Lefu la khosi Antiokose IV
(2 Mak. 1:11-17 – 9:1-29; 10:9-11)
1Ha khosi Antiokose a ntse a feta mafatšeng a phahameng, a utloela hore motse oa Elimaise, naheng ea Peresiea, o tumme haholo ka matlotlo a oona a silefera le a khauta. 2Tempele ea motse ona e ne e tletse matlotlohali. Ho eona ho ne ho e-na le lithebe tsa khauta, liaparo tsa ntoa le lihlomo, tse ileng tsa siuoa moo ke Alekesandere, mora oa Filipi, khosi ea Masedonia, e ileng ea e-ba ea pele ho busa Bagerike. 3Antiokose a ea Elimaise, a leka ho hapa motse oo le ho inkela thepa ea oona; empa a hloleha, hobane baahi ba oona ba ne ba se ba tsebile morero oa hae. 4Ba loana, ba hana ho checha ho fihlela a baleha a tletsoe ke masoabi ho khutlela Babilonia. 5Ha a ntse a le Peresiea, a fihleloa ke molaetsa oa hore mabotho a hae a neng a le naheng ea Juda a ile a fekisoa. 6Lisiase o ne a ile a kena teng ka mphi e matla, empa a phalalisoa ke Bajuda, ba neng ba se ba hlahlelletsoe ka libetsa le ka tsohle tse hlokahalang, esita le ka khapo e ngata, eo ba e fumaneng mabothong ao ba a hlotseng. 7Khosi ea bolelloa hape hore Bajuda ba helelitse manyala ao e neng e a hlomme holim'a aletare, motseng oa Jerusalema; ba bile ba pota-potisitse Sehalalelo ka marako a phahameng joaloka pele; ba entse joalo le Bete-Sure, motseng oo e neng e le oa khosi. 8Ha Antiokose a utloa litaba tsena, a ferekana 'me a tsukutleha haholo. A robatsoa ke bohloko ba pelo, hobane litaba li ne li sa tsamaea kamoo a neng a lakalitse kateng. 9A ba liphateng matsatsi a mangata, hobane bohloko ba pelo bo ne bo ntse bo mo totela; a ba a ikutloa hore joale oa shoa. 10Ka baka leo a bitsa metsoalle eohle ea hae, a re ho eona: “Ke se ke hlobaela, le pelo ea ka ea tetebela ke metouto. 11Ke ile ka ipotsa hore na letsoalo lena le ntlelang le bakoa ke'ng? Hobane'ng ke keneng qhafutsong e kana-kana? Athe ke ne ke le mohau, ke bile ke rateha pusong ea ka. 12Empa joale ke hopola bokhopo boo ke bo entseng Jerusalema; ke hapile lintho tsohle tsa silefera le tsa khauta motseng oo, 'me ka romela ho timetsa baahi ba Juda ka ntle ho lebaka. 13Kea tseba hore ke ka lebaka lena bomalimabe bo ntletseng, 'me a ke le bone ha ke timela lefatšeng la balichaba!”
14Joale a bitsa Filipi, e mong oa metsoalle ea hae, a mo khetha ho laola 'muso oohle oa hae. 15A mo fa mofapahlooho oa hae, le seaparo sa hae sa borena le lesale le nang le letšoao la hae, hore a tataise mora oa hae Antiokose, a mo holisetse 'muso. 16A shoela moo, joalo, khosi Antiokose, selemong sa lekholo le mashome a mane a metso e robong. 17Eare ha Lisiase a utloa hore khosi e shoele, a bea Antiokose, mora oa khosi, hore a buse, kaha Lisiase o ne a ile a mo holisa ho tloha boshanyaneng. A mo rea lebitso la Eupatore.
Letšolo la Antiokose V le Lisiase
18Joale balebeli ba Qhobosheane ea Jerusalema ba ne ba thibeletse Baiseraele sebakeng se potileng Tempele, ba leka ka tsela tsohle ho ba hlokofatsa, 'me ba tlatsana le balichaba. 19Eaba Judase Makabea o rera ho ripitla lira tsena. A phutha sechaba sohle ho li thibella. 20Ba khobokana kaofela 'me ba thibella Qhobosheane ka selemo sa lekholo le mashome a mahlano. Judase a etsa mabetsa-hole le mechini e meng ea ntoa.
