Ho alosa mohlape oa Molimo
1Ke khothatsa baholo ba leng teng har'a lōna, 'na ke le e mong oa bona, ke bile ke le paki ea mahlōkō a Kreste, ke e-na le kabelo tlōtleng ea hae e tlang ho bonahatsoa. 2Alosang mohlape oa Molimo o boliseng ba lōna. Le o hlokomele ka boithaopo, ka mokhoa o ratoang ke Molimo, e seng ka ho qōbelloa; e be ka lerato, e seng ka ho ipatlela maruo ka mano. 3Ba beiloeng tlhokomelong ea lōna, le se ke la ba busa ka thata, le mpe le be mohlala ho mohlape oa lōna. 4Etlare mohla Molisa oa balisa a iponahatsang, le tla amohela mofapahlooho oa tlōtla, o sa senyeheng.
5Ka mokhoa o joalo, lōna ba bacha, ikokobeletseng ba baholo. Lōna bohle, e-bang le maikutlo a boikokobetso, le ikokobetse e mong ho e mong, hobane:
“Molimo o loantša
ba ikhōhōmōsang,
athe baikokobetsi
oa ba hauhela.”
6Joale le ikokobetse katlas'a letsoho le matla la Molimo, e le hore a tle a le phahamise ka nako e lokelang. 7Litsietsi tsohle tsa lōna le li rōlele ho eena, hobane ke eena ea le baballang.
8E-bang le boitšoaro, le falimehe. Diabolosi, sera sa lōna, o sōlla joaloka tau e purumang, a ntse a batla eo a ka mo harolang. 9Itoaneleng le tiile tumelong; tsebang hore mahlōkō a tšoanang le a lōna a ntse a hlahela bana babo lōna bohle, lefatšeng lohle.
10Molimo oa mehauhelo eohle, ea le bitselitseng tlōtleng ea hae e sa feleng, ka Kreste, etlare hoba le hlōkōfatsoe ka nakoana, eena ka sebele o tla le etsa ba phethehileng. O tla le tiisa, a le matlafatse, a etse hore le se ke la sisinyeha. 11Ho eena e ke e be matla kamehla eohle. A ho be joalo!
Litumeliso tsa ho qetela
12Ke le ngoletse hakhutšoanyane ka thuso ea Silefanose, eo ke mo talimang e le ngoan'abo rōna ea tšepahalang, ho le khothatsa le ho paka hore mohau ona ke oona oa 'nete, oa Molimo. Tiisetsang ho oona.
13Kereke e Babilona, e khethiloeng joaloka lōna, ea le lumelisa; le eena Mareka, ngoan'a ka, oa lumelisa. 14Lumelisanang ka kako e halalelang.
Khotso e ke e be le lōna bohle ba leng ho Kreste.
