriose, a romela lengolo a le lihleke-hlekeng tsa leoatle ho Simone, moprista le 'musi oa Bajuda, le ho sechaba sohle, 2le reng:
“Khosi Antiokose o lumelisa Simone, moprista e moholo le 'musi, le sechaba sa Bajuda. 3Ka ho bona hore maseaqheme a teng a seng a ikhapetse 'muso oa bo-ntat'a rona, ke fihletsoe ke morero oa ho boela ke nka matla holim'a naha ena, ke tle ke busetse litaba malulong a tsona a pele. Ke se ke thaothile mphi e kholo ea bahlabani, 'me ke lokisitse likepe tsa ntoa. 4Ke se ke rerile ho tla ka likepe, ke tle ke kene naheng ea habo rona, ke hlasele ba e sentseng le ba ripitlileng metse e mengata ea 'muso oa ka.
5“Joale ke tiisa tokollo eo likhosi tseo ke li hlahlamileng li seng li 'nile tsa u fa eona, hore u se ke ua ntša makhetho, kapa ua nyehela ka limpho tse ling. 6Ke u lumella ho ipopela chelete eo e leng ea hao bakeng sa naha ea hao. 7Ke fana ka bolokolohi bohle ho Jerusalema le ho Sehalalelo. Libetsa tsohle tseo u iketselitseng tsona, esita le liqhobosheane tseo u li hahileng, tseo u lulang ho tsona, li sale e le tsa hao feela. 8Mekitlane eohle eo u nang le eona polokelong ea borena, le mekitlane eo ebang u tla e etsa, e hlakotsoe eohle ho tloha hona joale le ho fihlela khale. 9Ha re se re boeletsoe ke matla 'musong oa rona, re tla u fa tlhompho e khethehileng, 'moho le sechaba sa hao, esita le Tempele, e le hore le tlotlisoe lefatšeng lohle.”
10Ka selemo sa lekholo le mashome a supileng a metso e mene, Antiokose a tsamaea ho ea kena naheng ea bo-ntat'ae; 'me ha a fihla, mabotho 'ohle a mo bokanela, hoo Terifone a ileng a sala le bahlabani ba seng bakae feela. 11Antiokose a mo lelekisa, 'me Terifone a balehela motseng oa Dora o lebopong la leoatle; 12hobane a hlokometse hore litsietsi li mo totetse, 'me le mabotho a hae a mo qhalanetse. 13Antiokose a lara ka pele ho Dora, a e-na le bahlabani ba likete li lekholo le mashome a mabeli le bapalami ba kete li robeli. 14A lika-liketsa motse, le likepe tsa hlaha motse ka nq'a ka leoatleng; a thibella motse ka mobung le ka metsing, a sa lumelle motho ho tsoa kapa ho kena.
Roma e tšehetsa Bajuda
15Joale Numeniose le ba mo felehelitseng ba fihla Jerusalema ba e-tsoa Roma, ba e-tla ka mangolo a ngoletsoeng likhosi le linaha, ao litaba tsa 'ona li balehang joana:
16“Losiuse, mastrata e moholo oa Baroma, o lumelisa khosi Potolemea. 17Baromuoa ba Bajuda ba fihlile ho rona joaloka metsoalle le balekane ba rona, ho tla nchafatsa setsoalle le selekane sa khale; ba rometsoe ke Simone, moprista e moholo, le sechaba sa Bajuda. 18Ba bile ba re tliselitse mpho ea thebe ea khauta, e theko ea limina tse sekete. 19Ka hona re thabetse ho ngolla likhosi le linaha, hore ho se be motho ea ba tšoenyang, kapa a ba loantša, bona le metse le naha ea habo bona, esita leha e le ho etsa selekane le ba ba loantšang. 20Re iphumana re entse hantle, ha e le mona re amohetse thebe ena. 21Ka baka leo, haeba ho teng maseaqheme a balehileng naheng ea Bajuda ho tla tšabela ho lona, le a neele Simone, moprista e moholo, a a ahlole ho latela molao oa bona.”