21Empa ba bang ba banna bao ba qabelletsoeng ba ile ba tsoa, 'me Baiseraele ba bang ba bakoenehi ba ikopanya le lira tseo. 22Ba ea ho khosi, ba re: “U tla lieha ho fihlela neneng ho etsa toka le ho phetetsa bana babo rona. 23Re ne re sebeletsa ntat'ao ka pelo tsohle tsa rona, re phetha tsohle tseo a reng re li etse, re mamela le litaelo tsa hae. 24Ke ka lebaka lena ba sechaba sa habo rona ba ileng ba thibella Qhobosheane. Ba fetoha lira ho rona ba bile ba bolaea metsoalle eohle ea rona eo ba ileng ba e fumana, ba ba ba utsoa maruo abo rona. 25Ha ba isa letsoho ho rona feela, empa ba futuhetse le naha tse ling tsa hao. 26Joale kajeno ba lika-likelitse Qhobosheane ea Jerusalema ho e hapa. Ba se ba hahile marako ho sireletsa Sehalalelo le oona motse oa Bete-Sure. 27Ntle ho hore u ba rake kapele-pele, batho bana ba tla etsa ntho tse kholo, 'me u ke ke ua hlola u sa ba kopa.”
28Khosi Antiokose ha a utloa litaba tsena, a tlaloa ke khalefo. A phutha metsoalle ea hae eohle, balaoli ba mabotho a hae le ba laolang bapalami ba lipere. 29Ha tla hape ho khosi bahlabani ba hiroang, ba tsoang mebusong e meng le lihleke-hlekeng tse har'a maoatle. 30Mabotho a hae a baloa ka likete tse lekholo tsa litaaso, likete tse mashome a mabeli tsa bapalami, le litlou tse mashome a mararo a metso e 'meli tse tloaetseng ntoa. 31Ba feta har'a naha ea Idumea 'me ba lara ka pele ho Bete-Sure. Ba futuhela motse oo matsatsi a mangata, ba sebelisa le mechini ea ntoa. Empa ba thibeletsoeng ba tsoa, ba e chesa, 'me ba loana senna.
32Joale Judase a tloha pel'a Qhobosheane ea Jerusalema, a ea lara Bete-Sakaria, malokana le liahelo tsa khosi. 33E sa le ka meso khosi Antiokose a tsoha 'me a khanna mabotho a hae ka potlako ka tsela e lebang Bete-Sakaria; mara a hae a itokisetsa ntoa, 'me ha letsoa literompeta. 34Ba supisa litlou lero la morara le menokotšoai ho li susumeletsa ntoa. 35Liphoofolo tsena tsa aroleloa mara ka ho fapana. Haufi le tlou e 'ngoe le e 'ngoe ha beoa bahlabani ba sekete ba apereng litšireletso tsa tšepe tsa sefuba 'me ba roetseng likatiba tsa tšepe; 'me haufi le phoofolo ka 'ngoe ho ne ho e-na le bapalami ba khethehileng ba makholo a mahlano. 36Bao ba ne ba laetsoe ho ipapisa le tlou ka 'ngoe; hohle moo e eang teng, ba imatahanye le eona, 'me ba se ke ba arohana le eona ho hang. 37Holim'a tlou ka 'ngoe ho ne ho beiloe tora ea ho itšireletsa, e entsoeng ka patsi e thata, e faselelitsoe ka lihoroto. Phoofolo e 'ngoe le e 'ngoe e ne e palangoa ke bahlabani ba bararo ba loanang ba le hona teng, le ke Moindia ea e khannang. 38Bapalami ba setseng ba beoa mahlakoreng a mabeli a mphi, sehlopha se seng ka nq'ena, se seng ka nq'ane, e le ho ferekanya lira, ba ntse ba sirelelitse le mara. 39Ha letsatsi le chabela lithebe tsa khauta le lethose, lithaba tsa phatsima le tsona, tsa khanya joaloka lirumula tse tukang. 40Karolo e 'ngoe ea mphi ea khosi e ne e itšetlehile ka maralla a phahameng, le mabotho a mang a le thoteng; ba tsamaea ka makhethe, ba ntse ba tšoere leoto. 41Bohle ba ileng ba utloa lerata la letšoele lena, le liqi tsa lona, le melumo ea ho otlana ha libetsa tsa bona, ba thothomela ke tšabo; hobane mphi ena e ne e le kholo, e le matla.
