1 SAMUELE 14

₁Ka letsatsi le leng Jonathane, mora oa Saule, a re ho mohlankana ea jarang lihlomo tsa hae: “Tloo, re tšelele ho bahlabani ba Bafilesita ba laletseng, ba kamose oane.” Empa a se ke a tsebisa ntat'ae.

₂Saule o ne a le mathōkong a Gibea, a lutse katlas'a sefate sa kharenate, se Migerone. Batho ba neng ba e-na le eena e ne e ka ba banna ba makholo a tšeletseng. ₃Ahiea, mora oa Ahitube, ngoa'abo Ikabode, mora oa Finease ea tsoaloang ke Eli, moprista oa Morena, oa Shilo, o ne a apere setipe. Banna ba ne ba sa tsebe hore Jonathane o se a tsamaile.

₄Ka lehlakoreng le leng la lekhalo, leo Jonathane a neng a tšoanetse ho ea tsoa ho lona, hore a tšelele ho bahlabani ba Bafilesita ba laletseng, ho ne ho e-na le lefika le nang le lefaru, 'me le ka lehlakoreng le leng hape ho e-na le lefika le nang le lefaru. Lebitso la lefaru le leng e ne e le Bosese, lebitso la le leng e le Sene. ₅Lefaru le leng le ne le le ka leboea, le tobane le Mikemase, le leng le le ka boroa, le tobane le Geba.

₆Eaba Jonathane o re ho mohlankana ea neng a jere lihlomo tsa hae: “Tloo, re tšelele moo maqai ana a laletseng teng; mohlomong Morena o tla re thusa, hore re a hlōle, e bang re bangata kapa re 'maloana, hobane ha ho letho le ka sitang Morena.”

₇Mojari oa lihlomo tsa hae a re ho eena: “Etsa seo u ratang ho se etsa. Tsoela pele; seo u se ratang, le 'na kea se rata.”

₈Joale Jonathane a re: “Bona, re tla fetela ho banna bao, 'me re etse hore ba re bone. ₉Haeba ba ka re ho rōna: ‘Emang moo, ho fihlela re e-tla ho lōna,’ re tla ema themelele! moo re leng teng, 'me re ke ke ra nyolohela ho bona. ₁₀Empa haeba ba ka re ho rōna: ‘Nyolohelang ho rōna,’ re tla nyoloha, hobane Morena o tla be a neelane ka bona matsohong a rōna, 'me hona e tla ba sesupo ho rōna.”

₁₁Bobeli ba bona ba etsa hore Bafilesita ba laletseng ba ba bone, 'me Bafilesita ba re: “Bonang, Baheberu ke bao, ba tsoa mafarung ao ba neng ba ipatile ho 'ona!” ₁₂Banna ba laletseng ba bitsa Jonathane le mojari oa lihlomo tsa hae, ba re: “Nyolohelang ho rōna mona, 'me re tla le ruta pula!”

Jonathane a re ho mojari oa lihlomo tsa hae: “Nyoloha, u ntatele, hobane Morena o neelane ka bona matsohong a Baiseraele.” ₁₃Jonathane a nyoloha a khasa, mojari oa lihlomo tsa hae a mo latetse. Bafilesita ba ketōha kapele ho Jonathane, 'me mojari oa lihlomo tsa hae, ea mo latetseng, a ba qetela. ₁₄Ena e bile polao ea pele e ileng ea etsoa ke Jonathane le mojari oa lihlomo tsa hae. Ba bolaea banna ba ka bang mashome a mabeli, ba le sebakaneng se bonamo ba halofo ea akere.

₁₅Liahelong, le har'a naha, le har'a sechaba sohle, ha thōthōmeloa; bahlabani ba laletseng, le batho ba tlil'o senya, le bona ba thōthōmela. Lefatše la reketla, 'me batho ba kenoa ke tšabo e kholo e bakoang ke Molimo.

₁₆Bo-molulaqhooa ba Saule ba Gibea e Benjamine ba lebella, 'me ba bona letšoele le nyamela, le phasaphasa. ₁₇Saule a re ho batho bao a neng a e-na le bona: “Balang bahlabani, le bone hore na ba sieo ho rōna ke bo-mang.” Ba ba bala, 'me ba fumana ba sieo e le Jonathane le mojari oa lihlomo tsa hae.