22Losiuse a ngolla khosi Demeteriose lengolo le tšoanang le lona leo, le ho Attalose, le ho Ariarathese, le ho Aresakese; 23a ngolla le linaha tsohle tse kang Sampasamese, le Separeta, le Delose, le Mindose, le Sisieone, le Karia, le Samose, le Pamfilia, le Lisia, le Halikarenasose, le Rodose, le Faselise, le Kose, le Sidese, le Aradose, le Goretina, le Kenidose, le Sipera, le Sirene. 24Likopi tsa mangolo ana kaofela tsa romeloa ho Simone, moprista e moholo.
Antiokose VII o qhalana le Simone
25Khosi Antiokose a boela a lara ka pele ho Dora; a romela mara a hae nako le nako ho e futuhela, a etsa mechini ea ntoa, 'me a patela Terifone moo, a sitisa batho ho tsoa kapa ho kena. 26Simone a romella Antiokose mokhethoa oa bahlabani ba kete li peli ho mo tlatsa ntoeng eo; a ba a mo fa silefera le khauta, a mo hlahlella libetsa. 27Empa Antiokose a hana ho amohela tseo tsohle. A roba le litumellano tsohle tseo a neng a li entse le Simone, a hlobohana le eena. 28Antiokose a romela ho Simone Athenobiose, e mong oa metsoalle ea hae, hore a e'o bua le eena, a re: “U okametse metse ea Jopo le Gasara, le Qhobosheane ea Jerusalema; ke metse ea 'muso oa ka. 29U ripitlile litikoloho tsa metse eo, u sentse naha hampe, le libaka tse ngata tsa 'muso oa ka u li hapile. 30Joale, ke u laela ho mpuseletsa metse eo u e hapileng, le lichelete tsa lekhetho le tsoang literekeng tseo u neng u li hapile, tse ka ntle ho meeli ea Judea; 31kapa u hle u neelane ka chelete ea litalenta tsa silefera tse makholo a mahlano sebakeng sa tsona; u be u eketse ka tse makholo a mahlano hape, ho lefella tšenyo eo u e entseng le ho lefella lekhetho la metse eo. Ho seng joalo, re tla u futuhela.”
32Ha Athenobiose, motsoalle oa khosi, a fihla Jerusalema, a makala haholo ho bona khanya ea Simone, lekase le tletseng lijana tsa khauta le tsa silefera, le botle bo leng teng hohle lapeng la hae. Eaba o fana ka molaetsa oa khosi ho Simone. 33Simone eena a mo araba ka ho re: “Ha re e-s'o hape naha efe kapa efe ea balichaba, esita le seng sa motho ofe kapa ofe, ha re e-s'o inkele sona; empa hoo re nang le hona ke lefa la bo-ntat'a rona, leo ka nako e 'ngoe le ileng la ikhapeloa ke lira tsa rona ka phoso. 34Joale ha e le mona re fumane monyetla, re boetse re nkile lefa leo la bo-ntat'a rona. 35Ha e le bakeng sa Jopo, le Gasera, metse eo u e batlang, bakeng sa eona re ka u fa litalenta tse lekholo feela, le hoja baahi ba eona bona ba re senyelitse naha hakana.”
36Athenobiose ha aa ka a araba Simone le ka lentsoe leha e le le leng. O ile a mpa a khutlela ho khosi a halefile haholo, a e phetela mantsoe ao a Simone, le tsa borui ba hae le tsohle tseo a ileng a li bona; 'me khosi ea halefa hampe.
Johanne o hlola Kendebeose
37Joale Terifone a kena sekepeng, eaba o balehela motseng oa Orethosia. 38Khosi Antiokose a khetha Kendebeose ho ba molaoli e moholo oa naha e sikileng leoatle, a ba a mo abela mabotho a litaaso le a bapalami. 39A mo laela ho ea hlasela Judea. A mo laela le teng ho tsosa motse oa Kederone le ho matlafatsa likhoro ka litora, e le hore a tle a tsebe ho loantša sechaba sa Bajuda. Khosi eona ea ea lelekisa Terifone.
40Kendebeose a fihla Jamnia, a qala ho qholotsa sechaba sa moo, ka ho kena naheng ea Judea, ho etsa batho batšoaruoa le ho bolaea ba bang. 41A tsosa motse oa Kederone, a bea bapalami le mabotho a litaaso teng, hore ba tsebe ho tsamaea litseleng tse kenang Judea ba ntse ba futuha, ho latela seo khosi e mo laetseng sona.