42Joale Judase le makhotla a hae ba atamela ho loana, 'me ba makholo a tšeletseng ba mphi ea khosi ba bolaoa. 43Eleasare Afarane a bona hore e 'ngoe ea litlou e kholo ho feta tse ling, e bile e apesitsoe lihlomo tsa borena; a ba a lumela hore khosi e palame eona. 44A tela bophelo ba hae ho pholosa sechaba sa habo le ho iphumanela botumo bo sa feleng. 45A khoroha ho fohla mabotho ho ea fihla ho eona, a khabela batho ka ho le letona le le letšehali, 'me ba apoha ka mahlakoreng a mabeli. 46A khukhunela tlou ena, a e hlaba ka limpeng, a e bolaea; empa ea oela holim'a hae, le eena a shoa hona hoo. 47Eare ha Bajuda ba bona matla a makaalo a mphi ea khosi le sebete sa mabotho a eona ba phekhoha.
48Mabotho a khosi a nyolohela Jerusalema ho khaoletsa Bajuda. Khosi Antiokose a lara naheng ea Judea, pel'a thaba ea Sione. 49A etsa khotso le ba motse oa Bete-Sure. Baahi ba oona ba tsoa motseng, hobane ka baka la ho hloka lijo ba ne ba sa batle ho koalloa ho oona, 'me e ne e le selemo sa Sabatha, seo ka sona ho neng ho sa lengoe. 50Ka baka lena Antiokose a hapa Bete-Sure, a siea lebotho la bahlabani moo ho lebela. 51Joale a lara ka pel'a Sehalalelo ka matsatsi a mangata; a lokisa moo mabetsa-hole, mechini ea ntoa, mechini e betsang mollo, le e betsang majoe, mechininyana e betsang metsu ea liqha, le matjeketjane. 52Bajuda le bona ba etsa mechini ea ntoa e tšoanang le ea ba lireng; 'me ntoa ea kupa matsatsi a malelele. 53Empa ba ne ba se na lijo melikong, kaha e ne e le selemo sa bosupa, 'me ba neng ba tšabetse Judea, ba e-tsoa linaheng tsa balichaba, ba ne ba qetile lijo tsohle tse bolokiloeng. 54Ho ne ho setse batho ba moelana ka Tempeleng, hobane ka baka la ho bolaoa ke tlala ba bang ba ne ba qhalane ba ile mahabona.
55Joale Lisiase a utloa hore Filipi, eo khosi Antiokose a mo khethileng a sa phela ho mo holisetsa mora oa hae Antiokose ho fihlela a beoa boreneng, 56o khutlile Peresiea le Media, 'moho le mabotho a neng a ile le khosi; le hore o ntse a leka ho hapa marapo a puso. 57Ka hoo a laela ka potlako hore ho khutleloe hae; a re ho khosi, ho balaoli ba mabotho le ho bahlabani: “Matla a rona a ntse a e-ea a qepha, lijo li se li haella, 'me le motse oo re o thibellang o sirelelitsoe ka thata; le teng re tšoanetse ho ea hlokomela litaba tsa 'muso. 58Ka baka leo a re fihleleng kutloano le banna bana joale, re etseng khotso le bona le sechaba sohle sa bona. 59Re be re ba lumelle ho phela ho ea ka meetlo ea bona, joalokaha ba ne ba ntse ba etsa; hobane ke ka baka la meetlo ea bona, eo re ileng ra e felisa, ba ileng ba keneloa ke khalefo, ba ba ba etsa sena seo ba se entseng.”
60Puo eo ea amoheleha ho khosi le ho balaoli. Khosi ea ba ea romela molaetsa oa khotso ho Bajuda, oo ba ileng ba o ananela. 61Khosi le balaoli ba etsetsa Bajuda kano; ka mora' mona, bona ba tsoa Qhobosheaneng. 62Empa eare ha khosi Antiokose a fihla thabeng ea Sione 'me a bona kamoo sebaka sena se sirelelitsoeng ka matla kateng, a roba kano eo a neng a e entse; a ba a laela hore marako 'ohle a heletsoe ho potoloha. 63A nt'o khutla ka potlako ho boela motseng oa Antiokia. A fumana Filipi e le morena oa motse oo; eaba oa mo loantša, 'me a nka motse ka likhoka.