₁₈Saule a re ho Ahiea: “Tlisa areka ea Molimo mona.” Ka letsatsi leo areka ea Molimo e ne e le teng har'a bana ba Iseraele. ₁₉Ha Saule a ntse a bua le moprista, pherekano ea 'na ea eketseha liahelong tsa Bafilesita. Eaba Saule o re ho moprista: “Khaotsa!”

₂₀Saule le banna ba neng ba e-na le eena ba bōkana, ba ikakhela ntoeng. Ba fumana pherekano e le kholo, Bafilesita ba hlabana ka lisabole. ₂₁Baheberu bao pele ba neng ba le ka lehlakoreng la Bafilesita, 'me ba ba ba nyolohela le bona liahelong, le bona bao ba fetohela Bafilesita, ba ea ka lehlakoreng la Baiseraele ba neng ba e-na le Saule le Jonathane. ₂₂Banna bohle ba Baiseraele, ba neng ba ipatile naheng e maralla ea Efraime, ha ba utloa hore Bafilesita baa baleha, le bona ba ba hata lirethe ntoeng eo. ₂₃Ka letsatsi leo, Morena a namolela Baiseraele, 'me ntoa ea ba ea ea feta Bete-Afene.

₂₄Ka letsatsi leo, banna ba Baiseraele ba ne ba lapile, empa Saule a hlapantša sechaba, a re: “Ho rōhakehe monna ea tla ja lijo kajeno, pele ho phirima, 'me ke e-s'o iphetetse ho lira tsa ka.”

₂₅Sechaba sohle sa naha eo sa fihla morung, 'me sa fumana mahe a linotši a le hohle naheng. ₂₆Sechaba ha se fihla morung, sa bona mahe a linotši a tšoetšoetha, empa ha se ke ha e-ba le ea mong oa sona ea ileng a a isa molomong, hobane sechaba se ne se tšaba kano eo.

₂₇Empa Jonathane o ne a sa ka a utloa ha ntat'ae a hlapantša sechaba; ka baka leo, a hlaba khèkhè ea linotši ka ntlha ea molamu o letsohong la hae, a isa molomong, eaba mahlo a hae aa èla. ₂₈E mong oa banna ba sechaba a re: “Ntat'ao o ile a hlapantša sechaba ka thata, a re: ‘Ho rōhakehe monna ea tla ja lijo kajeno,’ empa sechaba sona se lapile!”

₂₉Jonathane a re: “Ntate o kentse sechaba tsietsieng! Ha le bone kamoo mahlo a ka a elileng kateng, hobane ke latsoitse mahe a linotši hanyenyane! ₃₀Hoja kajeno sechaba se ile sa itjella ka ho rata, tseo se li hapileng ho lira tsa sona, na Bafilesita re ka be re sa ba etsa mofela?”

₃₁Ka lona letsatsi leo, Baiseraele ba hlōla Bafilesita, ho tloha Mikemase ho ea fihla Aiealone, 'me sechaba se ne se lapile haholo. ₃₂Batho ba oela tseo ba li hapileng ka mahlo a matšo. Ba nka linku, le likhomo, le manamane, ba li hlaba, ba ja nama eo e ntse e lutla mali. ₃₃Joale ha bolelloa Saule, ha thoe: “Bona, sechaba se siteloa Morena ka ho ja nama e ntseng e lutla mali!”

Saule a re: “Le mahlabiphieo! Phikolosetsang lejoe le leholo lena ho 'na mona, hona joale!” ₃₄Saule a boela a re: “E-eang, le kene har'a sechaba, 'me le re ho sona: ‘Monna e mong le e mong a tlise pholo ea hae, le monna e mong le e mong a tlise nku ea hae, ba tl'o li hlabela mona, ba je. Ba se ke ba siteloa Morena ka ho ja nama e ntseng e lutla mali.’ ”

Bosiung bona boo, monna e mong le e mong oa sechaba seo sohle a tlisa pholo ea hae. Ba li hlabela hona moo. ₃₅Saule a hahela Morena aletare. Ea e-ba eona aletare ea pele eo a e hahelang Morena.

₃₆Eaba Saule o re: “A re theoheleng ho Bafilesita, re ba phalalise ho fihlela bosiu bo e-sa. Re hape lintho tsa bona, 'me re se ke ra siea monna le ea mong oa bona.”

Sechaba sa re: “Etsa seo uena u bonang se lokile.”

Joale moprista a re: “A re atameleng mona, pel'a Molimo.”

₃₇Saule a kōpa keletso ea Molimo, a re: “Na nka theoha, ka phalalisa Bafilesita? Na u tla neelana ka bona matsohong a Baiseraele?” Empa ka letsatsi leo Molimo a se ke a mo araba.

₃₈Eaba Saule o re: “Atamelang mona, lōna baetapele bohle ba sechaba, e le hore le tl'o batlisisa, 'me le be le fumane ka letsatsi lena, hore na sebe sena se bile hokae. ₃₉Ke hlapanya ka Morena ea phelang, eena ea namolelang Iseraele, hore leha e ka ba Jonathane, mora oa ka, ruri o tla shoa.” Empa ha se ke ha e-ba le ea mong oa sechaba sohle ea ileng a mo araba.

₄₀Eaba Saule o re ho Baiseraele bohle: “Emang ka lehlakoreng le leng! Rōna, le mora oa ka Jonathane, re tla ema ka ho le leng!”

Sechaba sa re ho Saule: “Etsa seo uena u bonang se lokile.”

₄₁Saule a re ho Morena Molimo oa Iseraele: “Ke hobane'ng, kajeno, u sa kang ua araba mohlanka oa hao? Haeba ke 'na ea phoso, kapa ke mora oa ka Jonathane, oho, Morena Molimo oa Iseraele, ahlōla ka lejoe la Urime; athe haeba ke sechaba sa Iseraele se phoso, teng u ahlōle ka lejoe la Thumime.” Lōtho la supa Jonathane le Saule, 'me sechaba sa lōkōloha.

₄₂Saule a re: “Khetha ka lōtho pakeng tsa ka le Jonathane, mora oa ka.” Lōtho la supa Jonathane.

₄₃Saule a re ho Jonathane: “Mpolelle seo u se entseng!”

Jonathane a 'molella, a re: “Ruri ke ile ka latsoa mahe a linotši hanyenyane ka ntlha ea molamu o neng o le letsohong la ka. Ke 'na enoa; ke tla shoa.”

₄₄Saule a re: “Jonathane, haeba ruri u sa shoe, Molimo a mpolaee!”

₄₅Eaba sechaba se re ho Saule: “Na Jonathane o tla bolaoa, eena ea pholositseng sechaba sa Iseraele hakaale-kaale? Le ho ka! Re ikana ka Molimo ea phelang: Leha e le qōba e le 'ngoe feela ea moriri oa hae e ke ke ea oela fatše! Seo a se entseng kajeno, o se entse ka thuso ea Molimo.” Sechaba sa lopolla Jonathane, a se ke a bolaoa.

₄₆Saule a khaotsa ho phalalisa Bafilesita, 'me Bafilesita ba ikela ha habo bona.

₄₇Ka mokhoa ona Saule a nka puso ea Iseraele. A loantša lira tsa hae kahohle: A loantša Bamoabe, a loantša le Baamone, a loantša le Edomo, a loantša likhosi tsa Soba, a loantša le Bafilesita. Hohle moo a futuhelang teng o ne a hlōla. ₄₈A loana ka bonatla, a hlōla Baamaleke, a namolela Baiseraele matsohong a ba ba senyetsang.

₄₉Bara ba Saule e ne e le Jonathane, le Jishefi, le Malekishuoa. Mabitso a barali ba hae ba babeli e ne e le ana: Lebitso la oa matsibolo e ne e le Merabe, la e monyenyane e le Mikale. ₅₀Lebitso la mosali oa Saule e ne e le Ahinoame, morali oa Ahimase; lebitso la molaoli oa mabōtho a hae e le Abinere, mora oa Nere, rangoan'a Saule. ₅₁Kishe, ntat'a Saule, le Nere, ntat'a Abinere, e ne le bara ba Abiele.

₅₂Ka nako eohle ea ho phela ha Saule ho ne ho e-na le lintoa tse tšabehang pakeng tsa Saule le Bafilesita. Ha Saule a bona mohlabani ea matla, kapa ea sebete, o ne a ee a mo kenye mabōthong a hae.